E tele ni mataupu tāua na saunoa i ai le Sui Faipule fou o le Itumalo faaalalafaga o Faasaleleaga Numera 2, Afioga Namulauulu Papalii Leota Sami Leota i lana lauga faataupou i le Palemene. Na ia faamamafa i lana sunoaga le sao tāua o pulega mamalu a Alii ma Faipule i totonu o afioaga taitasi i taimi o a latou filifiliga i sui e tauva i faigapalota.
Saunoa Namulauulu, “O le tasi lenei meaalofa tuusa’o a le Atua ia Samoa, o lana faamatai, e pulea ma ta’ita’iina ai Samoa ma ana Faigamalo, o le molimau ola o loo nofo filemu ma fealofani ai pea Samoa i le sili atu ma le 3000 tausaga ua mavae seia oo mai lava i aso nei.”
“O le atugaluga ona e lē o iai se vaega o faatāua ai le Tulafono le Aiātatau a Alii ma Faipule e fai ai a latou faaiuga tonu ma talafeagai i totonu o nuu ma afioaga.”
“E maualuga lo’u talitonuga, o le Malo o Samoa ua faavaeina i le Atua, ae salani i tu ma ana aga i fanua faasamoa.”
“O le talosaga, se’i tagai ane le Malo i le faatāuaina pea o le pulega faamatai aemaise i taimi o a tatou faiga filifiliga, ou te lē tau faailo, o le Maota lenei, o le Maota o Matai ua filifilia mai e Samoa atoa, o le Maota mo tagatanuu o Samoa uma.
Sa fesiligia le Palemia i sona finagalo e tusa o le faaoioi a le faipule filifilia o Faasaleleaga Numera 2, ae na tali Tuilaepa o se mataupu e tāua ae peitai o loo faia faiga filifiliga a Samoa i tu ma aga faatemokarasi e faatāua ai le aiātatau a tagata e filifili saoloto ai ma e lē faigofie ona faia se tulaga e pei ona folasia e le faipule fou na manumalo i le palota laititi a Faasaleleaga numera ina ua tuumalo lē sa avea ma faipule le tofa Pa’u Sefo Taumata Pa’u.
E manino i le finagalo o Namualauulu o le pule mamalu a Alii ma Faipule o nuu a autasi loa i se sui ua lagolago i ai e tauva i se palota, e ao ona usitaia uma e tagata o le nuu. O loo i luma o le faamasinoga le tagi a se tasi o sui sa tauva i lea palota laititi ona o le faateaina o ia ina ua lē usitai i le finagalo o matai e tasi le sui e tauva ma lagolago i ai. O lea sui sa tauva mo le vaega faaupufai o le Samoa First Party i le palota laititi na filifilia ai Namualauulu Sami Leota.
E lē gata i lea mataupu sa saunoa i ai le sui faipule ae sa saunoa faafetai foi i le Minisita o le Ofisa o Faigapalota, “Lau Afioga i le Fofoga Fetalai, e momoli atu le agaga faafetai i le Malo, auala atu i le Afioga i le Minisita o le Ofisa o Palota, ona o galuega lelei uma sa faia i nisi o Tulafono ogaoga ma le ma’ale’ale e lei leva ona pasia atu i lenei Maota.”
“Amuia foi lenei Itumalo, ua faamauina i Talafaasolopito o Tulafono o Faigapalota, ua latou asaina le gasū o le taeao, i le uluai faatinoina o manaoga o ia Tulafono, o Tulafono sa fulifuligata faalaaumamafa i le tofa ma le faautaga alualu mamao, auā e ui lava sa tetele i Pesega, ae sa matua a i le oo.”
“E tele ma anoanoai vaega lelei o nei Tulafono sa o matou maitauina i la matou faigapalota laititi.”
“O le lē toe iai o ni fale palota faapitoa i Apia nei, ua tafiesea ai le laumea faapaia mata sa faavaatu’ia ai sui tauva e ala lea i le manumalo mai i Savaii ae toilalo atu i Tumua nei.” “O le uluai palota lenei ua ave ai le faamuamua mo le au matutua, ma le mamalu o le atunuu e lē atoatoa le malosi, aemaise i latou o le a fou malaga.”
“Pau si a matou tuaalalo faamanatu, ia lava le taimi e faalauiloa ai e le tatou Ofisa lea vaega auā le nofo silafia o tagata palota.”
“Ina ia faatinoina e le Ofisa o Palota le iloilo toto’a o le agavaa o sui tauva ina ia tusa ai ma le tulafono. Ina ia taofia ai le anoano o le mau vevesi o loo tulai mai i taimi o faigapalota, aemaise i latou o loo latou faatupu vevesi ma faia nei solitulafono ma le iloa.”
