Faamaonia le alu ese o Aferika i Saute mai le TRC

Springboks World Cup Champions

E pei o se pa o se pomu niukilia le leoleoā o lenei ripoti ina ua faamaonia i le faaiuga o le vaiaso ua tea, le alu ese ai o Aferika i Saute mai tauvaga a le Itulagi i Saute ma le All Blacks, Ausetalia ma Argentina.
O le mae’a ai o le RWC 2023 o le a suia ai loa ma le itulagi e tauva ai le Springboks. O le a pipii Aferika ia Europa ma faaopoopo ai le ‘au i tauvaga a le Six Nations ma atunuu malolosi a Europa o Egelani, Aialani, Sikotilani, Uelese, Farani ma Italia. O le tauvaga fou o le a faaigoa o le Seven Nations.
Ana lē seanoa feagaiga ua uma ona sainia mo le Super Rugby semanū e vave oso Aferika. Ae o konekarate o le Super Rugby o loo iai nei e saisaitia ai Aferika i totonu o le The Rugby Championships (TRC) e faaiu i le 2024.
O le alu ese ai o Aferika o le a atili ai ona faaletonu le taaloga mo le All Blacks ma le Wallabies. E mafua lea ona e ao ona tauva Niu Sila i taamilosaga e pei o le Six Nations – e lelei uma ‘au. Ae o lea o le a totoe na’o Ausetalia ma Argentina. O ‘au ia e lua e lē o tutusa ma le All Blacks i le taimi nei, na’o Aferika i Saute o loo fa’atautu’i ma Niu Sila i taaloga faavaomalo…..
O le autu o le alu ese ai o SA o le seleni. E tele naua le totogi o le a maua e tama taalo i totonu o le Six Nations nai lo le tupe o loo maua i le TRC. Ae o le isi tulaga pito sili ona tāua mo tama taalo a Aferika, o le uumi lea o taimi e malaga ai i vaalele i le va o Ausetalia ma Niu Sila.
O le auai o Aferika i Europa e faapuupuu ai ia feoa’iga – ma e tutusa le taimi i Cape Town ma Lonetona e ui e ese itulagi e iai. E faafaigofie ai tulaga faatelevise mo le faasalalauina o taaloga. Ae o le a sefe ai foi ma le tele o taimi i totonu o vaalele.
A’o Niu Sila ma Ausetalia, o le a taumafai nei e faaopoopo Iapani i le TRC mai le 2024 poo luma foi. O le a talanoaina foi ma le ofi o se ‘au tuufaatasi a le Pasefika i lea li’o. Tusa o ia tulaga ae e lē tutusa lava ma le auai o Aferika. O le toesea ai o le Springboks o se tulaga aupito sili lea ona faaletonu mo le lumanai o le lakapi mo Niu Sila ma le All Blacks. O le a atili ai ona a’e i luga le lelei o SA ma ‘au uma a Europa.