Na soisoi le taitai o le atunuu, ina ua fesiligia i sona finagalo, i le avea ai o ia ma Tagata o le Tausaga poo le Person of the Year a le nusipepa a le Samoa Observer i le faaiuga o le tausaga.
O le tali a le Palemia, ona o finagalo o nisi tagata ua o latou faaalia lo latou teena o le faaiuga poo le filifiliga a lea nusipepa ua filifili ai le Palemia. Fai mai le tomumu a nisi, e lē agavaa ai le Palemia, ona o le Palemia o le faamatua o “corrupt” poo se tagata silisili ona fai mea leaga pe a tuu i se gagana faigofie.
“O la’u faauigaina o le faaupuga lena o le corrupt i le gagana peretania, o se tagata e faia ni mea leaga i le tatou gagana, ia poo se tagata e na te faia ni mea e manuia ai ia ma lona aiga faataitaiga gaoi tupe e manuia ai ia ma lona aiga.”
“Ae o le fesili, o ā la mea ia ou te faia?”
Na talanoa le Palemia i le taumafaiga a le malo ina ia faatupe le ‘afa miliona tala e totogi ma faaleleia avanoa sikolasipi e faaleleia ai aoaoga a le fanau ina ua sui mai faiga masani a le malo Niu Sila.
“E lē faia e ni tagata ni mea e faaleleia ai aoga a le fanau, e lē faia e ni tagata corrupt ni fesootaiga e faaleleia ai telefoni, e lē faia e ni tagata corrupt le faaleleia o faatalanoaga ina ia maua ai ni avanoa faigaluega a tataou fanau e galulue ai i atunuu i fafo.”
“E lē faia foi e ni tagata corrupt ni fesuiaiga lea ua fesuiai ai taavale, lea ua manuia ai nei tagata uma o le atunuu, e lē faia e ni tagata corrupt ni televise e faatu i le atunuu, ina ia fiafia tagata i nuu i tua e fiafia e matamata mai iai.”
“Afai ae agai e suesue tagata nei e faia faaupuga nei ma tuua’iga nei, ona e maua ai lea o le tulaga matautia, o isi oi latou ia e faia upu nei, e gaoi, o tagata lava e corrupt e gaoi, toe faaleaga tagata.”
“O tagata ia e gaoi, e manatu e faapena foi isi tagata pei o latou.” “O le ala la lena e ala ai ona tuua’ia ai nisi ona o la lava e manatu e pei o latou.”
Na saunoa le Palemia ma ia faatusatusa o le uluai taimi lenei mai i le faigapalota talu ai, ua atoa ai le 40 o nofoa o le palemene o sui uma o le HRPP.
“O le ā le faauigaina o lena mea? E ala ona toatele sui ua palota mai i le vaega faaupufai lenei, ona o loo malamalama lelei le atunuu i le taumafaiga a le vaega faaupufai lenei, ia puipuia aiātatau a le atunuu ae lē gata i lea o le lelei o le atunuu.”
Saunoa foi le Palemia o le toatele oi latou o loo lafo faaupuga ma faifai mai i le malo, oi latou o loo alala i fafo.
“Ae afai foi tou te o e sailiili lelei ma suesue tagata ia e lafo nei faaupuga faapea mai ou te corrupt, na outou iloa lea o tagata na aupito sili ona gaoi, ma fai tala leaga, tala pepelo, e oo lava i totonu o latou aiga e faavevesi,”
“O lea foi ou te iloa uma lava le vaega lea, ae faapea latou, ou te lē o iloaina. Ou te iloa uma lava.” Saunoa le Palemia, ana o ia o se tagata leaga ua leva ona ia faailoa igoa ma suafa oi latou ia o loo faia nei faamatalaga faasaga ia te ia ma le malo.
“Ae e te iloa la le mea e oo iai, o le tele ia o o’u aiga, tagata e matou te tau iai, aemaise foi o tagata e latou te lagolagoina le malo, e iai foi la ma tagata e leaga ulu, o lona uiga e sue atu ua ono futu le maualalo.”
Ta’ua e le Palemia o le mafuaaga foi lea e alofa ai ia i latou o loo faia ia faiga, ma e lē afaina tele ia te ia, ae ua na’o lona ‘ata lava iai i nei mau faamatalaga.
