Tagi masūsū ma faatoese i le teine Ausetalia na ia faamalosi

O le taulealea o Terry Faati ua poloaina e loka ma taofia e faatali le lauina o lona faasalaga

Sa malaga tafao i Samoa se tamaitai mai Ausetalia sa faamautu i le faletalimalo o le Taumeasina Resort ia Novema o le tausaga ua mavae 2018. O le tamaitai e masani ona tafao i Samoa ona sa fai se la uo ma se alii Samoa. 

O lana tafaoga i le tausaga na tea nei na feiloai ai ma nisi o ana uo ma le taulealea o Terry sa tafafao i se fale kalapu ma agai ai loa e momoli le tamaitai i le faletalimalo sa faamautu ai. Sa taunuu ma toe faaauau le latou evaga lea sa inu ai i le potu sa nofo ai le tamaitai. 

Na faaalia e leoleo o uo a le tamaitai sa inu i fafo ane o le potu lea sa iai ma lē ua molia. Na alu alu le evaga alu ane le tamaitai ma moe i luga o le moega o le potu sa nofo ai, ma o le avanoa lea na tupu ai ma le gaioiga solitulafono na faia e lē ua molia.

Na molia e leoleo Terry i le solitulafono o le faiaiga faamalosi (rape) ma e tasi le moliaga. O le Aso Faraile na tea nei na faatulaga e valaau ai molimau ma sa malaga foi i Samoa le tamaitai mo le faamasinoga lea na malaga ai ma lona tina ma se tasi tamaitai o lona aiga mai Ausetalia. Na valaau le mataupu o le a fofogaina ai e tuuina atu ai le talosaga a le loia a Terry sa fesiligia ai le pitolaau a leoleo i le suesueina o lē ua molia i le faia o lana faamatalaga poo le causing statement. O le faaiuga o le talosaga na faamalieina le faamasinoga sa mulimulitai leoleo i ala o le tulafono ma talia ai le faamatalaga a Terry na tuuina atu i leoleo, le faamatalaga sa ia faamatala ai le mea na tupu.

O le mae’a o le lauina o lea faaiuga ae tolo le mataupu mo se itula, na faailoa ai e le loia a lē ua molia ina ua toe amatalia taualumaga a le faamasinoga ua sui le tali tetee a Terry i le moliaga i lona ioeina o le moliaga o le faiaiga faamalosi. Na talosaga ai loa lē ua molia mo se avanoa e faia ai lana faatoesega i le tamaitai na aafia. Na faailoa e le faamasino le susuga Leiataualesa Darrel Clarke e lē masani le faamasinoga ona ave se avanoa faapea i se tagata molia e fai ai sana faatoesega poo se faamatalaga a’o faatali se aso e lau ai le faaiuga, peitai ona o le leai o se teena e le itu a leoleo aemaise o le tamaitai na aafia e toe foi ma lona aiga i le aso e sosoo ai o le mafuaaga lea o le tuuina atu o le faatagaga.

Na amata lava le faatoesega a Terry o masūsū ma toulu ona loimata. “Faamolemole (ta’u le igoa o le tamaitai) faamagalo mai so’u sese, ua ou iloa e leaga la’u mea na fai ia te oe”. Na faatoese foi lē ua molia i sui o le aiga o le tamaitai sa iai i le potu faamasino ma na ia faailoa ai lona alofa tele i le tamaitai na ia faia i ai le solitulafono. Na mae’a le faatoesega ma faatonuina loa e le faamasino le nofo taofia o Terry e faatali le aso 24 o le masina fou o Iulai e lau ai sona faasalaga. Ua tapu i se poloaiga a le faamasinoga ona faailoa le suafa o le tamaitai poo se isi lava faamatalaga e iloagofie ai.