O le a’oga a Woodridge State High School e i le itumalo o Logan City, ua lausilafia e le toatele auā e toatele alo ma fanau Pasefika e aofia ai ma Samoa sa aoaoina ai ma o loo gasolo atu pea i ai e lē o misi se tausaga. O nisi foi o alo Samoa o loo tulaga lelei ai i le a’oga o loo latou fesoasoani malosi pea i le fautuaina ma le a’oa’oina o fanau aemaise le galulue vaavaalua ma mātua.
O le aso 20 o Setema i le itula e 3 i le afiafi, o se tasi lea o aso faitaulia i le a’oga, na faafeiloai faapitoa ai le mamalu lautele o i latou na pa’au atu i le itumalo o Logan ona o lenei aso faapitoa o le Woodridge Heritage Festival.
O lene faamoemoe, ua lē gata ina faapotopoto mai ai tagata lautele, ao se avanoa ua toe mafuta ai nisi o tama ma teine tuai sa a’oa’oina i le a’oga i tausaga ua mavae, poo fea lava e aga iai nei alo ma fanau, ae le mafai ona galo lo latou faasinomaga le a’oga na fofoa atu ai lo latou ola a’oa’oina, ma o se fiafiaga sili lea i tamaiti o a’oa’oina ai i le taimi nei ma tamaiti o fuafua e ulufale atu i le a’oga.
Sa faamanatuina ai foi le tele o mea lelei ua iloga ai le a’oga, ma le toatele o tamaiti ua tulaga lelei sa a’otauina i Woodridge, o talafaasolopito aemaise o le fesootaiga vavalalata ma le community a Logan. Na mata’ina i lea afiafi le savaliga tele na faataamilo i totonu o le hall a le a’oga, ua ta’ua o le ‘history walk’, na maofa ai le toatele ina ua molimauina e nisi ni ata mananaia o faapipii i le puipui (wall) lea na savalia a’o alu le maimoaga.
O le maimoaina o meataulima ma measina na fausiaina lava i totonu o le a’oga lea na fai ma mitamitaga i nisi o tama ma teine tuai na toe mafuta atu i lea aso. Na fesiligia foi ni o latou finagalo e silasila toto’a ma maitau ni vaega e ono avea ma mata’aga o manuia i le lumanai auā alo ma fanau o agai atu e atili faaleleia ai a latou taumafaiga faalea’oa’oga, o le a fai foi lea ma pine faamau mo latou i isi tausaga o le lumanai.
Na tatalaina aloia faafiafiaga i le sauniga faapitoa a tagata e patino iai le laueleele o Logan e pei ona masani ai, lea na lagolago iai Aunty Robyn. O lea afiafi ma le ‘auga autu, na faamanatuina i le toe faatinoina lea o le tele o faafiafiaga ma aganuu eseese mai atunuu o loo a’oa’oina alo ma fanau i le a’oga aua e le gata o tamaiti Pasefika ae faapea foi isi atunuu, lanu ma gagana na tofu sao uma i lea afiafi. Na maofa le toatele o le aumaimoa i taleni ma tomai na tapenaina ai siva faaleaganuu ma musika malie e alo ma fanau mai le a’oga a Woodrdige, latou o aoaoina ai i le taimi nei.
O le aotelega, na mafai foi ona auai nisi o tamaitai tuai o Woodridge, Katherine Ioane ma Lana Siliga na soosoo tauau foi ma fesoasoani i le faamoemoe faapea Damien ma Alberto. Na faafetaia faapitoa e le a’oga le susuga ia Johnathan Mafo’e o le tama tuai a le a’oga ua avea ma Peresitene o le Griffith Pasifika Association mo le auai atu ma fesoasoani i lea afiafi.
O le faafetai foi ia Tilomai ma le Culture Group sa mafai foi ona maualuga ai lea afiafi i lo latou auai atu. Na faafetaia ai le Logan River & District Family History Society mo la latou pitolaau i lea faamoemoe.
O le susuga ia Sefa Pati ma le lagolago a le Logan Police (Police Liaison Officer) o se tama tuai a Woodridge na momoli foi le faamalo a le aoga ona o le faaavanoaina o lona taimi e faatasi atu ai.
O le galulue faatasi o le toatele o faiaoga, ma sui o le a’oga a Woodridge State High School i le vaiaso atoa seia pa’ia le aso lea, e le tini lau o lenei faamoemoe. O la latou galuega e tatau ona amanaina, e faapea foi i le faalapotopotoga a matua ma fanau (P & C Association)
Na maualuga foi le aso i le auai atu o le afioga i le Pulenuu Honourable Cameron Dick faapea nisi o foai e pei ona ofoina e le Logan City Council ma Brisbane Multicultural Arts Centre na lagolago ai le faamoemoe o WSHS Heritage Festival. O isi mealofa ma faaailoga na tauaao ma tuuina mo le community i lea afiafi na momoli iai le agaga faafetai o le a’oga e aofia ai : (1) Osmac Apprenticeships; (2) ACCESS; (3) TAFE QLD; (4) YourTown; (5) Event Cinemas (Loganholme); (6) Trinder Park Aged Care Facility (7) Binnacle ma (8) BlueDog. O le kamupani a le All Fired Up Fireworks na ofoina foi la latou fesoasoani e lagolago ai. Na faafetaia faapitoa le international food vendors na mafai foi ona lagolago.
O le toatele o alo ma fanau a le itumalo o loo gasolo atu ma avea lenei a’oga o se magāvai ola o le olaga a’oa’oina, ma o le faanaunauga lea o le vasega o faiaoga ma le faauluuluga pulega, ina ia faaauauina pea lenei sootaga vavalalata ma le toatele aua se manuia ma ni taunuuga lelei o taumafaiga a fanau mo le lumanai.
