Wayne Barnes

E pei o le tagata salamō ua lagona lona sese ua ta’utino ai Wayne Barnes e lei sa’o le faiga o ana faaiuga i le taaloga na faia’ina ai le faamoemoe a le All Blacks i le Rugby World Cup 2007. 

O le taaloga o loo talanoa i ai le alii laufali o le taaloga a le All Blacks ma Farani i le QF o le Ipu a le Lalolagi. I lea taaloga e leai se faamoemoe e malo Farani, ae o Farani na manumalo ae faia’ina le All Blacks ma muta ai ma le faamoemoe o le All Blacks e manumalo i le Ipu o le lalolagi i lena tausaga.

O Barnes na laufali i le taaloga lea, e tele mea sese a Farani e lei faaaogāina e le laufali, e aofia ai ma le pasi i luma, lea na sikoa ai Farani ma malo ai i le taaloga.

O le isi faaletonu o Barnes o le faasala i le pepa samasama o Luke McCallister le 2nd five a le All Blacks ae leai se faasalaga na faia i solitulafono a Farani. O le malolo ai o McCallister mo le sefulu minute na atili faaletonu ai taumafaiga a le All Blacks.

Ae o le ‘au lea a Niu Sila na iai tama tuai e iai Richie McCaw na kapeteni, Dan Carter, Byron Kelleher i le ‘afa, Jerry Collins ma Rodney Sooialo i numera ono ma le valu ma Malili Muliaina i le uigi. O Leon McDonald, le faiaoga a le Blues na tamoe i le fulupeki a’o tama malolosi o Carl Hayman ma Tony Woodcock na pou ma Anton Oliver na taalo i le tulaga o le hooker. O le faiaoga o Graham Henry ae o Steve Hansen na faiaoga lagolago ia Henry. 

E matuā malosi lava le ‘au a le All Blacks. A’o loma le RWC na faitau ai e le autusitala ma tagata maualuluga o le taaloga e leai se ‘au o le a lalata i le All Blacks. I le talanoaga ma le BT Sport i le UK i le vaiaso na tea nei na fesiligia ai Barnes pe iai se faaiuga na ia faia a’o laufali ua ia salamō ai. 

Na tali Ioe le alii laufali ma amata faamatala ai le mea na tupu i Cardiff i le taaloga lea a Niu Sila ma Farani. Fai mai a ia, na misi ia te ia le pasiga na pasi ai i luma e Farani le polo a’o osofai e latou le Itu agavale o le malae. Na faitau Niu Sila o le a ili le faaili a le laufali ae e leai, a’o tamomoe pea Farani agai atu i laina sikoa. E lei umi ae sikoa le ‘au ma ausia ai ‘ai o le taaloga 20-18.  Na ta’ua e Wayne Barnes e sese lana faaiuga lea i le lē taofia o le taaloga auā na manino le alu i luma o le pasiga a Farani. Na ta’ua foi e ia e lē faapea o se mea na ia fuafuaina le lē iliina o lana faaili. Ae o le tulaga lava na tupu i le taimi aasa o le taaloga. 

E manino i tagata Niu Sila lea tulaga sese, ae na iai foi ma isi solitulafono a Farani e lei pulea lelei e Barnes e iai offside a’o lalata Niu Sila i le laina a Farani. 

Na matuā itagia Barnes e Niu Sila atoa i lana faaiuga sese, na mafua ai ona malo Farani. I le iuga o le taaloga na ta’ua ai e le alii kapeteni o Richie McCaw lona lē fiafia i le World Rugby i le tuu o lea taaloga tāua e faafoe e se laufali fou, ia Wayne Barnes. 

Na ta’ua e McCaw e lē o Barnes na te faitioina ae e faitioina e ia le World Rugby i le tofia o le laufali fou e faafoeina taaloga o le quaterfinal. O le taaloga sili lea ona tāua na tuu i ai Barnes i le na’o le 28 o ona tausaga i le 2007.

Na ta’ua foi e McCaw na vaaia e le All Blacks le fefe o Barnes e ili lana faaili e pei o se laufali faata’ita’i. E ui na fefe Barnes e taofia le taaloga i taimi na sese ai Farani ae na ia tulia i tua McCallister i le minute 46 o le taaloga i le faalavelave i le laina a Farani.  Ae na iai avanoa e manumalo ai Niu Sila i le taaloga e iai le faaaogāina o le drop goal a’o i luma  o le pou. Peitai e lei faaaogāina e le ‘au lea avanoa ae taumafai atu pea i le laina sikoa ma toe maua ai e Farani le polo.

O Niu Sila na sili ‘ai i le malologa 13-3. Ae o le tuli i tua o McCallister na amata ai iina ona sui le taalo a Farani ma fosi ai le taaloga. Na tutusa ‘ai o le taaloga ta’i 13-13 ae toa sikoa Niu Sila (Sooialo) ma maua ai ‘ai 18-13 mo Niu Sila.  Ae o le minute 68 o le taaloga na faatamoe ai e Farani le polo mai le sikalamu ma alu ai i luma polo i le ‘afa o le malae. Na manino le pasi i luma, ae e lei iliina e Barnes le faaili. Mai le tamoega lea na sikoa ai Farani. Na ova le a’a ma ausia ai ‘ai 20-18 mo Farani a’o toe 10 minute o totoe. 

O le taimi lea sa tatau ona faaaogā ai e Niu Sila le drop goal peitai e leai ma muta ai ma le faamoemoe o Niu Sila i le Ipu o le 2007.