O le ava i mātua e faafualoa ai le soifua o le tagata e tausi matua. O saafiafiga alofa o alo ma fanau na o latou tapena ai se patī faalilolilo na matuai faateia ai nai o latou mātua i le Aso Toonai, aso 9 o Fepuari.
Na faamatumulia se tasi o hall tele i Wacol i le itu i Sisifo o Brisbane i le faamanatuina o le 65 tausaga o le tofa ia Itaotemai Atonio Teni mai Leulumoega & Nofoalii faapea le 70 tausaga o si ona tausi le tina poo le fetalaiga ia Seumanu Togitoto Ana Teni mai Salelologa & Leulumoega.
Sa taitaia le sauniga e le afioga ia Patele Epati Tamati, o le Puleaga Katoliko a Kuiniselani. Sa fai ma fofoga o le aso se tasi o le nofoaalo, le afioga ia Toleafoa Sefo Teni ma sa faatumulia lea faamoemoe i le auvalaaulia aemaise alo ma fanau faapea tauaiga.
Na fai ma sui o le auvalaaulia le tofa ia Motuopuaa e faafetaia aiga ona o faaaloaloga ma tapenaga matagofie.
O se lagona faafetai na puna a‘e i finagalo o mātua ona o se faamoemoe na lava saunia sa faateia ai i laua e nai o la alo aemaise o le tuufaatasia o nisi mai le Ekalesia Katoliko, Divine Mercy a Inala ma Darra, aiga ma uo.
Na ta‘ua e le fetalaiga ia Seumanu Togitoto na lilo a i sona manatu lenei faamoemoe auā sa lei manatu lava i ai, ma sa leai foi nisi o le fanau e ano ane pe tau faaiteite foi ma talanoa ai tamaiti.
Na matuai faamalieina le aofia i taumafa sasala manogi sa tapenaina e le Uncle Sam’s Take Away, tofa ia Poulava Sam ma le tausi ia Lorna Matautia ma le aufaigaluega.
O alofaaga ma faamanuiaga mo lua aso soifua Itaotemai Atonio Teni ma Seumanu Togitoto Ana Teni. Ia foai ma faaopoopo pea e le Atua nisi tausaga se tele tatou te mafuta ai i lenei olaga lē tumau.
Faamolemole ia faamagalo foi ni sese o i matou le fanau i la tatou mafutaga. E le galo la oulua tausiga alofa ua matou ‘ae‘ae ai nei i manuia e tele.
Alofaaga lē mavae mai le lua fanau ma tautoga faapea fanau a fanau, aiga ma uo ma le afioga ia Patele Epati aemaise le Ekalesia Katoliko.
Alofa atu foi si ou uso ia Asomua Filo Fetoai ma le nofoaalo.
