O le Peresitene o le Ekalesia Metotisi Samoa susuga Apineru Lafai ma le Minisita o Taaloga le afioga Loau Solamalemalo Keneti Sio

O le tapenaina o le nofoaga i Faleula o le laumua o le Ekalesia Metotisi mo le avea ma nofoaga e nonofo uma ai le toatele o tagata taaalo mai le Pasefika, na saunoa le Pelesetene o le ekalesia e lei faigofie ona e taunuu le talosaga a le Malo ua faamautu fuafuaga a le ekalesia mo lana koneferenisi masani o tausaga taitasi.

“E faamalamalama atu a’o tatou iai ma le aufaasalalau i lenei aso, e lei faigofie auā ua mae’a ona faamautu bookings a usugafono e malaga mai fafo, ae sa taatia atu i le komiti tumau a le ekalesia mo sana faaiuga”. Na mafua ona saunoa faamalamalama le Pelesetene ona o nisi o tala ua alu i faasalalauga e foliga ai o le ekalesia sa manao e faaaogā le laumua i Faleula e nonofo ai autaaalo.

O le vaiaso ua mavae atu nei na tauaao atu ai e le Pelesetene le nofoaga atoa i le Minisita o Taaloga o le ta’ita’ifono o le komiti o tapenaga o taaloga a le Pasefika. Ua mae’a ona faaleleia uma fale ma ua fausia foi ni falea’oga fou se tolu ma se tasi o maota fou o se tasi o sinoti ma sa faatupe lava e le ekalesia faleaoga fou ae o le sinoti e ana lea maota sa fitaituga foi i le faatupeina o lea galuega.

O le vaegatupe muamua na tuuina atu e le Malo i le ekalesia mo galuega e tapena ai le nofoaga e $2.3 miliona peitai na faailoa e le susuga Apineru Lafai le pelesetene aoao, e lei lava ma na toe faaalu ai tupe a le ekalesia. O le seleni lona lua sa tuuina atu e $1.1 miliona ma o lea vaegatupe e mo le tapenaina o meataumafa o le ti o le taeao mo autaaalo uma ma tagata e vaaia ‘au taitasi poo official.

“Ou te fiafia e faailoa atu ua matuā lelei ona tapena uma fale ma nofoaga taitasi ma ua faailoa mai foi e le Malo lo latou faamalieina atoatoa i tapenaga”, na saunoa ai le Pelesetene. O ki o fale uma ua tauaao e le Minisita o Taaloga lea sa ia momoli le faafetai i le ta’ita’i o le ekalesia aemaise o faafeagaiga uma ma tagata faigaluega a le ekalesia sa lotolotoi i le faia o tapenaga. E 24 atunuu o le a amata ona taunuu a latou autaalo i le vaiaso nei.

O le aulakapi taitoafitu mai le motu o Tokelau na taunuu i le vaiaso ua mavae. O le Aso Sa 7 o Iulai 2019 o le a tatala aloaia ai taaloga i se sauniga o le a faia i le malae o taaloga le Apia Park. 

O le sauniga foi lea o le a faafiafia ai nisi o kolisi maualuluga a ekalesia ma le Malo ua tuu faatasi mo le faatinoina o faafiafiaga o loo fesoasoani i ai ni faiaoga popoto mai Saina e talenia i le a’oa’oina o pese ma siva mo ni sauniga tetele.