Ua fai si umi o gagalo atu le aulakapi a Vaimoso ma le Iuni lakapi a le Aukilani Samoa, ua savali nei i le fitu tausaga talu ona lē toe faia se ‘au. Sa ta’ua e le susuga ia Faalogo Vena o se tasi o sui o le afioaga o Vaimoso, sa tautuaina le ‘au i le tulaga o faiaoga i nisi o tausaga ua tuanai, e tasi lava le mafuaaga na lē toe faia ai se ‘au a le nuu, ona o le tele o tuatuagia o tamaiti i galuega a’o nisi foi ua malaga i fafo atu o Niu Sila.
O le tausaga lenei ua toe a’e ai se lagona o nisi o tamafanau o le nuu o loo fiafia i lenei lava faagatama o le lakapi, ua tatau ona toe faaauau le ‘au a Vaimoso e pei ona sau ai i totonu o le Aukilani Samoa.
O le vaega muamua se’i lalaga pea le taleni o loo i alo ma tamafanau o le nuu, auā o le tasi lea ‘au sa iloga ona taulamua foi i totonu o Samoa i le taaloga lava lenei o le lakapi, ma sa iai foi ana tamafanau sa mafai ona ofi atu i le ‘au a le atunuu le Manu Samoa i tausaga ua tuanai.
Lona lua ua toatele tamaiti o le nuu o loo taaalo i isi ‘au ae o lea e iai le ‘au a le nuu e tatau ona toe faaauau ina ia toe maua ai se maopoopoga pea o tupulaga o Vaimoso o loo i totonu o Aukilani aemaise ai o le nofo fealofani o tagata uma o le nuu.
O le loto e tasi ua toe fausia ai nei tupulaga o Vaimoso e pulupululima faatasi ai e fai le ‘au, lea na mafua ai ona toe maua le sootaga o le tele o tupulaga aoga o Vaimoso i totonu o Aukilani faapea tupulaga o tagata matutua.
Ua mautu le ‘au mo lenei tausaga, ma ua mautu foi ma lona laulau latou te faafoeina le tele o ana polokalame, e pei ona seei mai ai le afioga ia Letiu Tamatoa Vaili i le tofi peresitene, failautusi o Rachel Sapina Stowers, ma le teutupe o Muaau Seti Tanielu.
O le faiaoga o le ‘au ua filifilia ai le susuga ia Siliko Siliko o se tasi o tamafanau o le nuu sa faiaoga muamua i nisi o ‘au a fanau aoga i Samoa ma sa manuia lo latou taumafai i le sailia o le suega siamupini, ma o lea ua malaga mai i Niu Sila ma aumau ai ma ua maua ai ma le avanoa e tuu mai ai lona tau’au e fesoasoani i le tumafaiga o le ‘au a le nuu.
Ta’ua e le susuga ia Siliko Siliko, o le tele o taimi e alu ai e matamata i le taamilosaga lenei a le Aukilani Samoa, ma e fiafia ai lava e lagolago faagatama faapenei.
O le tele la o taimi e o atu ai tupulaga o le nuu ma tauanau ia e sau e toe fai le ‘au, ma ua avea o se mea ua faamalosia ai lona loto ua tatau loa ona toe fai se ‘au mo tamaiti e faaaogā ai le taleni o loo ia i latou.
O le ‘afa o le ‘au o tamaiti aoga, ae o isi tamaiti o tamaiti o loo faigaluega, ma o loo tatala foi le avanoa i nisi tama taaalo i tua o loo fia auai.
O le afiafi o le Aso Toonai na fai ai le sauniga faapitoa e le afioga ia Patele Michael Alipia e faapaia ma tatala aloaia ai le togiga fou a Tama o le Mau mo taaloga i lenei tausaga. Na tumutumu lea afiafi i sui o isi kalapu o loo auai i le taamilosaga, faapea aiga, uo ma paaga a Vaimoso sa faatasi atu ma molimauina le togiga fou a le ‘au, ma ua maualuga ma matagofie ai le famoemoe i lea po, ma o lenei togiga na saunia ma tapenaina e alo ma tama fanau o le afioaga.
Na momoli foi le faamanuiaga a le afioga ia Patele Michael i le ‘au auā le alo atu i taaloga o lenei tausaga.
