O le masina o Oketopa ua avea ma masina lanu piniki i Samoa e faatino ai tala’iga o le matautia o le gasegase o le kanesa. O se gasegase faigata tele auā o le itupa o alii o le kanesa o totoga sa le prostate cancer, ae o le ituvai o tamaitai o le kanesa o le susu poo le breast cancer. E iai isi ituaiga o kanesa ae e pei o le lua lava lea e tele ina aafia ai soifua pe a tuai ona vaai se foma’i ma fai loa ni togafiti.
O le tamaitai tausi soifua o Afatia Palaamo o Toamua na valaau e lona matai ma faamanava ai ana galuega i le ola nei i le vaiaso muamua o Ianuari o le 2019, ona o le kanesa na aafia ai lona susu agavale. O le tausaga e 2009 e pei ona faamatala Afatia a’o soifua na ia iloa ai se patu poo se lump i lona susu ma ia agai ai e vaai se foma’i.
O le vaaiga lea na amata ai loa ona sailiili matagi ma iu ina manuia ma malaga ai i Niu Sila e faia ai togafitiga. Na foi i Samoa uma manuia peitai o le sefulu tausaga talu mai ona togafitiga i Niu Sila na taunuu ai i se tulaga faigata ma toe agai ai i Niu Sila peitai ua tulaga faigata ina ua oo le malosi o le kanesa i lona maeaalio poo le spine ma faigata ai ona savali.
O le faaiuga o le vaiaso ua mavae na faia ai toe sauniga o Afatia i lana ekalesia EFKS i Toamua ma lagomau ai i lona aiga. O molimau o lona soifua galue ma lona olaga i totonu o lona aiga sa iloa ai o se tamaitai e tautua lelei i ona uso ma tuagane ma fesoasoani malosi i a’oga a fanau a ona uso ma tuagane.
O se tamaitai sa avea ma se tagata taaalo malosi mo le aulakapi a tamaitai o le atunuu le Manusina. O se tasi o taamilosaga lakapi taitoafitu i Hong Kong na malaga ai ma le Manusina ma sa filifilia ai ma Afatia. O le molimau lea a le Minisita o Fesootaiga le afioga Afamasaga Rico o se faiaoga o le Manusina i le tausaga e 1988.
Na molimau Afamasaga o Afatia o se tagata tinou ma taaalo malosi ma o le isi lea faamoemoega o le aulakapi a tamaitai o Samoa.
O Afatia na faauu ma avea ma tausi soifua faamauina i le tausaga e 1989 ma e maliu nei ua 30 tausaga o tautua i le Malo ma le atunuu i lona tomai faatausi soifua. O se tamaitai e tausaafia e lona aiga aemaise o ana uo i le galuega.
O lana fautuaga malosi i tamaitai a’o lei maliu, ia aua ne’i nofoai ae vave vaai se foma’i e togafiti ai le kanesa. O lana molimau e vave maua le fesoasoani ma togafiti le gasegase pe a vave iloa auga vaaia o le kanesa.
