Tusia: Rosa Tamala Fiu
Perisipeni
Ua fata luga fata lalo, ua malie le papa-i-galagala, malie foi le fagailalau ae tofu malemo le Tagaloa na afio i Aopo i le maau ma le milomilosia o le paia lasilasi o Samoa i Brisbane aemaise le afio i le Sea ia Soafa ma Logotaeao Mulipola ma le Faasinoti Ekalesia Metotisi, Taitaifono ma le mafutaga a Manono, tainane le tausi Matagaluega mai Samoa ma le aumalaga.
O le faaopea ai o lana auauna tausi Matagaluega faafeagaiga Metotisi mai Manono, Susuga ia Rev Faatoto Tuua Tapuai, ma nisi o sui na malaga mai e aofia ai le fetalaiga ia Auapaau Mulipola Tagoiaega Laki Misikei o le Failautusi faapea Auapaau Taeaolelei Molesi Pupualii (sui o le aumalaga).
O le Aso Toonai, aso 11 o Me, na faataunuuina ai le Posiva, ma na opogi ma talisapaia faatuaeleele ma tauaaoina ai se seleni e tusa ma le $61 afe, limaselau tālā ma le fitusefulu sene ($61,000.70) tupe Ausetalia. Na momoli le agaga faafetai o le Taitaifono le susuga ia Rev Laauli Leiataua ona o le mafola ma le alofa foai. Na fai ma sui o le mafutaga ma le aumalaga, le fetalaiga ia Auapaau Taeaolelei Molesi e faaleoina se agaga faafetai ma se ‘afu o le aufaigaluega faapea le paia o Samoa na potopoto.
O le taitaifono o le mafutaga a Manono i Brisbane o le susuga ia Rev Laauli Leiataua o loo galulue ma le faletua ia Nasareta i le Ekalesia Metotisi a Inala.
O le teutupe o le fetalaiga ia Auapaau Tala, failautusi o le susuga ia Taupau Ulalei Opapo, o ia foi sa fai ma fofoga o le faamoemoe. O le tofa ia Pasēsē Tiata sa fai ma sui o le auvalaaulia ma Samoa na potopoto e faafetaia le Mafutaga a Manono ona o le fofoga taumafa ma faaaloaloga.
O le lisi o matafale e 23 a le aulotu: Rev Faatoto Tuua Tapuai (Tausi Matagaluega); Leiataua Mulipola Tagoiaega Laki Misikei (Failautusi); Tapuai Atia‘i Leiataua Sōloa (Teutupe); Leiataua Mulu; Leiataua Si‘u; Leiataua Sio; Leiataua Selau Leiataua Kiliata; Mulipola Samu Vao James; Auapaau Autafaga Luatutu; Auapaau Taeaolelei Molesi Pupualii; Tagoa‘i Mau; Papalii Seia; Taulevaa Mikaele; Faatauvelo Saulo Faapito; Lesoa Filifaiesea; Vaalepu Vaafa‘i Vaalepu; Lema‘i Sāmiu; Maiava Manoo; Tafale Taua‘itua; Numera Mulipola Avia; Tuputala Leota; Pule Simoa; ma Amosa Finau Tulia Panipasa.
