O upu e masani ai le atunu’u, “e fa’amulia’i ona fa’atino o se nofo, a’o aiga ia afua ai ona maopoopo”. A’o le tala fo’i e fai ile faiva o Leatiogie ae le’i alo i ana ta’aloga, na muamua lava ona fa’amanuia i ai lona Tama o Fe’epo e pei ole tala ile Mavaega Tu’itu’i.
O le tala lea e fa’amatalaina ai le aso Sa ua mavae, aso 28 o Oketopa 2018, ina ua potopoto aiga ole afioga ia Auseugaefa Poloma Komiti i Fusi Safata ma Lufilufi, i se to’ona’i na saunia lava e aiga, e feiloa’i ai ma lana tamafanau, ma momoli ai la latou fa’amanuiaga ona o lona tofiga fou ua filifiliai ai e le Malo o Samoa e galua ai nei i Sydney Ausetalia.
O se fa’atasiga sa tulaga ese fo’i ona ole le gata ile fesagisagia’iga fiafia, ae o se feiloaiga fo’i ile agaga e fa’atumulia ile loto o’otia e pei ona saunoa i ai le afioga ia Auseugaefa Poloma Komiti le Konesula Aoao Fou o Samoa i Ausetalia ae fa’apea fo’i le susuga ia Meofa’auouo Kolisi Sumeo ma le tofa ile Matua ia Falefata Kepu.
Na tasi le finagalo o aiga i Lufilufi ma Fusi Safata, ole a tu’utasi le faiva o Pili ile tofa ile Matua ia Falefata, na te fa’afoeina le aso, ona e palefeagai lea ma le suafa o lo’o taualoaina ele tofiga fa’alemalo.
Na fa’aalia le agaga fa’afetai ma le fa’agae’etia ole afioga Auseugaefa ma lona Faletua, ona ole maualuga ole amanai’aina ma le fa’aaloalo a ona aiga ua ala ai lea fa’amoemoe ona o ia ma lona faletua. Saunoa Auseugaefa, “O’u aiga e, fa’afetai i la outou fa’aeaea. Fa’afetai i la outou fa’aaloalo maualuga ilea so, o lea fo’i ole a ou alo atu i la’u galuega e ala ile tofiga a le Malo o Samoa ma lo’u iloa ua outou fa’amanuia mai, ma fa’apea fo’i la outou tapua’iga. Ua o maua lagona lava le mafanafana ole alofa o le Atua i lo outou titi faitama”.
O upu fo’i na pa’u i ai le fa’autautaga ile Matua ole Alataua ia Falefata e fa’apea; “A’o alofaiva le tama o Leatiogie i ana ta’aloga, na mua’i lava ona fa’amanuia i ai lona Tama o Fe’epo e pei ole Tala ile Mavaega Tu’itu’i.
O le ala fo’i lea ole talo atu a ou aiga, se’i mua ona matou fa’alaeiau atu ma fa’amanuia atu, aua ou faiva ile tautuaina o Samoa ma lona Malo, aemaise o ona tagata. Auseugaefa Poloma Komiti ma lou faletua, o oulua mama na”.
I le mae’a ai ole taumafataga felanulanua’i ole aso na tapenaina lava lea e aiga, ona alo lea o aiga ia latou pelega ma fa’aaloaloga aua lana tamafanau ma lona tofiga, e pei lava o upu ua masani ai Samoa; “A malu i fale, ua malu fo’i i fafo”.
O le tofa lava ile Matua ia falefata na feagai ma ia fa’aaloaloga, e ala ile sua fa’atamali’i i ona tapenaga uma pei o ia aga masani. Na tatalaina fo’i le ie tele ole Malo e tofa a’i le afioga ile Konesula ma lona faletua. O se tapenaga ona ole maualuga ole va’ai a aiga i lona Tofi ole Sui ole Malo Samoa e pei ona ua tofia nei i ai.
O le afioga ia Auseugaefa Poloma Komiti ma le Faletua, e tofia mai nei e avea ma Konesula Aoao ole Malo Samoa i Sydney nei, a’o avea ai i la’ua ma Konesula ole malo Samoa i Amerika Samoa.
O se tamali’i ua loa lana tautua ile Malo Samoa, ile tele o tofiga maualuluga sa ia umia i Matagaluega eseese. Fa’amalo ma fa’afetai ai fo’i i aiga ona ole titi faitama ma le manatu fa’aeaea ia latou tamafanau.
