Na tumutumu aoga eseese a le atunuu i le taumafai ai o le Matagaluega o Aoga, Taaloga ma Aganuu e faalauiloa aloaia ai lana polokalame fou lenei ua faaigoa ai o le SSILaS e pei ona faapuupuu ai i le faaperetania. O lenei polokalame o loo unaia ai le faitautusi, tusitusi, numera ma le saienisi i le va o Aoga Tulagalua ma Kolisi i totonu o le atunuu.
O le saunoaga a le Ofisa Sili o le Matagaluega ia Afamasaga Karoline Fuata’i na ia ta’ua ai, o le vaai mamao a le Matagaluega, ina ia faaleleia ma siitia le tulaga o le tomai ma le agavaa o fanauiti i le poto salalau, mo le agai atu i le lumanai auā so latou manuia. Saunoa foi Afamasaga, e lē mafai ona siitia le ola a’oa’oina lelei o soo se tamaitiiti pe afai o loo faaauau pea ona a’oa’oina ai vaega ua mae’a silafia e soo se tamaitiiti. Peitai e tatau ona iloa lelei e le faiaoga, matua, aiga ma ekalesia le tulaga o loo muta ai le tomai o le fanauiti, ona faasoa atu lea iai o vaega e i luga atu e lei oo iai lo latou iloa, e lē pine le telē o se lu’itau ma se a’oa’oga faaopoopo o le a maua mai ai e nei fanau. Na faapupula atili e Afamasaga, o Aoga tulagalua, o le faavae lea o le ola a’oa’oina o le tamaitiiti, lona uiga a lelei ona tapu’e ma faafailele le faavae lenei, e lē taumate foi le iai o se moomooga ma le naunautaiga i le tulaga lelei o taumafaiga e nai a tatou fanau i le lumanai.
Na ia faailoa foi e tusa ai ma faamaumauga a le Matagaluega o Aoga mai ia latou ripoti faaletausaga, o loo manino ai le lape i le tusitusi, faitautusi, numera ma le saienisi a fanau aoga, ma e le mafuli i se aoga e tasi, o le mafuaaga foi lenei o le polokalame ua faalauiloa ai e le Matagaluega ina ia faamalosia ma unaia ai fanau e toaaga e tusitusi, faitautusi ma faalogo toto’a i le faiaoga i soo se taimi e a’oa’o ai.
Na togi ai foi ma le lu’itau a le Ofisa Sili i le tatau lava lea ona galulue faatasi ai o Samoa aoao, afai e tuli le tamaitiiti e faatau, fesili iai pe fia le tupe sa alu e fai ai le faatau ae pe fia foi le sui e tatau ona totoe mai i le faatau. E lē na’o le tusi aoga e tuu i fanau e faitau ai i aso uma, e leai, e mafai foi ona ave iai le nusipepa, Tusi Paia, ma faamatala tuugutu iai tala tuu, tala o le Tusi Paia, poo se faagogo foi, e amata suia ai se i si siosiomaga a’oa’oina e ola ma atia’e ai fanau.
O lenei tauvaga na aofia ai, a’oa’oga mo fanauiti, tauvaga lauga i gagana e lua, tusigatala, suega pupuu faitau tusi ma isi. O lenei faamoemoe na auai ai nisi o Aoga tulagalua ma Kolisi i totonu o le atunuu, ma na faatino lenei faamoemoe i gagana e lua e aofia ai le gagana Samoa ma le faaperetania, e pei ona iai le aso 17 ma le 18 o Setema 2018, i le Ofisa Autu o le Matagaluega o Aoga Taaloga ma Aganuu i Malifa.
Faaalia foi e sui o mātua le faafiafiaina o i latou i lenei polokalame ua amatamea ai le Matagaluega aemaise lava o se faamamafa foi lea mo aoga i nuu i tua ma Savaii, e lē na’o le pau lenei o le polokalame ua ave ai le faatāua i nei vaega e pei ona ta’ua ai e le Ofisa Sili o Aoga. O se tasi foi o pisinisi i totonu o le atunuu, le SSAB, sa tele lava ina molimauina le taulamua ai i le unaia lea o le fanau i le faitautusi e pei ona faatautaia ai nisi o ana polokalame i Aso Toonai taitasi. E iai le talitonuga o le Matagaluega o Aoga, Taaloga ma Aganuu, afai e amata atu nei lea faatāua, e mautinoa le atamamai ma le popoto o fanau a Samoa i le lumanai.
