E lei iai se fesoasoani tau tupe a le malo o Samoa na tuuina atu e tapena ai le auvoli a Samoa e malaga atu ai i taaloga o le Oceania i New Caledonia.
Na manino lelei i le tatou lomiga i le vaiaso ua mavae, na’o fesoasoani a kamupani i totonu o Samoa sa tuuina atu o latou tau’au e tapena ai lenei malaga faatasi ai ma le fesoasoani a aiga ma mātua, ona o le alolofa ia latou fanau o loo tauaveina le igoa o le atunuu i nei faagatama.
O le vaiaso atoa sa iai i Aukilani le ‘au, sa fesoasoani ai nisi o alo ma tamafanau o le atunuu o loo aumau i Aukilani ua iloga foi lo latou sao i lenei taaloga. Sa mafai ona tausia le ‘au e aunoa ma se totogi, e pei o le susuga ia Naite Telefoni, o Tui Tuilaepa faapea le faletua ia Nancy Palelei.
O i latou ia sa tausia le ‘au e ala i meaai faapea le totogiina o fale sa nofo ai le autaaalo faatasi ai ma le feaveaina o le ‘au i nofoaga o loo fai ai a latou toleniga.
O le po o le Aso Faraile sa fai ai se sailiga seleni a le auvoli a Samoa i le hall a le kolisi o Magele e tau saili ai se isi seleni e fesoasoani i le totogiina o fale o loo nonofo ai le ‘au i New Caledonia faatasi ai ma le feoaiga i nofoaga o loo fai ai taaloga.
E ui lava la i le utiuti o le taimi sa tapena ai lenei faamoemoe i le po siva, ae sa vaaia lava le agalelei ma le titifaitama o mātua ma aiga i Akulani nei e ala lea i le faamalo’ulo’u mai i le malulu o nai tina ma tamā faapea fanau e apogi le manaoga o fanau o loo fai ma sui o Samoa i le taaloga volipolo.
Ua lē ma lava le mativa i le afioga i le peresitene o le auvoli ma lana ‘au, ae ua taumafai lava i lenei faamoemoe ona o le naunau lava ia tau se ‘ai o Samoa i taaloga o loo faatinoina nei.
E iai kalapu voli o loo faatinoina e nisi o alo ma tamafanau a Samoa i Aukilani sa tuuina mai foi lo latou tau’au i lea po, e pei o le kalapu a le Uso mo Uso, faapea le kalapu a faafafine.
E toaitiiti le mamalu o le atunuu sa auai ma molimauina lea faamoemoe ae o le agalelei o le Atua sa lē mafai ona tuulafoaina ai lana fanau a’o tapena atu le ‘au mo le sailia o se ‘ai o Samoa i nei faagatama.
Na tatala faafiafiaga i le sausaunoaga a le afioga i le peresitene o le ‘au mai Samoa, ona faasolo atu lea i siva a tama ma teine o le ‘au, ae taualuga ai i le siva Samoa a le kalapu o le Uso mo Uso.
Sa lē tuua foi le agalelei o nisi o aiga sa tusia o latou alofa e tauala atu i nai fanau taaalo faapea le kalapu a faafafine. E $3,500.00 le aao mafola o aiga ma uo ma ē masani aemaise o kalapu sa lagolagoina le faamoemoe o le auvoli.
E ui i le toaitiiti o i latou sa auai, ae sa faagaeetia lava le afioga i le peresitene o le asosi voli a Samoa i lenei seleni sa latou mauaina, ma o lona agaga faafetai foi lea i le mamalu o Samoa o loo i Aukilani aemaise lava i aiga, ona o le titifaitama ma le fai atunuu lelei o lea ua latou mauaina ai lenei seleni, e fesoasoani i le latou malaga a’o iai i New Caledonia.
E tasi le vaiaso o loo faagasolo ai taaloga ona toe taliu mai lea o le ‘au i le Aso Sa o loo loma nei ma toe afea Niu Sila ona faatoa tuuvaa atu lea mo Samoa.
