Oka! Oka! Se vaaiga matagofie ma le felanulanuai i soo se magaaala o le taulaga i le laumua i Ueligitone, i vaaiga eseese o tagata ma a latou teuga felanulanuai e faaalia ai le faaaloalo e talia le autaalo mo taaloga o le Taitoafitu.
O se aso maninoa ma le vevela ae peitai e lei faavaivai ai tagata i le maimoaina o le taamilosaga sa faatalitali i ai le lalolagi mo ni aso se tele. O le manaia o le vaaiga i togiga felanulanua‘i a tagata na savalia magaala o le taulaga, na fai ma vaaiga matagofie, ona o isi ua fai ofu faaipoipo, o isi ua teu faaAtamu ma Eva, o isi ua lavalava faaseila o vaa, o pailate, o kamuta, kapeteni, inisinia, leoleo, fuimu ma teuga faatelevise (TV characters) e pei o Batman, Spiderman, Mr Bean, ma fitafitatau. O soo se ituaiga o tagata ma manu foi ua fai ai
teuga a isi.
O le isi itu sa matagofie i le faafofoga a le atunuu, o ē e lei maua ni pepa e maimoa ai i le malae, ae sa tapuai lava i maota ma laoa. O le lelei o le galuega faasalalau a le Siufofoga o le Laumua i le faasalalauina mai o taaloga i le Aso Faraile atoa.
Na sili ona mālie le faafofoga a le autapuai i maota ma laoa ona o le logoitino o pesega a aufaipese eseese sa to va ai le faasalalauga o taaloga.
Ae o se tapuaiga na faamalieina ina ua manumalo le ‘au a le atunuu pele i taaloga e lua i le uluai aso o le taamilosaga. Faafetai Manu Samoa le faafiafia mai i le autapuai. Malo le taalo!
