O le amataga o le tausaga nei 2018, na lomia ai i luga o le Samoa Observer se tusitusiga e faatatau ise tina mai le afioaga i Salua Manono Uta, e suafa ia Asosa Tanuvasa e toatolu ona alo. O lea lipoti o loo ta’ua ai lu’itau o loo feagai ma le tina i le tausia ina osi ona aiga, ona o le le o’o atu iai o le suavai.

E silia ile kilomita le mamao o le vaega e utuvai iai le tina ia Asosa i aso uma o le vaiaso, aua se vai mo le gasesega o le fofoga taumafa mo si ona aiga, faapea se vai mo itu o loo moomia ai i aso faiso’o e pei o le faamamaina o ipu, ma le mautinoa e lelei le saogalemu o vai taumafa o loo faaaogaina mo le fanau.

O le susuga ia Anthony Frost, o se tasi o tamalii, sa fanau i Niu Sila, ao le tele o taimi o lona soifua, sa aumau ai i Ausetalia. O se tasi o tamalii na mafai ona sao mai le gasegase o le kanesa na maliu ai lona tuafafine. O lea ua filifili e nofo mau i Samoa ma ofoina atu lona soifua i aso o lona ola o loo totoe, e tautua ai i le Atua e ala i le fesoasoani i soo se isi.

Ta’ua e Anthony Frost, “Sa ou maua le tusitusiga a le Samoa Observer i le aiga lea. Sa ou oo i le aiga ma fesiligia poo le ā se auala e mafai ai ona ou fesoasoani. Sa ou polomisi i le aiga, o le a ou taumafai e sue se fesoasoani mo latou.” Na ta’ua foi e Frost, “E le pau lea o se poloketi na mafua ai ona ou malaga i Niu Sila. Na maua gofie le tele o tali o isi mataupu o lau savali i Niu Sila mose fesoasoani, peitai o le savali ise tane vai mo le tina ia Asosa ma lana fanau, le mataupu e lei  talia e le  kamupani mo se fesoasoani. O le tele o kamupani na ou tuitui iai, o le fesili muamua, pe o le a se penifiti o le kamupani e maua atu i le lagolagoina o le tane vai. o se itu e faigata tele ia te au ona tali i le tele o kamupani, ona ou te iloa e leai se itu e toe maua atu ai se faamanuiaga a lea kamupani i lea mataupu”.

“E iai lau uo e suafa ia Gloria, Na ia ave a’u e feiloai i le alii pule o le kamupani o le Henderson Cars le afioga ia Muliagatele Shiu Singh. O le valu ai nei o masina o ou sailia se kamupani e lagolagoina se tane vai mo le tina ia Asosa”.

“Na maligi o’u loimata ina ua faamatala atu le mataupu i le afioga ia Muliagatele, e lei uma atu le faamatalaina o le mataupu ae tali mai le alii pule ia Muliagatele Shiu o le a ia faatupeina uma le Tane Vai ma o le a ia malaga atu foi i Samoa e tatala aloaia le faamoemoe”.

Ta’ua e le alii pule o le kamupani a le Henderson Cars Muliagatele Shiu Shingh “Ou te faafetaia Anthony Frost mo le tuuina mai o le avanoa ia te au, ou te lagolagoina ai lenei faamoemoe.” “E mo lē o loo ia manaomia le fesoasoani”.

Ta’ua e Muliagatele, “O le aiga o Asosa, e tatau ma onomea iai le fesoasoani ona o le tulaga o loo iai le lē oo atu iai o le suavai mo le silia i le 7 tausaga”.

“E tele nisi o loo mananao i ni tane vai, e lē ona o le manaomia o le suavai, ae fai ai a latou pa laau, pe faaleoleo mo le lumanai, peitai o le agaga o le fesoasoani i le tina ia Asosa ma le fanau e ala i le faia o se tane vai, ona o le suavai o loo faamoemoe iai ola lelei i le soifua, ae e lē o mafai ona maua e lenei tina.”

Na viia foi ma faafetaia e le afioga ia Muliagatele Shiu le tina ia Asosa, ona o le le faalogologo tiga ma faavaivai i le tausia o lona aiga, ae finau pea mo se lumanai osi ana fanau, e ala lea i mea toto o fualaauaina ma le pinati.

Taua e le tina ia Asosa “E sa’o o loo iai au mea toto, o loo taumafai e faatau atu aua le faaaoogaina osi au fanau, peitai e faamoemoe uma le ola lelei o mea toto i le suavai”.

E le na’o le tane vai na faamealofa iai le afioga ia Muliagatele Shiu i le tina ia Asosa, ae na ia faia foi se faatau o meaai siiatoa e aofia ai, taga alaisa, suka, falaoamata, masima, fagugao, sosi, ma le anoanoai o oloa aua le faasoa mo le aiga o Asosa mo le masina Atoa, e aofia ai ma fasimoli ma tulinamu ma le tele o vaega o loo moomia.

Taua e Anthony Fros “Oute faafetaia le matou group i Niu Sila ua faaigoaina o le “Humanitarian NZ” mole unaia ma le lagolago malosi ia taunuu lenei faamoemoe ma tele nisi o poloketi faapenei o le a tilotilo iai I aiga o loo latou fia maua se fesoasoani”.

Ua galue nei le alii pule o le kamupani taavale a le Henderson Cars Muliagatele Shiu e tuufaatasi se komiti o sailiga tupe i Niu Sila nei, e fesoasoani atu ai i soo se mataupu i aiga Samoa o loo manaomia le fesoasoani.