E sefululima ‘au a afioaga poo nuu i totonu lava latou o Aukilani o lea ua mautinoa ua auai i le taamilosaga o le Aukilani Samoa i lenei tausaga. E aofia ai le ‘au a Laulii Lions lea sa latou umia le talita ma le ipu o le taamilosaga i le tausaga ua mavae, le Mount Fort Brothers, Tama o le Moatoga, Apia Maroons, Saleimoa, Iva, Tama o le Lava, ma le Nofoalii Salevao, o ‘au ia o lea ua filifilia i le Pool A.
O le Pool B o loo auai ai le Laumua o Tumua, Nations, Marist OB, Auckland Reds, Faleula, Tama o le Mau a Vaimoso, United Brothers ma le ‘au e tasi mai Lotoso’a i Saleimoa i Samoa o lea ua mafai ona faatasi mai i lenei tausaga. O le Aso Toonai 18 o Aokuso o le a amata aloaia ai le taamilosaga i le malae i Otahuhu i le tolu vaiaso, ona see atu loa lea ma toe faaauauina le taamilosaga i le malae i Aorere Park e pei ona masani ai i tausaga taitasi.
E lē o iai se suiga o ni polokalame a le Aukilani Samoa i lenei tausaga, pau le suiga o loo iai, o le tofi peresitene lea sa umia e le afioga ia Aiolupotea John Roache, o lea ua see mai nei i le afioga ia Tapuai Siaosi ma lana laulau ia Tuifaasisina Moe, Leota Isaako ma Magele Pili.
O le po o le Aso Toonai na fai ai se sauniga puupuu i le hall a le Otahuhu Rigby Club i Otahuhu, e tatala aloaia ai taaloga o lenei tausaga. O upu faamalosi a le susuga i le faafeagaiga ia Rev Ionatana Lefale sa fai ma ositaulaga i lea po e faapea, ia galulue itutino uma mo le lelei o le tino, e pei o mata, taliga, lima, ma vae, e tatau ona galulue faatasi auā le manuia o le tino.
E faapena foi le ‘au, e tatau ona galulue faatasi tama taaalo uma auā le manuia ma le manumalo o le ‘au, e le gata i tama taaalo ae oo foi i le pulega o le ‘au ma le autapuai, e tatau ona galulue faatasi uma i le loto e tasi.
O le aotelega o lea saunoaga, e manuia le Aukilani Samoa ma ona fuafuaga alualu mamao pe a galulue faatasi uma aulakapi taitasi, o pulega o ‘au, faapea le komiti faafoe o le Aukilani Samoa.
O nei itutino eseese o le Aukilani Samoa, e mafai ona fausia ai se isi amataga fou ma le lelei pe a oo ina galulue faatasi i le loto e tasi tagata uma. Sa matagofie le tatalaina aloaia o lenei faamoemoe ona sa auai atu iai le Konesula Aoao o le malo o Samoa le afioga ia Faolotoi Reupena Pogi, faapea le faatamā o le Iuni lakapi le afioga ia Toalepai Lui Tautolo ma lona faletua, o le afioga ia Aiolupotea John Roache ma lona faletua faapea ma isi malo faaaloalogia sa auai atu iai, faapea le asosi o laufali o loo mafai ona latou faafoeina taaloga i vaiaso taitasi.
O le saunoaga autu o le po na momoli ai le agaga faafetai a le afioga i le peresitene ia Tapuai Siaosi i le mamalu o kalapu taitasi faapea malo faaaloalogia i le auai atu, ua maualuga ma matagofie ai le amataina o fuafuaga a le Aukilani Samoa i lenei tausaga. Na saunoa foi le afioga i le Konesula e ala i ana faamanuiaga i le Iuni lakapi a le Aukilani Samoa, faapea ma faamanuiaga mai le faatamā le afioga ia Toalepai Lui Tautolo.
O le afiafi foi lea sa momoli aloaia atu ai i totonu o le komiti o le Aukilani Samoa le talita ma le ipu sa umia e le ‘au a Laulii i le tausaga ua mavae, faatasi ai ma le tauaaoina atu o le isi ipu fou o le taamilosaga auā le faatinoina o taaloga, lea na saunia e le afioga ia Aiolupotea John Roache ma lona aiga.
O le ipu tuai sa iai, o le ipu lea sa tuuina mai e le ofisa o Polenisia, peitai o lea ua tauaaoina le ipu fou mai le afioga ia Aiolupotea i lenei tausaga ma ua iai le fuafuaga a le komiti, o le ipu lea o le a see mai e sui ai le ipu a le Polenisia.
