Ia faatāua le tusigaigoa i le Aso 5 o Mati – Census Day
O le masani a Niu Sila e tailima tausaga ma ao fuainumera o le tusigaigoa pe toafia le aofai o tagata. Sa tatau ona fai le tusigaigoa i le tausaga 2011 ae na tolopo talu ai le mafuie lea sa faatama‘ia Kalaisetete.
O le Aso Lua le aso 5 o Mati, o le a agai atu ai le aufaigaluega o le Matagaluega o Fuainumera (poo le Statistics) e fesoasoani i aiga taitasi auā le faatumuga o pepa o le tusigaioga a Niu Sila ma amata ao mai loa pepa ia.
E tatau i aiga taitasi ona faatumu pepa o le tusigaigoa ma ia tofusia tagata o tatou aiga ma le pepa e faatumu. O tali uma lava o loo saili mai i fesili o pepa o le tusigaigoa e malupuipuia lava i lalo o le vaaiga a le Matagaluega o Fuainumera.
E lē faaaogāina lau tali i fesili ua tuuina atu i le tusigaigoa e saili ai tagata solitulafono, poo latou o loo ovasiteia i Niu Sila, poo latou foi o loo iai nonogatupe poo aitalafu ua lē totogiina.
O le tāua o au tali ina ia mafai ona tuufaatasia ma avea le aotelega o tali e fai ma mataupu faavae e tapega i ai faiga faavae a lea faigamalo ma lea faigamalo, faapea ma matagaluega taitasi a le malo. E le gata i lea e faaaogā foi e vaega faaupufai tali o nei fesili e fai ma mataupu faavae e tapena i ai anavatau auā galuega faatino ia latou fuafuaaga mo le lumanai a faiga pati.
O se faataitaiga, e tāua tele le aofai o tagata Pasefika, aemaise le pue mai i tali o fesili pe toafia le aofai o tagata Samoa ma isi atumotu o le Pasefika o loo afifio i Niu Sila.
E tāua le maua mai pe toafia le aofai o tagata, ae toafia foi le aofai o tamaiti pe a faatusatusa i le aofai o tagata matutua. Silafia foi, afai e toatele le fuainumera o tamaiti ia e tatau ona faatāua tapenaga mo aoga.
Afai foi e toatele le aofai o fuainumera o tagata matutua, ia e tatau foi ona tapega ia lava falemai ma fale e manaomia auā le tausiga o tagata matutua. Afai foi e toatele tupulaga talavou o lona uiga e tatau ona tapena ia lava avanoa mo aoga maualuluga faapea ma galuega e agai i ai tupulaga talavou.
Afai foi e maua mai tali o fesili ma tuufaatasi le aotelega o tupe maua o le tamaoaiga o o tatou aiga, ia e faapena foi ona tatau ona tapena i ai ni fuafuaga a faigamalo ina ia lelei le tamaoaiga o aiga uma i Niu Sila.
O le masani a nisi o aiga e aloese mai le faatumuga o pepa o le tusigaigoa ma ua lē faitauina ai loa i latou ma a latou fanau. Ou te talosagaina le tatou Atunuu faamolemole ia faatāua le faatumuga o pepa o le tusigaigoa. E tāua tele le tusigaigoa e fesoasoani auā le tapenaga o galuega faatino mo le manuia lumanai o Niu Sila.
O loo manaomia sui o le autalavou e avea ma faipule – youth MP.
O loo saili nei e faipule uma a Niu Sila nisi o le autalavou i le va o le 16-18 tausaga le matutua e fai ma sui o faipule pe a oo ina talo le fonotaga a le Palemene a le autalavou poo le ‘Youth Parliament’ i le aso 16-17 o Iulai 2013.
O lea ua mae‘a ona lafo la‘u tusi talosaga i puleaoga ina ia mafai ona logo ane i soo se tasi o tupulaga talavou e fia avea ma sui faipule mo le Palemene a le autalavou.
Ou te manaomia ia tusi mai ma ta‘u mai le mafuaaga ua e talitonu e tatau ona avea ai oe ma sui faipule – Youth MP – pe a talo le fonotaga a le Palemene a le autalavou ia Iulai i Ueligitone.
O i latou o le a filifilia e tatau ona loto toa – ia aua le matafefe – ia mafai ona tautala ma fai ni lauga i totonu o le Palemene pe a oo i taimi e finau ai mataupu i le Maota Fono.
E tatau foi ona lava tapega i mataupu o le a iloiloina ma finauina i totonu o le Palemene. Poo fea lava lou itumalo, afai e fia auai sou alo e avea ma sui faipule o lena itumalo, ia vave faafesootai ane loa i le taimi nei le ofisa o le faipule ma talosagaina e lou alo le avea o ia ma ‘Youth MP’. E tofu le faipule ma le auala e filifilia ai lana sui.
O le tausaga 2009 na oo mai ai ia te au tusi talosaga a tamaiti aoga e toaiva e fia avea ma faipule i le Palemene a le autalavou i Magele.
O lea na fai ai loa le tauvaga lauga ma palota i ai o latou mātua ma aiga, ma fai i ai le filifiliga a se komiti ina ua ao faatasi palota a mātua i le mae‘a o faigalauga.
E totogi e le Malo pasese a le sui autalavou ua avea ma faipule mo lea fonotaga – ma le nofoaga mo le lua aso e fai ai fonotaga a le ‘Youth Parliament’ i Ueligitone. E faapena foi ona fesoasoani i ai faipule i tapenaga a le autalavou.
O ai lava e avea ma au sui i le Palemene a le autalavou, o le a faapena ona ou fesoasoani i ai ina ia avea ma faipule o le itumalo talavou a Magele mo le isi 3 tausaga. O lona uiga o le a maua lona avanoa e fai ai o ia ma sui o le autalavou e laga ai sona manatu i mataupu tāua mo le autalavou.
O le a ou fesoasoani i ai ia maua lona malamalama i tiute tauave a le faipule. Ma afai lava e sogasogā ma naunau i ai o ia, o le a ou fesoasoani i ai e fai o ia ma sui o Magele i tausaga o i lumanai pe a oo i lo‘u taimi ou te faamavae ai ma le tofi.
