O le tamaitai Samoa, le Afioga Lauano Sue Schwalger, e toalua ia te ia i laua ua tofia nei i nisi o tofiga o ni Komesina Lagolago (Assistant Commissioners) i le matagaluega o leoleo.
O le isi e toalua ai i laua, o Superintendent Tusha Penny ua tofia o se Komesina Lagolago (Assistant Commissioner) – Response and Operations.
O Superintendent Lauano Sue Schwalger ua tofia o se Komesina Lagolago (Assistant Commissioner) – Districts.
O nei tofiga ua filifilia ai nei sui o le matagaluega, o nisi ua loa tausaga o tautua ai i totonu o le matagaluega.
Mo le tamaitai Samoa, Superintendent Lauano Sue Schwalger, na uluai ulufale Schwalger i le matagaluega o Leoleo a Niu Sila i le 1983 i le itumalo o Hastings. Sa na’o le toatolu i latou o leoleo tamaitai i le latou ofisa i lena vaitau.
Na toe faamavae Schwalger mai le galuega ina ua manaomia ai ona ia nofo e tausia le fanau, ae na toe foi ane i ona tiute faaleoleo i le tausaga e 1991.
O le tausaga e 1999 na see atu ai e galue i le vaega e faia suesuega i soligatulafono matuia, le Criminal Investigation Bureau, ma aofia ai le faiga o suesuega i soligatulafono e pei o le fasioti tagata, faileagaina o tamaiti, ma isi soligatulafono matuia o sauaga ma ituaiga solitulafono e taupulepule faatasi (organised crime offences).
Talu mai lena taimi sa ia tauaveina ai tiute o se District Crime Manager – Central
District, National Manager – Professional Conduct and Area Commander – i le faaitu i Whanganui. E lei leva tele atu nei na tofia ai e avea ma District Commander – Central District.
Ua faasuafaina le tamaitai leoleo i le suafa matai alii a lona aiga o ‘Lauano’ mai lona afioaga i Samoa o Patamea i Savaii, e pei ona faatino ai lena sauniga aloaia i le masina o Iulai o le tausaga nei lava 2018.
O se tamaitai leoleo ua faamaonia ma molimauina le naunau ma lona mataalia i le faatinoga o ona tiute faaleoleo, ma e molimau le Komesina o le matagaluega, Commissioner Mike Bush, ‘E tele tausaga o taulau pea Superintendent Lauano Sue Schwalger i lona tomai e foia ai nisi o to’atuga e tulai mai a’o ia taumafai e malamalama i ituaiga eseese o tagata ma o latou manatu eseese, e ala i le faatalatalanoa filemu o i latou.’
O ia se tamaitai muamua i totonu o le matagaluega ua tofia i lea tofiga o le District Crime Manager, ma sa telē foi lona sao i le faavaeina o le Women’s Advisory Network lea na amata aloaia i le tausaga e 2014.
Momoli ai foi faamanuiaga a le Samoa Times mo lenei alo o Samoa i lona tulai mai i lenei tofiga tāua i totonu o se tasi o matagaluega telē i Niu Sila.
