Tusia: PLP
E toe faatalofa atu i le mamalu o le aufaitau i lenei foi vaega o le aso. Faamalo le soifua manuia ma le lagi matafi. E iai le talitonuga o loo maualuga le agalelei ma le alofa o le Atua i le soifua faafualoa o le mamalu o le aufaitau, ae alo mai loa o le a sosoo atu le Vaega 4 o le tatou fagogo, “E tauaso le alofa”.
Na pei o ni ufi e tutupu i le tino o Mativa le faananau atu o lana vaai, ina ua ea atu i luga ae tau tonu lava lana tilotilo atu ia Rosalia le la o loo pulatoa mai ia te ia. Na faafuasei ai lava ona faaselemutu le taina o le piano ina ua segia lona mauli, aua na lava ma totoe le fesagaiga o o la mata mo ni nai sekone e femolitai ai le feau o le alofa i neura o o la tino, e faavae mai i le tuinanau o mata.
O le taimi lava na goga ai le taina o le piano o le taimi foi le na lagona ai le taufai patilima o le aufaipese, e faailoa atu ai ia Mativa o ia e le o se fuaimamao o le taleni o le faipese. E oo i le faifeau o Solinuu e lei toe nofo i lalo aua ua tasi i lona manatu e le toe suia se isi e taina le pese o le latou Me. E lei popole foi le faifeau i le alii faipese o Faleapa aua o se tagata agamalu ma le tauagafau. Poo a foi fesuiaiga e tulai mai i lana galuega e na ona ia talia lava e aunoa ma sona luitauina o nei suiga.
E lei umi sina taimi talu ona galoma atu le patipati a le aufaipese ae toe faapea mai loa ma le saunoaga a Solinuu, “Faafetai i le Atua ona o lea e faalogologo atu o loo maua uma mai lava e le susuga Mativa le tatou pese. O le mea la lea o le a faaauau le tatou faaaoaoga. Ae mo le silafia e le tatou aufaipese, o Mativa o le ma atalii mai Samoa o lea faatoa taunuu mai analeila mai Samoa, ma o lea o loo nofo ia maua”. E ui i le matamuli o le tama ona o lona taimi muamua lea ua saofai ai i luma o le aufaipese, ae sa ia usitaia le finagalo o le faifeau ma faasagasaga ane loa i le aoina o le pese.
O le mea foi e malie ai aua e le na o Rosalia lea e le emo ane mata i le tama. Ua oo lava i isi fogaumi o le ekalesia ua seetia i le tatagi lelei ma le leo malie o le ta sosolo a le taulealea i nota o le piano. E ui ina toatele i latou, ae pei e tasi lava le tagata lea ua gau i ai le fatu o le faipese o le tamaitai o Rosalia aua e na o le pau lea o le tagata o loo fai ma tilotilo atu i ai, ma o taimi uma foi e tilotilo atu ai ia Rosalia e le mafai lava ona le pulatoa mai Eva ia te ia.
Pe tusa ma le itula talu ona fai le faaaoaoga ae tuua loa ma pese, ona savali mai lea o Mativa ma faanatinati atu i le fale o le faifeau. Na feeueuai solo isi tamaitai o le aufaipese a o savali ane le tama, ona tei a lea ua oso ane le tala a le isi tamaitai faale kea kea o Tia ma faapea ane, “Malo tama Samoa. Ese ma le manaia o lau ta piano”. Na ona faliu ane lava o le tama ma faamalo atu i le au maula ia ma savali loa agai i le faapaologa ma e oo atu o loo tutu mai ai Rosalia ona tei a lea ua fesili ane ia te ia pe o le a alu i le fale.
Na tali ioe atu i ai le alii ona faatofa lea o Rosalia i isi tamaitai o le aufaipese ae ua savavali faatasi atu nei ma le tama o Mativa. O le savaliga faatasi a le vaega lea na maua ai le avanoa e faalautele ai le iloa o le isi i le tasi, ae na pau o le pona, a taumafai le alii o Mativa e tilotilo i foliga o le tamaitai o Rosalia, ae pei e atili ai ona alu punou le teine e pei o se tagata e tele mea i le manava ae faigata ona tautala. Na tei le teine i le toe faapea ane o Mativa, “Lia, e ese a ma oe ia. O lenei lava e fiu e tau talanoa atu ae pei e te le fia talanoa mai ea ia ita”. Ua na o le melo ata o le teine ona ea lea i luga ma faapea atu, “Se ua ta tau fefe e talanoa atu ia te oe ona o la e tilotilo mai foi le au aitu lae i faapea foi se isi poo a foi ni ta tala o fai”.
Sei tatou liliu atu i Samoa i le teine o Maumea poo fea ua fai i ai. Na uma ona lau le tusi a le tamaitai ona nofonofo lea mo ni nai minute sei tau tea le ootia o lona loto ma le maligi o ona loimata ona o le mafutaga ua tetea. Na uma ona toe savali ane lea i fafo mo le faaauauina o galuega masani o le aso ae na faateia le teine ina ua savali atu i luma o le paaute o le a amata ona salu le otaota o le taeao, ae o la e tutu mai ai lava le alii o Tala.
“Oi ua a, e te lei alu lava i le tou fale?” O le fesili atu lea a Maumea. “Leai, oi a alu o lenei lava e faatali atu pe o le a se tala mai i le tusi na e alu nei e lau. E a, fai mai e a Mativa i lana tusi”? O le toe tatao atu lea a le alii o Tala. “Oi e leai a ni mea tele. Na o sina laupepa lava o la e momoli mai ai alofaaga masani ae leai lava ni momoga”?
“Oi, e te iloa la oe, e iai lau tala malie lea e fia fai atu. O le mea lena sa tuai ai lava ona ou fai atu, ona sa tau faatali atu lava sei e taunuu mai. E te iloa le mafuaaga moni ua ala ai ona alu Mativa i Niu Sila, e iai le mea ua tupu. Ae ou te le manao e ta te talanoa i le taimi lenei ona o la e tilotilo mai le tou aiga, ia ma le isi itu, o lea e feoai mai tagata o le tatou nuu. Ae a pe a e malie ae ta feiloai nanei ona ou tauina uma atu lea o le tala i le mafuaaga ua alu ai Mativa i Niu Sila”? o le toe osofai atu lea a Tala.
“Se Tala, o lena e te iloa lelei lava e fai si faigata o au ona o ou matua ma ou tuagane. Ou te le iloa foi la pe faapefea ona fai se auala ou te sau ai ta te talanoa. Ae a pe a e alofa tau mai i le taimi lenei. Se e leai lava se isi o amanaiaina taua ma ta tala ia e fai. E lelei foi le talanoa i le malamalama ma le aoteatea e le masalosalo mai ai lava se isi”.
Na pei o le ao i le mafaufau o le alii o Tala le faamaoni o tala o loo talanoa mai ai Maumea, aua e na te malamalama lelei lava i le aiga lea e le taitai lava ona tuufau Maumea e alu ese ma le latou fale i le tele o taimi, aemaise ai lava o le afiafi. “Te iloa oe Mea, aua e te popole i lou tau sau. O le a faitalia au ma fai se auala ta te talanoa ai. Na pau lava le mea lea ou te fia iloaina, pe o le a se taimi e te avanoa ai, ona ou alu atu loa lea. E mafai lava foi ona ta talanoa i totonu o lou potu aua e na o oe lena e te moe ai. Ou te fai atu ia te oe e matua e moomia lava le mafuaaga moni ma le faamaoni o le alu o Mativa i Niu Sila. Ou te le iloa foi pe o le a le mea lena e tusi mai ai Mativa ia te oe, ae o le a e maua le atoaga pe a ta feiloai, ona ou faamatalaina uma atu lea o le au o le paipa”.
E ui ina faigata i le teine ona tali ane i le alii o Tala i le ioe, ae sa gauai lava lona loto ona o lona fia iloaina o le tala lea o loo naunau ane Tala e faamatala atu ia te ia. I le mafaufau foi o Maumea, e moni lava le naunau ane o Tala aua o ia o se tasi o uo mamae a Mativa. O le ala foi lea o le leai o sona mafaufau i nisi tulaga o lafi mai i tua atu o le pulunaunau mai o le alii ina ia maua se la feiloaiga.
“Vaai oe Tala, aua nei e faapea ou te musu, ae ou te fefe tele e fai le tulaga lena. Se o lea e lei tai tai se taeao, a e tago lava e faamatala mai nei e uma lava e lei taina se fia”. “Te iloa la oe Mea, ia e sili ai la pe a tuu sei iai se isi aso ona o lena e te musu. E moi lava e mafai ona faamatala atu nei, ae o le manaia lava o le mea o le na o taua ma ta saofafai lelei i lalo ona faamatala atu lea. Ae afai o lou finagalo lena, ia e le afaina. Ae o le a ou alu ina nei tei ua masalosalo mai le tou aiga”.
Na fai lava tala ia a Tala ma liliu o le a savali ese, ae faalogo atu loa ua faapea ane Maumea. “Faatali laia, aua e te faapena. Se e le fiu gofie se tagata e iai se mea o naunau i ai lona loto. Afai e moni lava e iai se mafuaaga o le alu o Mativa i Niu Sila, ia ua lelei. Sau la nanei e tau mai. Ae vaai oe, ou te le manao lava e te sau a o feala ou matua. Sau i le taimi o la ua momoe ai. Aua foi nei iloa lou tino i luma o le matou fale i soo se taimi o le afiafi, ae a ta loa le sefululua, ona e tolotolo mai loa lea i autafa o le faamalama lea e i le pito i tua o lou potu lea o le a ou tago e tatala atu i tua e te oso mai ai”.
E faia pea
