O le aso sa faapitoa mo le faalauiloaina o oloa eseese a atunuu o le Pasefika, ae na matauina le tau leai o ni faioloa a Samoa sa iai i lea nofoaga.
O le CLOUD lea na fausia faapitoa i le taimi o taligamalo a Niu Sila i le Tausinioga o le Ipu a le lalolagi i le Lakapi Iuni i le 2011, o inā sa faatulaga ai lea faaaliga o oloa eseese a le Pasefika, i le Aso Toonai talu ai, 2 o Fepuari.
Sa fetaui lelei le faatulagaina o lenei faamoemoe i le taimi o loo tumutumu ai foi tagata maimoa mai isi atunuu, i Niu Sila a o talimalo lona laumua i Ueligitone i le Taamilosaga o le Lakapi Taitoafitu a le IRB.
Sa vaaia le gasolo atu o le toatele o tagata maimoa poo turisi i lea nofoaga i le Queens Wharf i Aukilani i lea aso e fia maimoa ma faatau foi nisi o oloa a le Pasefika.
O le faamoemoe o le vaega a le Pacific Showcase, e pei ona faamaopoopoina e le Pacific Cooperation Foundation, ina ia oo atu i latou uma o le Pasefika o loo latou gaosia oloa i soo se ituaiga o tomai, poo ni taumafa, lavalava, ata tusi ma ata vali, o oloa mo teuteuga o maota i fafo ma totonu, o oloa mo le teuteuina o tino ma foliga e pei o suauu popo ma suauu e gaosi mai isi laau manogi o le Pasefika.
E lasi le vaai i lea aso, i le tomai ua oo i ai le silafia o tagata, i lanu matagofie o mamanu, aemaise foi o le atamai i le faafoliga mai o mea eseese e tosina gofie i ai le tagata faatau.
E pei ona muai ta‘ua e lei toatele ni aufai oloa a Samoa sa iai i lea aso, o se itu e manatu ua pa‘ū ai lea avanoa lelei mo le faalauiloaina o oloa a Samoa. O le maitau a le sui o le nusipepa, e na o le lua pe tolu ni poloka sa faalauiloa ai ni oloa e gaosi mai Samoa, ae foliga foi o i latou lava o loo aumau i Niu Sila nei, sa faaaogāina lea avanoa, ae lei iai nisi mai lava i le atunuu i Samoa.
Sa faalauiloa foi auaunaga tau felauaiga o ola ma uta i vaa e pei o le kamupani vaa ua pulea nei e Samoa, le PFL, faapea foi le kamupani vaa Amerika a le Matson lea ua latou faaauauina nei galuega tau felauaiga i vaa sa faatino muamua e le kamupani vaa le Reef Shipping.
E toe tatala foi lenei nofoaga i le Aso Toonai, 9 Fepuari, Aso Toonai, 16 Fepuari, Aso Toonai, 2 Mati, Aso Toonai, 9 Mati.
Talosia ia oo atu i lena aso, ua tele mai ni faioloa a Samoa e latou te faaaogāina nei avanoa faaauro e faalauiloa ai i le lalolagi le lasi ma le matagofie o a latou oloa ma faivaalofilima.
