Ausavali Point Chev Walking Samoan i Walker Parker

O le Aso Toonai na tea nei 23 Mati na toe tapu’e ai le kalapu savali poo le Walking Samoans i le pitonuu o Aukilani tutotonu (Auckland Central). 

Pei ona silafia o le kalapu savali lenei sa faatinoina i Sandringham, ona see atu lea i Grey Lynn ona lē toe faalogoina lea o se tala mai le kalapu lenei, ina ua siitia i Whangarei le latou taitai, le tofa ia Lalau Willie Fong.

O lea la ua toe timata le sa o Auckland Central ina ua tulai le susuga i le faafeagaiga ia Rev, Fetulima Mika ma le mamalu o le ekalesia Papatiso (Baptist Church) i Pt. Chevalier, lea la ua iai nei ma suiga fou i le nofoaga o le savali lenei aemaise foi ua iai ma suiga fou i le laulau poo le executive, ae ua talafeauga foi lava ma le toe foi mai o le tafeaga lea na tafea atu ai Lalau i Whangarei.

O suiga fou la i le laulau a fono a le Walking Samoans i Pt. Chevalier, o le faatamā le Susuga i le Faafegaiga Rev. Fetulima Mika, o le faufautua o Faasami, o le taitai o Paulo Malae, sui taitai o Lalau Willie Fong, failautusi o Lotomama, ma le sui failautusi o Taima. O le nofoaga e faamautu i ai mo savaliga, o le Walker Park i Pt. Chevalier i le tulimanu o Walker Street ma Neville Street.

Na momoli ai foi le agaga faafetai ma le faamalo a faatonu o le Walking Samoans i le taeao lea, i le susuga i le faafeagaiga, Rev. Fetulima Mika ona o le tofa moe manatunatu, ua lē gata i le soifua faaleagaga ae ua faatofala’ia foi i le faatāuaina o le soifua ma le ola maloloina tainane le maua o le tino malosi.  E lē faaitiitia foi le fia faafetaia o le ekalesia i le lagolago i se faatofala’iga a le susuga i le faafeagaiga aemaise o le silasila i le tāua o le tino malosi, le ola manuia, aemaise o le soifua maloloina.