Talu ai ona o le vaitaimi lenei mo le tele o pepa aogā poo tusipasi e faamaonia faalemalo mo i latou o loo fia ulufale i ni isi o aoaoga maualuluga e pei o Iunivesete ma Politekinika, aemaise foi o pepa e lagolago ai se aiga e fia malaga mai i Niu Sila (Sponsorship forms), atoa ma le anoano o pepa faalemalo o loo manaomia ai se J.P. e faasilasila atu ai, ina ia e maliu mai lava ma au pepa.
O loo iai pea ni isi o loo auina o latou mātua poo ni isi foi tagata e faia le sainiga o nei pepa. O se tina foi na alu atu ma pepa a lana tama e fia saini.
E mamao le pitonuu na malaga atu ai si tina lea, peitai e lei sainia se pepa ona fai mai o loo lē avanoa lana tama o loo faigaluega. Na toe foi lava si tina ma ana pepa e lei sainia ona e lē o sau le tagata e ona nei tusipasi.
O loo faapena foi le toatele o le atunuu o loo latou taumafai e ui i le auala faigofie le faatinoga o nei galuega, ae lē mafai ona faia le faamaoniga vaganā ua alu lava le tagata e ona pepa, ma saini i luma o le J.P. a o maimoa lelei i ai le J.P. i le sainiga o lona suafa.
E toe faamanino atu foi, e ao ona ave pepa e faamaonia ai nei pepa. O kopi (original copies) o le pepafanau moni, o le tusifolau moni, e faapena foi tusipasi ina ia iai le kopi moni ma le ata o le kopi e faapipii i ai le saini a le J.P. e faamaonia ai ua ia vaaia kopi moni.
O loo tele pea le mamalu o le atunuu o loo lē manino lava i nei faatinoga, ma e toe faamanatu atu ai ina ia aua le maumauina le taimi e fefoifoia‘i ai ona o le lē sauni.
E lē manaomia foi lou tauanauina o le J.P. e fai le mea sese, o le saini ae lē o iai le tagata moni e ona nei pepa. E maumau ai lou taimi e lē taliaina.
