O le saunoaga autu a le afioga i le Konesula o Samoa ia Faolotoi Reupena Pogi o le faatama foi lea o le Malisi i Aukilani i le po o le aso tofi ua mavae i le tatala aloaiaina o le fitu a Malisi i lenei tausaga i le hall a le kalapu lakapi a Otahuhu, na ia saunoa ai e faapea, na iai le popolega i le tausaga ua mavae i le uluai tatalaina o le taamilosaga lenei o le taitoafitu a Malisi i Aukilani, pe ono toe faaauauina i lenei tausaga pe leai, ona o le lagona ia faaletama o le popolega o le taimi muamua lea ua faatinoina ai se taamilosaga faapenei i totonu o le Malisi i Aukilani, peitai ane o lea ua oo mai i lenei tausaga ua faatuputeleina le tele o au ma ua tele foi kamupani o lea ua tuu atu o latou tauau e lagolagoina ai lenei faamoemoe a Malisi i Aukilani.
O le agaga faafetai la o le afioga i le Konesula i lea afiafi o le aso tofi na momoli faapitoa i le komiti faafoe o le tapenaga o le taamilosaga lenei a Malisi ona o le saili malo ma le finafinau i mea e manuia ai le atinaeina o taleni o loo i alo ma fanau o le atunuu, aemaise lava totonu o le lotoifale o Malisi.
Ua lua ai nei o tausaga talu ona faaauau pea le taamilosaga a le Malisi i Aukilani, ma ua faaigoaina lenei taamilosaga o le Henderson Cars Ltd Auckland Marist Samoa, ma sa maualuga ma matagofie le po sa tatalaina ai le faamoemoe o lenei tausaga ona sa auai nisi o au mai Samoa, faapea nisi o au mai isi atunuu o le Pasifika e pei o Tonga ma Cook Island aemaise foi o le afioga ia Aiolupo John Roache ma faauluuluga o kamupani sa lagolagoina lenei taamilosaga;
O au mai Samoa sa auai mai o le Aana Cheifs, Faleula, Malisi Samoa ma le Eels. Pei ona saunoa le afioga ia Lemalu Ben Silver o le faatonu lea o taaloga a le Malisi i Aukilani, na afua ona faavae lenei taamilosaga i totonu o Aukilani ona o se lagona autasi a le afioga i le Peresetene ma le Malisi i Aukilani ua tatau ona vaavaai Malisi i se faamoemoe faapenei i totonu lava o Aukilani ina ia atinae ai pea le tulaga o taaloga i alo ma fanau o le atunuu.
Ae le gata i lea ua faatolu ona ave le au a Malisi Aukilani i le taamilosaga taitoafitu tele a Malisi i Samoa ma siamupini mai ai. I totonu lava ia o le kalapu a Malisi ua iai nisi o sui o lea kalapu ua mafai ona ofi atu i totonu o le au taitoafitu a le atunuu o Samoa e pei o Savelio Ropati, Alex Samoa, Alamada Motuga, ma le Samoa A o loo iai le alii o Alosio Tapili.
O le taua foi o lea taamilosaga, o loo maua ai se avanoa lelei ma se fesootaiga lelei o le komiti faafoe a le Malisi i Aukilani ma le iuni lakapi a Samoa e ono filifilia mai ai tama taaalo mai i lea taamilosaga e ono ofi atu i totonu o au a le atunuu.
Ua aumai foi le faatuatuaga a le iuni lakapi a Samoa i totonu o le komiti e ono galulue vaavalua ai i le sailia o tama o le taitoafitu a Samoa faapea le 15 mo le Manu Samoa ma le Samoa A, a leo lea ua silasila le iuni lakapi i luga o upega tafailagi o loo ua iai faamaumauga uma a le tama taalo e ono filifilia ai lea tama ua agavaa mo le au a le atunuu.
O le tausaga ua mavae sa tau tapena lona amataina pe iu i fea le faamoemoe, peitai ane, ua maea le taamilosaga sa iu manuia mea uma, ae sa iai nai vaega sa toe tilotilo iai le komiti e ao ona toe faaleleia aua lenei tausaga.
O lea ua faaauauina le taamilosaga i lenei tausaga ua siitia maualuga le tele o au o lea ua mafai ona auai mai.
E 20 au sa faatinoina ai le faamoemoe e aofia ai au e fa mai Samoa, au e tasi mai Cook Island, 2 au a Tonga, 1 le au mai Halmiton Te Papa faatasi ai ma au i totonu lava latou o Aukilani. O le taamilosaga ua tatala atu ai i tua le faamoemoe a Malisi i soo se atunuu faapea soo se tagata e mafai ona taalo, ma le faamoemoe maualuga ina ia maualuga le atinaeina o taleni o alo ma fanau ma ia avea taaloga e fealofani ai tupulaga ma faafesoaai ai le tomai ma mafaufauga o tama taaalo.
