Le Afioga ia Leniu Taliulu Teo

Ua tata’i le manatu ma le finagalo o le afioga a Leniu Tali’ulu Te’o, e lē o se tina mai le afioaga e ana le pepe lea na maua o opeopea i gataifale o le afioaga. 

O le saunoaga a Leniu e faapea e lei māmā le silasila o le afioaga ina ua maua le pepe, ona o le taimi lava na tulai mai ai lea mataupu, o le taimi foi lena na valaau faatopetope ai le fonotaga a alii ma faipule e faatalanoaina le faia o se auala e saili ai poo se isi o le latou nuu e ana le pepe.

Peitai na saunoa Leniu, na agai masalosaloga o le afioaga i se tasi o tamaitai o le latou nuu, ‘ona sa iai le manatu o se pepe fou faatoa fanau lea na maua i Laulii. Peitai na faaalia e Leniu, na maua atu lipoti a leoleo, o le pepe lea na maua ua tusa ma le ono 6 masina le matua, o lona uiga e lē taitai ona fetaui ma latou masalosaloga faasaga i le tina o le latou nuu lea na tau masalosalo i ai.

“O le tina lea e faapea faato’ā ola si teine, i le aso tonu lea na maua ai le pepe, na iai lea o fuafuaga o le a avatu e fesiligia i luma o le nuu, peitai na oo atu loa lipoti a leoleo, e faapea o le pepe lea na maua ua 6 masina le matua, ona matou iloa lea e lē talafeagai.”

E lē fia faailoa le suafa o le tina Laulii lea na tau masalomia, ona e manatu Leniu e lē talafeagai ma faaeteete foi i tulaga tau i le silasila i le tulafono.

O le pepe lea na maua i Laulii, ua mae’a ona teu, lea na ofo e le tina ia Cilla Sullivan o Lalovaea le avatu ia te ia o pepe uma ia na maua o tatia’i na te faia o latou sauniga. Ma o le pepe na maua i Laulii o loo teu lona tino maliu i le fanuatanu a le malo i Tafaigata.

Peitai na saunoa Leniu, e ave faafautuaga i tina ma tamaitai o le atunuu ina ia toe tomanatu a’o lei faia lana faaiuga mautu, e lafoai le meaalofa mai i le Atua. 

O lona talitonuga, e tele auala e mafai ona faia e le tina poo le tamaitai ua ma’itaga lē manaomia, nai lo le faia o lana faaiuga o le lafoai o si alualutoto.

“O se tuualalo, o loo toatele isi ulugalii o loo fia fai pepe pe fia fai fanau foi, e mafai lava ona fai i ai se faatatau aupito sili ona lelei e lē gata mo lona lelei ae o le silasila mai a le Tamā oi le lagi e ana le meaalofa ua foaiina.”

Saunoa foi Leniu, o le a ia fautuaina lona afioaga ina ia taofia le faia o ni suesuega i le tina e ana le pepe, ma ua o latou masalosalo, masalo o se pepe tafea, ia poo se tina foi ua tia’i lana pepe ae ua tafea atu i le latou nuu.

E oo mai la i le taimi nei e lei maua le tina moni o le pepe lea na maua i Laulii, o loo faia pea i ai suesuega a leoleo i le tina e ana le pepe. Peitai e faamomoiloto se tasi o saunoaga a le tina ia Cilla Sullivan lea ua lē toe ta’ueseina pepe ia na tia’i, ma maua i le lapisi i le uafu i Mulifanua, ma le pepe lea na maua i Laulii.

Saunoa Cilla o si ana fanau, ma ua ia faaigoaina nei alualutoto ma ia ofoina le tuu atu o pepe e na te faia atoa o laua sauniga e pei ona mae’a le pepe lea na maua i Laulii ae o ananafi i le Aso Sa lea na faatoa faataunuuina ai ma teu le tino maliu o le pepe lea na maua i Mulifanua.

Fai mai Cilla e lē faigofie le pepe lea na maua i Laulii, ona ua matuā pala le tino maliu o le pepe, ma na ia faaaogā le foil o le glad wrap e afifi ai lona tino ina ia mafai ona fai lona ofu.

Ua mae’a foi ona faalauiloa e le Komesina o Leoleo, Fuiavailiili Egon Keil, ua maua le tina o le pepe lea na maua i le lapisi i Mulifanua ma o loo taofia e leoleo e valaau lana mataupu i le faamasinoga i le aso 21 o le masina nei lava.