Faaauau sauaga faasaga i Tina

E ioe le Matagaluega o Mataupu o Tina ma Tamaitai, Atinae o Nuu ma Aga Fesootai faapea le Matagaluega o Leoleo, e lē o ‘asa lava se vaiaso ma ni lipoti o vevesi e tulai mai i totonu o aiga ua faapea ona aafia ai ma sauaina ai tina ma fanau.
Ae o se lipoti na faalauiloa i Aukilani i le vaiaso na tea nei i se fono faavaomalo a le Faalapotopotoga ua unai aiā tatau faaletagata ma taofi sauaga (Amnesty International), na fai ai se folasaga a se alii e galue i le Pasefika i lalo o lea faalapotopotoga ma ia ta‘ua ai e matuā telē le faaletonu o iai le tulaga o sauaga faasaga i tamaitai i atumotu o le Pasefika.
Sa folasia ai le tulaga matautia o loo iai sauaga o feagai ma tamaitai i atunuu o le Pasefika aemaise i Papua Niu Kini, Fiti, le Atu Solomona, Vanuatu, Kiripati, Tuvalu atoa ai ma Samoa.
I Samoa lava ia na faaalia ai o le 46% o tamaitai o Samoa o loo sauaina, ma o le 8% o lea aofai lea o tina ua fasi i se tulaga ogaoga ua lē iloa ai se mea.
Na tapā se finagalo o matagaluega e lua e pei ona ta‘ua i le moni o nei suesuega ma na ta‘ua e le Matagaluega o Leoleo e lē o mapu lava galuega o faatino ina ia taofiofi ai nei sauaga ae e ioe o loo faaauau lava ona tulai mai ma o se faafitauli ua molimauina le mafua ona o le ‘ava malosi, o le lē lava o le faasoa ma le aiā o aiga i ulugalii ma le la fanau.
Ta‘ua e le Matagaluega o Mataupu tau Tina ma Tamaitai, e lē iloa poo fea ua sau ai nei faamaumauga ae e lē faamaonia. O le aofaiga o tamaitai ua sauaina i se lipoti tele na faatautaia i Samoa nei na maua ai e 38% le aofai o tamaitai e silia i le to‘a 1000 na suesueina na maua o loo aafia i sauaga eseese, mai i sauaga faaletino, o le fasi ma le faaoolima i ai o isi, o sauaga o le mafaufau e pei ona lafo i ai upu faifai atoa ai ma sauaga matagā.
O le mau a le Matagaluega o le vaega aupito maualuga ua tulai mai talu ona sainilima Samoa e faamalosia le feagaiga ua ta‘ua o le CEDAW – feagaiga e taofi ai le faailoga tagata e faia faasaga i tamaitai, ua toatele le numera o tamaitai ua agai i leoleo ma isi faalapotopotoga e lipoti sauaga ua faia faasaga ia i latou.
O le mafuaaga foi lea o le tulai mai pea o le manatu ua siisii i luga nei faafitauli, ae e manatu le Matagaluega, o le tele o galuega faalauiloa ua mafai ai ona toa le loto o tamaitai ma agai mai e faailoa nei uiga lē alofa o loo faia faasaga ia i latou.
Ua tutufaatasi le matagaluega o Leoleo atoa ai faalapotopotoga e pei o le Toomaga mo ē Puapuagatia, le Faatāua le Ola atoa ai le matagaluega o Tina ma Tamaitai ina ia unai faalauiloa ma aoaoga i soo se itu o le atunuu ina ia mautinoa le taofia o lenei ituaiga gaioiga o le sauaina o tamaitai poo tina.
Ua mae‘a foi ona pasia i le masina o Mati se tulafono ua aveese ai lava solitulafono patino i sauaga o tamaitai ona sa nini faatasi lava i totonu o le Tulafono o soligatulafono i tausaga ua tuanai. O le taimi la lenei ua faamalosia nei le Tulafono o le Puipuiga o Aiga lea ua sau ai faasalaga tetele e faia i soo se tasi lava e sauaina tamaitai.
O loo faaauau foi faatalatalanoaga o se tulafono ua patino i le puipuiga o fanau, ma o se tasi lea o galuega o loo feagai ma le malo e ala i le Ofisa o le Loia Sili aemaise le Komisi o le toe fuata‘ina o Tulafono a Samoa.
“E lē talia e le Matagaluega le folasaga na faia i Niu Sila, ae o loo talia le itu lea e lē o taofia lenei faafitauli i Samoa nei, ae o le tulaga aupito sili ona tāua i le taimi lenei, o le faagasolo o galuega ina ia mautinoa lava le faaitiitia o tina ma tamaitai o Samoa e aafia i sauaga nei,” o se faaaliga lea a le tamaitai Ofisa Sili Lagolago o le Matagaluega o mataupu tau Tina ma Tamaitai.