Peni a le Tusitala 24 Aukuso 09

O le a ou le toe toloa umuloa pe ou te toe taia le tutafaitoa i paia sausaugata o Samoa le atunuu pele. O paia lava mai le vavau seia oo i le faavavau. Ou te faatulou atu, tulou, tulou, tulou, tulouna lava. Ae avea ia o lenei foi avanoa ua mafai ona maua e faafeiloai atu ai i le mamalu o si o tatou atunuu, aemaise lava o paaga masani o le Samoa Times, o e o loo fiafia pea e talia mai so matou tautua atu e ala i tusitusiga.
O lenei vaiaso ua manatu ina ia faasoa atu i le tulaga e pei ona iai le faafitauli o le faatupulaia o fanau teine o loo tutu i auala i po taitasi ma faatauanau i alii e ala i ni feusuaiga ae totogi atu ia te i latou tupe.
E faamalulu atu i le faitau mai a le tatou atunuu ona o lenei mataupu e foliga e maaleale i le gagana. Ae ua manatu le Peni a le Tusitala o le a le alo se lagona, aua a tatou tuu i lea maaleale, e leiloa la pe faapefea ona saili se vaifofo ina ia fai ma toomaga o lenei faafitauli.
O le tulaga e ofo ai le loto, ona ua le natia lava le toatele o fanau teine o si o tatou atunuu o loo aafia i lea tulaga. I totonu lava ia o Aukilani, ua pei o se afi mumu ma sasao i luga lenei faafitauli i magaala ma auala o Manurewa, o Otahuhu, atoa ai ma Papatoetoe.
O tausaga ua mavae sa pei e na o le taulaga o Aukilani sa tau maua ai lenei mala, peitai ua pepesi mai i Aukilani i Saute ma lavea atu ai ma pitonuu e pei ona taua i luga. E le fatu fua e le Tusitala se faaupuga, ae a faataitai ona malaga ane le paia o si o tatou atunuu i auala ma magala e pei ona taua i se afiafi, ona faamaonia lea o lenei vaaiga e pei ona faasoa atu ai i lenei vaiaso.
Sa paka lau taavale i Otahuhu i se tasi o afiafi o le vaiaso na tea nei ona loka lea ma ou savali agai i le matou falesa ona o nisi foi o fuafuaga sa fai ai.
Ae ina ua ou savali atu i le auala, sa faateia au ina ua ou faalogoina se talanoaga o faaleo mai i le gagana Samoa. Sa ou tilotilo atu agai autafa o le auala lea sa ou savali atu ai ma ou iloa ai o ni teine Samoa i le va o le sefuluono ma le sefulufitu tausaga o loo tutu mai ai.
Sa ou lagona lava le faanoanoa alofa, aua o le nofoaga lea e pei ona faaaoga faatasi e teine ma faafafine e mailei ai tama ma tamaloloa fegasoloai mo nei faiga mataga, e ala lea i le faatau atu o latou tino i ni faiga faafeusuai ae maua ai a latou tupe.
Ina ua uma mai le matou faamoemoe sa faataunuuina i lea po, sa ou toe ui ane lava i le vaega lea e agai atu i lau taavale, ma o le taimi lea sa ou vaaia ai le faaopoopo o le fuainumera o teine ua faatasitasi.
Sa ou oso i totonu o lau taavale ma ou nofonofo ai mo ni nai minute, ae i le va lea sa ou iai e le mapu le gasolo ae o taavale ma piki lea teine ona o lea. Uma atu lena ae agai mai le isi taavale piki lea teine ma alu.
O isi foi teine e uma ona momoli mai e isi taavale, ae le umi lava ae toe oso i totonu o isi foi taavale. E ui i le pogisa, ae sa mafai lava ona manino atu i le vaai nei faiga ona o moli o tutu i tafaala. Na mafai ai foi ona iloa atu e foliga mai e pei o ni tagata uli o loo avea taavale, ma tagata e pei e omai i Sasae Tutotonu.
Aisea ua faasoa atu ai i lenei mataupu Samoa? E talitonu se manatu e te ioe faatasi ma le Tusitala pe a ou faapea atu, sa tumu lou loto i le alofa i nei fanau teine. Ou te talitonu foi e te ioe faatasi ma au pe a ou faapea atu, e le o se lumanai lea na mafaufauina pe fuafuaina e matua mo a latou fanau sei tulou.
Ae o le fesili, aisea ua mafua ai ona fano le ola o nei fanau talavou ona o nei ituvaivai o le soifuaga? Pe o le mea ea e lelei le auala lea e faigofie ona maua ai le tupe vaeane le mamalu o le aufaitau? Ae pe o iloa ea e matua nai a latou fanau ma mea o loo latou faia? O ai e tuuaia, o matua ea poo fanau lava?
O le ogaoga lea o le tulafono e pei ona pasia ma faatulafonoina ai nei foi ituaiga o aga faapenei. Aua ua saoloto lava le teine ma le tama e fai faiga nei i luga o auala e aunoa ma se toe popole pe faamata e ono aafia i le tulafono, aua foi o lea ua maua le latou saolotoga e faataunuu ai e pei ona faatulafonoina e le malo Niu Sila i nai tausaga ua tuanai atu.
Tasi lenei o tulafono sa matua tetee ai lava le afioga Taito Phillip Field a o avea o ia ma faipule, aua i lona manatu e pei ona sa faailoa i luga o leitio i tausaga ua mavae a o avea ai o ia ma faipule, na ia matua le taliaina ai nei tulafono aua e feteenai ma lona talitonuga faakerisiano.
Samoa e, e le aoaia e Laupua Tamafaiga. Ae ua na o se fautuaga, matua, toe silasila ane ma le totoa i lou lotoifale. O le a le aofia uma aiga poo matua i lenei fautuaga, ae ua faapito lava mo i latou o loo faatamala ma faatalale i tiute faamatua.
Ua faamuamua nisi o vaega e le tatau ona faamuamua, ae ave le faamulimuli i tiute e tatau ona faatauaina. Ia manatua, o le fanau o le tofi mai le Atua. Fai mai le Tusi Paia, e faapei o ufanafana i le lima o le toa, ua faapea lava atalii o taulelea. Samoa, o le toa, o outou matua.
O ufanafana o a tatou fanau. A fana e le toa le u e fana agai i le vaega o loo manao e oo i ai. O lona uiga, e fuafua le lumanai o a tatou fanau i vaega o loo tatou mananao e oo i ai. E leai se mea e sili atu nai lo le maua o le mafutaga ma fanau i totonu o aiga i aso taitasi.
Ou te talitonu, o se tasi lava lena o ki e vaoia ma faaitiitia ai nei faafitauli, pe a ave le faamuamua i ni mafutaga ma fanau i aso uma. Nei avea le tatou pisi i isi galuega ma ala e faagalo ai o tatou tiute e tatau ona fai. Ua na o sina faamanatu, ae o loo ia te oe le tonu ma le faamasinoga, ma le tamaoaiga e tali ai ni isi o fesili e pei ona tuuina atu.
Ia manuia tele lenei vaiaso, ae tatou te feiloai pea