O le molimau a le tina matua ia Suipi Ainofo ua 80 tausaga le matua o lona soifua, e ese le faigata sa iai la aso, i le taumafaiga o aoga a fanau, o le atinaeina o aiga, ma le tautuaina o le lotu. E leai ni galuega ae tagi lava i lima ma le fatu le atiaeina o le aiga.
I totonu o ia faigata, sa lē faavaivai ai laua ma le tamā ia Feagaimalii Pele Ainofo i le atinaeina o le laua aiga e ala i le galuegaina o le faatoaga, o le fagota i le sami e saili mai ai tupe e tautua ai le aiga ma taumafai ai aoga a le fanau. O le tele o taimi e la’u ai le laua faatoaga i le maketi, ma nofonofo ai lava e faatau tau talo, seiloga lava e uma talo faatoa alu foi i le aiga.
I totonu o le afioaga o Saanapu sa nonofo ma galulue ai ma le tamā ma taumafai le aiga, na’o le pau lea o le ulugalii e tau faatusatusa le lelei o le laua faatoaga ma tagata maualuluga poo tagata faipisinisi a lea nuu.
O le faatoaga na faatau ai le la taavale ma ua siitia ai le aiga i se isi tulaga maualuga, auā o aso la a maua le taavale a le aiga, o se aiga milionea. Na fai foi le aufaigaluega a le toeaina ma le loomatua i le faiga o le maumaga, ina ua siitia le atinaeina o le faatoaga i totonu o le nuu.
i le faamanatuina
o lona 80 tausaga
O le galulue punouai ma le lē faalogologo tiga o le tina ma le tamā ia Feagaimalii Pele Ainofo i la aso, na faamanuia ai se tasi o laua alo i galuega sa galue ai ma ua maua ai se isi alagatupe i totonu o le aiga e fesoasoani ai mo le aiga.
E toaiva o laua alo, ua maliu le toatasi ae toavalu o loo totoe, o Faaleo Ainofo, Olaimaleva Lauese, Lauiula, Seve Selota, Faalanu, Lesa Alo Ailaoa, Sarai ma le tamaitai ia Tafu. Ua faamanuiaina e le Atua le tamā ma le tina ma le fanau, ma ua malaga mai ai i Niu Sila nei ma nonofo mau ai auā lava le manuia lautele o le aiga.
E toatolu alo ole tina ia Suipi Ainofo ua galulue faifeau i totonu o le galuega a le Atua, e pei ona iai le susuga i le faafeagaiga ia Pastor Seve Selota Ainofo, o le faletua ia Lauiula, o le faletua ia Faaleo, ma o le ata vaaia ia o manuia o le Atua sa taoto i totonu o le aiga a’o laua asaina le gasū o le taeao ma le lavelave o faigata auā se manuia o le aiga ma fanau i le lumanai.
O le Aso Toonai na patipatia ai e le toatele o aiga uo ma ē masani le atoaga o le 80 tausaga o le tina ia Suipi Ainofo i le Maota o Samoa i Magele.
Na auai le tele o lupe faalele o le afioaga o Saanapu o loo galulue i tovine eseese a le Atua, e molimauina le lelei ma le faamaoni o le Atua i le soifua galue ma le soifua tautua o lenei tina i totonu o lona aiga faapea le ekalesia.
O le susuga i le toeaina o le matagaluega i Aukilani ia Rev Matafala Lesa sa ia taitaiina ma momoliina lapalapa o malo e ala i le viiga ma le faafetai i le Atua, faatasi ai ma lana molimau i le soifua tautua aiga ma le tautua lotu o lenei tina i totonu o Saanapu.
O se tina e tumu i le loto alofa, e tumu i le osi aiga ma le tautua lotu, e le ola faalolo ae sue mea iai tagata, auā foi o se tina e galue mo le manuia o lana fanau ma lona aiga. Lea ua atoa le 80 tausaga o lona soifua, ma o le ata manino lea o le alofa o le Atua i le tina e galue punouai mo lona aiga ma le Atua e faalevalevaina ai aso o lona soifua.
O le matagofie o le faamanatuina o le aso soifua o le tina ona sa auai mai ai le Sa’o o le nuu a’o le tamā foi o lea aiga le afioga ia Anapu Aialii ma lona faletua ia Tafafunai Tavai. O le susuga ia Falefata Onosai sa ia faafeiloaiina le mamalu o le auvalaaulia, a’o le susuga ia Lesa Lance Ainofo sa fai ma fofoga o le po.
O le tofa ia Lesa Gary sa fai ma sui o le fanau a le tina e tu tootoo i le taimi o faaaloaloga.
O Suipi Ainofo na soifua mai i le afioga o Pu’apu’a i Savaii, ona see atu lea ma toe nonofo i Salealula, ma ona mātua ia Salio Meli ma Seu Malo. Na toe malaga mai ma nonofo i Salamumu ina ua afaina Saleaula i le lava, ma o iina sa aoga ai loa i le aoga tulagalua a Salamumu ma faaauau ai ana aoga i le Avoka.
O le tuafafine o lona tamā ia Tiresa ma le faifeau ia Setu sa galulue faifeau Metotisi, ma sa tele ai lona taimi sa mafuta atu ai ina ua nofo ma fai ai lana aoga. Ina ua gasegase lona tamā i Salamumu ma o lea sa toe foi mai ai loa i ona mātua moni ma faaauau ai lana tausiga seia oo lava ina faatasi atu isi ana manamea ia Feagaimalii Pele mai Saanapu seia oo mai lava i le taimi na valaauina ai e le Atua le soifua o le tamā.
Ua tupu ma ola le aiga o le tina i totonu o Niu Sila ma Samoa e pei ona iai fanau o lana fanau e 29, a’o fanau o fanau o lana fanau e 25 tamaiti ma o se aiga mautu ma mausali i le alofa ma le agalelei o Iesu.
Ua faigofie nei aso ona ua maua uma galuega a le fanau ma a latou fanau ae o la aso sa fai toalua lava na’o laua ma le tamā le tausiga o le aiga.
