Le Afioga ia Anae i lona maota i Vaivase i le taeao ananafi

“O le mea moni ou te ta’u atu, faasa’o le faasalalauga lea ua fai, ou te lei te’a ma le nuu, o lo latou tootoo lea na avatu ou te lē alu ese ai ma le nuu, e iloa se tagata ua faate’a ua alu ese ma le nuu ua na soli le faavae, ma e lē faate’a e ni nofosuafa se matai o le nuu, e lē faate’a e se toalua o faaaloaloga se suafa o le nuu, e sa i le faavae. Se’i vagana ua tasi le toafā, mea na e ta’u o le afioga tutasi.”
O le faagau lē malie o Anae Pita ona o le faatalanoaga na faia ma le afioga ia Nanai Faamanū i le lomiga talu ai o loo faailoa ai e Nanai Faamanū, mea sa tutupu lea ua mafua ai ona vaeluaina Falelatai. “O le ala lea o le faia o le faaiuga a le nuu e faatete’a Anae Pita ma Anae Mati.”
Na faailoa e Anae Misa Pita Anae e lē o te’a ma Falelatai. Na faailoa foi e Anae Pita i le taeao ananafi, e sese foi upu e faapea ua alu atu soli le alofi o le nuu. “E lē mafai ona faia se alofi se’i vagana ua ou iai ona faatoa atoa lea o se mea e ta’u o le alofi. Faasa’o le upu lea e lē o se alofi o aiga, o le alofi lea na fai toatolu, e lē o se alofi, e lē o iai Anae, ai lava se latou inuga’ava o le taeao.”
Sa saunoa Anae na te lē soona tautala i se mea leaga o lona tamā o le tagata sa faia le nuu ma e ola puipui foi i le pua’ina atu i fafo, e aafia ai le faavae. Na faailoa foi o lea ua fai le latou faiganuu, ma e mafua mai i tagata e taumafai e faasese mea o le nuu.
O loo faapea mai, o loo iai mea faalilolilo o loo faia, o nisi o ia tulaga e aofia ai seleni o taulaga, o aitalafu i faletupe soonafai.
Na ta’ua foi e Anae Pita, “O le matou faiganuu lea ua fai o le mea mai le Atua, o le faavae o mea uma i lo matou faiganuu fou o le tausiga o le filemu, ma le atina’e o aiga ia sologa lelei, o loo oi tagata, ae o lea lava e natia.” O tulaga ia sa manatu Anae e fia faamalamalama mai, ma o loo taumafai i ai i le nuu fou ua ia faavaeina, ae na ia ta’ua e toe foi lava le nuu i le lelei. O le taimi nei ua lua faiganuu i Falelatai, ina ua o ese le aiga sa Anae ma nisi o le Aiga Sa Misa ma faaveina loa lo latou nuu fou e oo mai i le taimi nei. O le Aso Toonai la ua mavae sa toe faaa’e atu ai e le nuu fou lea nisi o matai sa faate’a e le nuu a’o tasi.
O loo ua faatino foi tapuaiga i le maota o Anae Pita i Ulusagogo i le taimi nei. Sa fesiligia foi i lea itu, pe aisea ua lē omai ai faatasi pea i le malumalu o le EFKS faatasi ma le isi nuu. Na saunoa mai Anae, “Ou te musu i vevesi le nuu, ae tatou te toe foi lava i le falesa.”
O loo faatūtū lava le lē fiafia o le Afioga Anae ia Nanai Faamanū, ma manatu ai e tatau ona faasa’o le mataupu. O le faaiuga foi a le faamasinoga na ta’ua e Anae e lē aiāina e le nuu tofiga a aiga, faato’a ta’ua lava le pule a alii ma faipule pe a tasi le aiga i le faaaloaloga e sau i totonu o le nuu.
O le Aso Tofi o le vaiaso nei lea o le a fai ai le soalaupulega i le Faamasinoga o Fanua ma Suafa a itu nei e lua e faatatau i le talosaga a le itu a Nanai Faamanū ma isi, e taofia le faiganuu fou, ona e aiāina i lalo o le tulafono, e lē tatau ona lua ni faiganuu i se nuu e tasi.
O le saunoaga a Anae o lona tagata o le tagata o le Faavae ma o upu mo’i ia e tautala mai ai. Sa ia faailoa o ona tuaa ua mavae sa ta’ita’ia le nuu, faasologa mai i lea augatupulaga ma lea augatupulaga seia oo mai ia te ia.
E manatu Anae a iai ni mea ogaoga o le nuu e tatau ona fesili atu ia te ia. Sa ia faailoa o lona tagata o le tagata alofa ma faimeatonu, ma le tagata e tausi le nuu i ona faavae, ma o ia e tupu mai i le Faavae.
Sa tuuina atu foi le faamatalaga e faapea o le feeseeseaiga lava ia i lo laua va ma Nanai Faamanū, peitai, o lea ua aafia tagata lautele ma ua lē mautonu foi poo le fea e sa’o, o upu foi mai nisi o aiga, o loo tu ese mai se’i tilotilo poo le fea le itu e fai i ai lenei mataupu ona o popolega i le aafiaga o tagata lautele i le va o taitai lava ia.
O le mataupu lenei ma lenei faatalanoaga e afua mai ona o le tala na tusia e tusa ai ma le faatalanoaga ma Nanai Faamanū i mea na tutupu, sa saili foi le itu a le afioga ia Anae Pita i lea lava vaiaso i sona finagalo, peitai e lei fia talanoa mai.
O lea ua manino le mata o le vai, ua lua faiganuu a le afioaga o Falelatai i le taimi nei, o loo manino foi le faatofala’iga a le afioga ia Anae, o ia e lei faate’aina ma le nuu. O le a tulimataia taualumaga o le mataupu e pei ona loma ai le soalaupulega i le va o nuu e lua ua iai nei i totonu o Falelatai.
I le feiloaiga ma le afioga ia Anae Pita, na sasaa mai ai le faanoanoaga o le afioga ia Anae, i le tusitala o le Samoa Times, peitai sa tali malu pea, i le manatu pe tino ma toto tau Falelatai pe leai, o le tautoga i le faatinoga o le galuega e tatau ona lagonaina ma faailoa aafiaga o tagata lautele, ona o le va o ta’ita’i ma le nofo a faaaloaloga o le afioaga.
Sa taumafai foi e faatino le galuega ina ia paleni itu e lua. O le mafuaaga lea o le feiloaiga ma le afioga ia Anae Pita se’i aumai sona finagalo, i le mataupu e pei ona lomia e le Samoa Times i le lua vaiaso talu ai.