Maeu se lagona o le agaga fiafia ina ua faau‘u i le vaiaso na tea nei le faifeau a le Ekalesia a Orakei Presbyterian Church of Aotearoa New Zealand. E pei lava o le lauga sa faia e le faifeau sa lauga i lea faatasiga, sa ia ta‘ua ai le taua a Tavita ma Koriata (David and Goliath) i le Tusi Paia.
Auckland Presbytery of the Presbyterian Church of Aotearoa New Zealand v Orakei (Samoan) Congregation Appeal:
I la‘u taumafaiga faaloia i le finauga i le Apili a le Ekalesia Samoa a Orakei Presbyterian Church, ma le Ekalesia Presbyterian Church of Aotearoa New Zealand ina ua mananao le Ekalesia aoao e tapuni le faitotoa o le falesa lea e i Orakei, e aua le toe faaaogāina e Samoa ona e toalaiti le Ekalesia ae o Falesa ma fanua o Orakei e ova i le $1miliona le tau. O le taua lava e pei ona ta‘ua i le Tusi Paia o le taua a David and Goliath.
Na manuia la‘u taumafai ma ua lē tapuniina ai le faitotoa o lea falesa i tagata Samoa. O lea foi ua faau‘u le latou faifeau o Reverend Iona Su‘a i le vaiaso na tea nei. Ae o lesona nei mai i lo‘u tulaga loia ou te fia ta‘ua, ona e telē le aogā mo tatou uma:
1. E moni e totogi tupe o pili o a‘u galuegafai, ae o le galuega faaloia e lē o se galuega faigofie. O se galuega foi e tele ai ina faitioina ai lo‘u tagata e tagata e lē fiafia pe a ou malo, poo tagata e omai e mananao e fai fua galuega, ae lē totogiina pili o galuega.
Ae o le taiala o le faiga o la‘u galuega, o le tautoga sa tuu lo‘u lima i le Tusi Paia ina ua ou faau‘u faaloia ma ou tauto i le Tusi Paia, “Ou te faia le galuega loia ma lo‘u lē fefe ma lo‘u lē fai faa‘au‘au” I will work without fear or favour”. O lenei ua ova i le 20 tausaga talu ona fai lea tautoga, ae lē o faagaloina ia te au upu na ou tauto ai.
2. Ou te lei fefe e fai le mea e sa‘o mo Orakei. Sa faavae lea i lo‘u lagona ma lo‘u iloa faaloia, e lē tatau le tapuni o le falesa
i lea Ekalesia.
E lē na o galuega faaloia ua manuia ai lenei Ekalesia e oo mai i le asō:
3. O le Apili a Orakei, e tainane le toalaiti o le Ekalesia, sa iloa lava i le taumafai a lea Ekalesia ma le latou naunau i le galuega a le Atua, ma le naunau e faaali i le Presbyterian Church, e lē fea le mea lea o le fai mai e tapuni le faitotoa ia i latou ona e toalaiti le latou aulotu, ae o le falesa lea latou te faaaogāina, e ova i le $1miliona tala le value. Na tutufaatasi lenei Ekalesia, na vaai toto‘a i le mea o latou taumafai i ai. O lea ua tini le ‘ai o lenei Ekalesia. Faamalo.
4. I le taimi sa ou fofogaina ai lenei Apili, sa ou taumafai lava e finau mea e tatau ona finau, e lē o se mea faigofie. O le papalagi sa ulu i ai le Commission sa latou faia le faaiuga mo lenei Apili. O le Commission e toafā, e na o le tasi le Samoa sa tofia mai ai. O le Susuga a le faafeagaiga ia Reverend Sa Siitia.
E lei faatafa Reverend Sa Siitia i ana fesili na tu‘i mai ai le matou itu, faapea foi le itu a papalagi o le Auckland Presbytery. Pe na fai se faaiuga a Reverend Sa Siitia e na te lagolago le matou itu, pe leai, ou te lē iloaina e oo mai i le aso.
Pau le mea ou te iloa i lo‘u a‘u lagona, o le agaga fiafia, ona o fesili uma na tu‘i mai ai le matou itu e Rev. Sa Siitia, sa faali mai ai ia te au, le sau sauni o lenei tamaitai faifeau i le matafaioi, na tuu i ai. Sa ou lagona le lava o lana tapenaga ma lona iloa i le matupu lea sa talanoaina.
5. Na manuia lenei Apili, ona taatia mai loa lea o lenei ekalesia i le susga a Reverend Maafala Koko sa ia tauaveina le tiute, o le vaaia o lea Ekalesia, i le taimi a o lei tofia se latou faifeau. Sa ou lē tu ese ma le Ekalesia ae faaauau pe le taumafai ia mautu ma faaauau le manuia o le taumafaiga.
O le tele o taimi ma mataupu na tulai mai mo lenei Ekalesia e fefeu tele. Ae ui i lea sa lē faatafa foi le susuga ia Reverend Maafala Koko, i lona ia taumafai ia tini le faamoemoe o si nei Ekalesia.
Aoaoga tāua ua mauaina i lenei mataupu:
E tāua le vaai toto‘a i le mea o loo taumfai ia taunuu. Aua le aveeseina le vaai toto‘a ina ia tini le faamoemoe. Manatua e eseese taleni mai i le Atua, ae a tutu faatasi, e tusa poo le ā le faigata o se mataupu, e mauia ona o le galulue faatasi “many hands make light work”.
O Orakei, e lē o se manuia na maua le na o taumafaiga faaloia. O le manuia na maua ona o le galulue ma pulupululima faatasi tagata Samoa uma lava na tutū malosi, ia tini le faamoemoe, o lenei Ekalesia.
Poo ā faafitauli e manuia taumafaiga a tatou Samoa pea maua le agaga galulue faatasi, ia tini le faamoemoe. Poo le ā lau taleni, aua le fefe e faaaogā sa‘o le taleni mai le Atua.
