I le va o Novema 2018 ma Aperila 2019, o le’a si’i ai i luga le lamatiaina o Samoa i matagi ma afa malolosi e a’afia ai le atunu’u. E lua, pe tolu matagi malolosi i le ono masina lea. O nei afa o le’a tutupu i totonu o le 400km o le li’o ma ogasami e iai i totonu Samoa. O le vaaiga mamao lea a le Ofisa o le Vaai Tau a le atunu’u mo Samoa i le vaitaimi o le tau mafanafana i le Itu lagi i Saute o le Pasefika.
Fai mai le ripoti, e a’afia le atunu’u i le afa e tasi e o’o atu le malosi i le Category 3. O le matagi malosi lea ma matagi e amata i le 178km i le itula. O lona uiga o le vaega e tasi le afa e a’afia ai Samoa ma le malosi e pei o Eveni, Tesema 2012.
O nei matematega a le Vaai Tau e fa’avae lea i fa’amaumauga o le Tau mo le Pasefika na amata i le 1970. O foliga o le tau e iai le El Nino Southern Oscillation (ENSO) o lo’o tumau pea i le tulaga le fa’aituau, e le’o El Nino pe La Nina, i le itulagi o Samoa. Ae o le tele o fa’ata’ita’iga ma ata o faamaumauga i le Kelope (Global Models) e foliga mai, e ioe o le El Nino o le’a a’afia ai tatou. Fai mai e 70% le avanoa mo le El Nino e aafia ai Samoa, Fiti ma Toga mai le faaiuga o le 2018. O lea faaiuga e faavae i le vevela na o’o iai oga sami (Sea Surface Temperature – SST) o Samoa i le masina o Setema, e sili atu i le masani o iai. O nei suiga o le’a mataala ai le matagaluega ma le ofisa o le Vaai Tau i Mulinu’u e lapata’ia le atunu’u i suiga mo le faaletonu o le tau.
Ae e mautinoa mai su’esu’ega a le ofisa o Vaai Tau a le Pasefika o lo’o i Fiti, o le’a atili ona a’afia Samoa, Tonga ma Fiti i matagi malolosi, matagi faafuasei, asiosio ma timuga e umi ma mamafa. Ua lapati’a ai le atunu’u atoa e mataala i nei faigata o le a lamatia ai Samoa.
Ua amata tapenaga a le Matagluega o Faalavelave Faafusasei fa’a le-Natura (Disaster Management Office – DMO) i Samoa mo ia matagi malolosi ma afa. O le tapenaga tele i totonu o le taulaga ua toe faaleleia ai ala vai o tafega i totonu o Apia ina ia vave tafe ese le vai lepa i vaega o Taufusi, Vaimea, Fugalei, Saleufi ma Savalalo. Ua mae’a foi ma le galuega na fausia ai Pa maualuluga i le vaitafe i Vaisigano e faasino sa’o ai le alavai ina ia le toe a’afia ai le fale talimalo o Sheraton Aggie Greys Hotel ma nofoaga i Matautu, Le Vili, Leone, Vaiala ma Apia Park.
O nofoaga uma ia e mafatia tele i timuga mamafa. O le lave o nofoaga ia, o le tele o eleele tanu o loo fai ma taulaga o le atunu’u. E tolu vaitafe e tafe i le taulaga mai mauga i le ogatotonu o le motu, o le vaitafe i Vaimoso, Loimata o Apaula ma Vaisigano. O nei vaitafe e tafe agai ile sami, ae ona o fanua tanu i nu’u ia e taofia ai le tafe saoloto a le suavai i tai e pei iai i aso anamua. O le tele foi o taimi ma mafatiaga e a’afia ai le atunu’u e mafua mai i vaitafe ae le o le matagi e pei ona tulai mai ile afa o Eveni ile 2012, na afaina ai le tele o fanua ma fale ona o tafega a vaitafe.
