E toatolu ni tagata na maliliu ni faalavelave eseese na tutupu i le vaiaso ua mavae e pei ona faailoa mai i le lipoti tai vaiaso a le matagaluega o leoleo ma falepuipui.
O se alii laititi 15 tausaga le matua o le nuu o Fagalii-uta na maliu ina ua pule i lona ola i le Aso Lua ua mavae. Faaalia i le lipoti a leoleo na lē fiafia lea alii ina ua otegia e lona tina ma alu ai sisi lona ua se‘i tulou.
O se laau e lē mamao ma lo latou fale na maua i ai lona tino maliu. E 3 tausaga o se tamaititi na uma lona ola ina ua sipaka i le eletise lea e faapea mai le lipoti o se uaea eletise ola sa taatia i le fale o le aiga na uu e le tamaitiiti ma fano ai lona ola.
O Fasitoo-uta na tulai mai ai lea faalavelave, ma ua toalua ai tagata ua fano soifua i lenei masina amata o le tausaga ona o le eletise. O le isi faalavelave e pei ona sa auina atu i se tasi o a tatou lipoti na tupu i se nuu i Savaii na sipaka ai se alii talavou sa tautau lona ofu susū i se uaea eletise o loo ta‘i atu ai se moli i se tasi o o latou fale.
I le maliu o se alii talavou o le nuu o Leauvaa tusa nei ma le vaiaso, ua faailoa e leoleo ua molia ai se isi taulealea o ia lea o Savelio Aukusitino 32 tausaga le matua.
O lē na maliu o Emelio Tamara 20 tausaga, lea na maua o taatia i tafatafa o le alatele ma lona ulu na aafia i se manu‘a tuga mai se maa. Faaalia e leoleo o se feeseeseaiga na mafua i se inuga ava malosi le mafuaaga o le faalavelave.
O lē ua maliu sa finauina e lona aiga le lē tatau ona toe faia se taotoga e sailia ai le mafuaaga o le maliu, ona ua mae‘a ona faailoa atu e fomai e ogaoga se afaina o le ao o lē ua maliu.
O le mafuaaga lea na faia ai e leoleo le faatonuga e faia se taotoga faapitoa ona ua molia se tasi i le maliu o lea taulealea, ma o vaega uma ia o molimau a leoleo e tuuina atu i le faamasinoga e finauina ai le faamaonia o le solitulafono.
