E to’a 21 tagata ‘aau na tauva i le feausiga o le 5 Islands i Samoa i le vaiaso ua tea. E na’o le toatasi le tagata ‘aau a Samoa na tauva, o le alii lea o Samasoni Maoga o Leusoalii. A’o le toatele na malaga mai fafo mai Ausetalia e to’a 11, Siamani e toalua, Farani e toatasi ma Niu Sila e toaono. O le fa ai lea o tausaga o fai lenei tuuga i le va o motu a Upolu.
O le tuuga muamua na feausi ai i Manono Tai ma toe foi. Sosoo ai ma le feausiga mai Lepuia’i i Nuulopa toe foi i Lepuiai, e 4 km. O le tuuga lona tolu o le feausiga mai Poutasi i Nuusafee le motu ma toe foi, e 3.4 km le mamao.
O le tuuga lona fa o le feausiga lea mai Mutiatele i Fanuatapu le motu ae tini i Namu’a, e 5 km le mamao o le tuuga lea. A’o le tuuga mulimuli na ta’i mai lea i Falefa agai i le Afu, liliu iina ae faga i tai i le tolotolo, liliu iina ae tini i Faleapuna i le faletalimalo o le Le Uaina Resort.
O alii malolosi e toafā na faapea o le a saili iai le manumalo peitai o le tamaitai masani a le Samoa Swims ma le Samoa Events o Christina Harris mai Nelson, New Zealand o ia lea na manumalo i le 5 Islands.
Mai lava i le amataga i le tuuga i Manono na mua ai Christina. Toe sili foi i le tuuga i Nuulopa. I le aau i Nuusafee o Christina foi na mua, faapea ma le tuuga lona fa i Fanuatapu ma Namu’a, toe mua foi i le tuuga lona lima i le Afu i Falefa. Ua faaea ai o ia o le siamupini o le 5 Islands i le 2018. O le faalua ai lea ona manumalo Christina i tuuga o le 5 Islands – o le taimi muamua o le tuuga amata lea na fai i le 2015.
O le tamaitai foi o Christaina lea na mua i le tuuga ‘aau a tamaitai i Savaii. O le 2017 na tauva ai o ia i le tuuga lea ma mua ai.
O le alii na tu lua o John Sheely mai Warrnambool i Victoria, Ausetalia. Na tauva John ma Pat Gallagher mai Hamilton, NZL i le tu lua ae uma ane le taamilosaga o Sheely lea na sili.
I tuuga e lima, o le tuuga aupito sili ona faigata o le tuuga lea i Fanuatapu. E mafua ona o le ava o loo taoto i le va o Namu’a ma Fanuatapu – e loloto ae matua aave tele lava. Ona o le taimi foi e fai ai le tuuga o le tei mai lea o le tai, e faigata ai ona feausi i tai a’o tafe mai le sami. O le isi faigata o le sosoo ai lea o ‘aau e lua i le motu i Fanuatapu. O iina e soo ai le ‘aau i Sisifo mai Amaile, a’o le ‘aau foi i Sasa’e i le va o Fanuatapu ma Namu’a.
Na ta’ua e tagata ‘aau o le ‘aau aupito sili lea ona faigata ua feagai ma latou. Ae ua avea foi lea ma aau aupito sili ona maoa’e mo latou uma lava.
5 Islands (Taimi tuufaatasi o tuuga e lima)
Mamao, 27 km aofaiga
Christina Harris F 55-59 Nelson, NZ Time: 7:49:03 0 Deficit
John Sheely M 50-54 Warnambool, VIC Time: 8:10:30 – 0:16:27
Pat Gallagher M 45-49 Hamilton, NZ Time: 8:10:50 – 0:21:47
Helen Jones F 35-39 Perth WA Time: 8:18:57 – 0:29:54
Tony Midolo M 55-59 Brisbane QLD Time: 8:25:30 – 0:36:27
Sandra Skilbeck F 55-59 Warnambool, VIC Time: 8:52:43 – 1:03:40
Maelle Bourdais F 25-29 Perth WA Time: 9:24:41 – 1:35:38
Jon Kimberley M 45-49 Warnambool, VIC Time: 9:53:51 – 2:04:48
Katrin Buchta F 45-49 Germany Time: 10:08:20 – 2:19:17
Mitch Morley M 20-24 CC, NSW Time: 10:16:15 – 2:27:12
