O se alii Amerika na faatautaia lana misiona mo lana ekalesia i Samoa nei i le vaitau o le 1970 ma le 1971 ua toe galue nei ma lona faletua i Samoa o se faauluuluga o le Pasefika i mataupu lautele.
O Christopher Rots, na soifua i Kalefonia i Amerika ma o le taimi na galue ai faamisiona i Samoa sa nofo ai i Satapuala, Vailoa i Aleipata, Lufilufi, Aleisa ma Pesega. Sa faaauau ana galuega faamisiona i Amerika Samoa ma nofo ai i le afioaga o Mapusaga.
Faaalia e lenei alii e lē mafai ona galo le tele o aso e taele ai i paelo o vaitimu poo paipa e ta‘i i afioaga o loo maua ai le suavai aemaise o le nofo ai i fale Samoa ma le suiga o taumafa mai i Amerika ae tau faamasani i le talo, o le palusami ma isi taumafa Samoa. Faaalia e lea tamā o taumafa nei e lē uma lona fiafia i ai ma ua toe foi lava i ai.
Sa ia faaalia foi le vave ona ia maua le tomai e tautala ai i le gagana Samoa ma e ui e 42 tausaga lea na va ai le taimi muamua na sau ai ae ua faigofie lava ona toe pue le tele o le gagana Samoa i le toe galue ai i le atunuu.
Ina ua toe foi lenei alii i Amerika na faaauau ai ana aoaoga ma na faauu mai o ia i le nofoaga o tomai faatekonolosi i Massachussetts o tikeri o le Bachelor ma le Masters i le tomai faasaienisi i isi faailoga na mulimuli mai ma na faaauau ia taumafai i le tomai faa PhD ma o le vaega o aoaoga faasaienisi i le itu faainisinia o masini ma na avea ai lenei alii o se inisinia i le Iunivesite o Texas ma le Bringham Young.
Sa faalautele ana galuega ma suesuega ma avea ai Christopher Rotz ma inisinia o tomai tau i le vanimonimo ma iu ai lava ina galue i le galuega faainisinia o loketi e pei ona galue ai i lea vaega o suesuega ma tomai faapitoa lea e ta‘ua o le NASA i Amerika.
Ua toe foi mai i Samoa lenei tamā ma ua galulue faatasi ma lona faletua i Samoa, o le tamaitai o Elaine, o lona faletua, sa galue foi i lana ia faamisiona i Samoa i le tausaga e 1992 i le 1993. O se tamaitai foi e iai faailoga i le tomai lava lea faasaienisi aemaise le tomai faafaiaoga ma ua tuua o la aiga i Amerika o le la fanau e toatolu ma fanau a fanau e toaiva, ina ia faaauau ona auauna mo tagata o Samoa ma isi atunuu o le Pasefika i lalo lava o le vaaiga a le ekalesia a Iesu Keriso o le Au Paia o Aso e Gata Ai.
Faaalia e lenei alii e lē mafai ona galo Samoa i le faatoa galue ai i le atunuu ma e tele ma anoanoai suiga o Samoa ua ia molimauina i le va lea o ana asiasiga i le atunuu ae e tasi lava le vaega e lē o suia ma o le itu lea i tagatānuu o Samoa – o loo tumau lava uiga o tagata Samoa i le talimalo ma le tausaafia i soo se tagata e tusa lava pe leai se fesootaiga. O loo galulue Elder Rotz ma lona faletua Sister Elaine i le nofoaga tutotonu o le Ekalesia a Iesu Keriso o le Au Paia o Aso e Gata Ai i Pesega.
