Ua faamavae aloaia ai nei Lemalu Herman Retzlaff mai le tofiga o le Loia Sili o le Malo o Samoa mai le fa tausaga sa ia tauveina ai lenei tofiga maualuga o le Malo. O le vaiaso na te’a nei, na tauaao atu ai e Lemalu lana tusi faamavae agai i le Alii Palemia, susuga Tuilaepa Dr Sailele Malielegoi. Na talia ma le faaaloalo e le Alii Palemia le faamavaega a Lemalu ona o mafuaaga tatau mo le lumanai manuia o Lemalu ma lona aiga.
Saunoa le Alii Palemia, e na te faaaloalogia tele le faaiuga a Lemalu ua faia nei ina ua faailoa atu e Lemalu mafuaaga ua faia ai lana faamavaega. O Lemalu sa galue ai mo le Loia Sili a Samoa i le fa tausaga talu ai, e lei mae’a ai le isi tolu tausaga o lana paeaiga lona lua a’o lea ua faamavae.
Na faailoa e Lemalu i le tatou nusipepa lona faafetaia o le avanoa e pei ona sa filifilia ai o ia ma Loia Sili o le Malo o Samoa, ma e le māmā ia te ia lea avanoa. O le fa tausaga foi sa ia galue ai, o se taimi umi lea na fai ai sona sao mo le Malo o Samoa. O se tulaga aloaia foi ma le maualuga na avatu e le Malo o Samoa ia te ia, o lea na te faafetaia ai le ta’ita’i o le atunuu ma le Kapeneta ona o le faatuatuaga na tuuina atu i lona tagata.
O se tasi o ofisa loia i totonu o le Malo o Niu Sila, o le Crown Solicitor’s South Auckland Office, o loo faatamoe ai e Kayes, Fletcher ma Walker (KFW) lea ua faamoemoe Lemalu e galue ai i totonu o Niu Sila. Saunoa Lemalu, e lei faigofie lana faaiuga ua faia nei ona o le manatu alofa i ona tagata peitai sa tatalo lava i le faasinomaga a le Atua mo le isi laasaga o lona aiga.
Ma o se faaiuga o loo ave i ai le faamanuia a le ta’ita’i o le atunuu le Afioga i le Alii Palemia. O se tasi o tamaitai loia o loo galue ai i le ofisa o le Loia Sili i le taimi lenei, ae e musu e faailoa lona suafa, na ia faamatala ai uiga tausaafia o Lemalu i totonu o le ofisa, ma o se tagata foi e matuā faaaloalogia e le ofisa o le Loia Sili.
E lē taumate o le a misia e le latou ofisa le susuga ia Lemalu i le tele o taimi o le latou galuega.
E pei ona silafia o le tamā o Lemalu, o Misa Telefoni sa avea ai foi ma Loia Sili o le Malo o Samoa a’o lei liliu ane i faiga faapolokiki. Na teena malosi foi e Lemalu ni faasalalauga e faapea ua mafua ona ia faamavae mai i le Loia Sili ona ua lelavā ufiufi faiga piopio a le Malo o Samoa. Na faamanino e Lemalu, e leai lava se isi mafuaaga ua ia faamavae ai ae ua ia manatu mo se isi luitau o le soifuaga aemaise ai o le mafuta ma faaaogā ai si ana fanau i Niu Sila.
O Lemalu Herman Retzlaff na filifilia ma Loia Sili a le Malo e suitulaga ai ia Aumua Ming Leung Wai.
O loo faaauau pea ona galue ai Lemalu ma Ofisa Sili o le Malo o Samoa auā le tauaaoina o galuega a le ofisa i le sui ofisa sili seia aulia atu le aso 20 o Mati 2020 a’o tapena ai le toe faasalalauina o le avanoa Loia Sili mo le Malo o Samoa.
