Simaile Faalogo, Minisita Hon Aupito Su’a W Sio ma nisi o le aufaigaluega a le Work and Income

Simaile Faalogo, Minisita Hon Aupito Su’a W Sio ma nisi o le aufaigaluega a le Work and Income

O le afiafi o le Aso Tofi na maua ai se avanoa i matagaluega taitasi a le malo e faasoa ai le latou pitolaau poo latou tiute ma galuega i pisinisi laiti a le Pasefika ina ia latou iloa ai nisi vaega o tulafono a le malo o loo agai iai faiga o pisinisi laiti i totonu o Niu Sila.

O matagaluega e aofia ai le ofisa o femalagaa’iga (Immigration) ofisa o lafoga (Inland Revenue) ofisa o fale (Housing), ma isi matagaluega e silia ma le 24 lea sa auai i lea mafutaga. O se feiloaiga o loo taulamua ai le afioga i le Minisita o tagata atu motu o le Pasefika ia Hon Aupito Su’a William Sio o ia o le sui o le malo, o loo ia taumafai e atiae pisinisi laiti a le Pasefika ina ia siitia i se tulaga maualuga ma lelei.

O le mau a le malo o loo iai nei, o pisinisi laiti o i latou ia o loo amoina le mamafa o le atinaeina o le tamaoaiga o Niu Sila. O le 80% o pisinisi laiti o loo iai nei i totonu o le atunuu, ae o le 20% o loo agai ai i lalo le pa’ū maulalo o pisinisi o loo iai a latou tagata faigaluega. O le tele foi o pisinisi nei o le 4% o tagata Pasefika o loo iai ma tagata faigaluega o loo safa i le va lea, o le naunautaiga la o le afioga i le Minisita ia taumafai ia iai ni polokalame faapenei e siitia ai pasene mo pisinisi laiti ma tagata faigaluega.

O le talitonuga o le afioga i le Minisita, o le tulai mai o lea faafitauli i le aufaipisinisi laiti, o le tele lava o le lē malamalama o tagata i auala e tatau ona fai i le va o le pisinisi ma matagaluega a le malo, ma ua umi ai foi le taimi e alu, ma oo atu ai lava ina solitulafono ona ua umi le taimi ua alu i matagaluega a le malo ae laitiiti le taimi i le pisinisi.

O le tāua la lea o le manulauti o loo taumafai nei iai le afioga i le Minisita ma le malo, ia maua se fonotaga faapenei e agai uma mai iai le aufaipisinisi laiti a le Pasefika ma matagaluega a le malo ma faasoa faatasi i auala ma galuega e tatau ona galulue faatasi ai ina ia maua le malamalamaga o tagata uma. Ia tatau foi ona iloa e pisinisi laiti tulafono e tatau ona latou tausia, ae ia latou iloa foi o loo iai fesoasoani a le matagaluega a le malo o loo mafai ona fesoasoani atu mo latou auā le atinaeina o a latou galuega.

O le talitonuga a le malo o loo iai, a lelei pisinisi laiti ua lelei foi ona maua galuega a le aufaigaluega, ma fesoasoani foi i le atinaeina o le tamaoaiga o Niu Sila atoa. E tele le faasoa na maua e nisi o aufaipisinisi laiti i lea fonotaga, ua maua ai nisi o auala e toe siitia ai le tulaga o pisinisi, aemaise foi e iai i latou o loo iai le lagona e toe faavae se isi pisinisi fou.

Ina ua mae’a le faasoa na tuufaatasi ai matagaluega a le malo sa auai, ona toe galulue foi lea o matagaluega a le malo ma tagata taitoatasi i totonu o le fale e faamalamalama atili le latou auaunaga i le atunuu.

O le vaega pito i sili ona tāua i lea fonotaga o le taotele o alo ma tamafanau o Samoa ma le Pasefika o loo galulue i matagaluega a le malo sa mafai ona faasoa lo latou tomai faatasi ai ma tulafono e ao ona savavali ma tausi ai pisinisi laiti. O lea fonotaga sa faia i le Vodafone Events Centre i Manukau ma o loo iai le faamoemoe o le afioga i le Minisita o tagata atu motu o le Pasefika e tatau ona toe fai se isi fonotaga faapenei ina ia faamalamalama atili ai pitolaau a matagaluega taitasi a le malo mo nai o tatou tagata faipisinisi ma le Pasefika atoa.