I le agaga faaaloalo e faatalofa atu ai i le mamalu o Samoa i tulaga faalupe. Faatalofa faapitoa i le aufaitau o le Samoa Times aemaise i latou e fiafia pea i lenei tusitusiga, “E afua mai mauga le manuia o le nuu”.
O le autū ma le faamoemoe o le fesoasoani ina ia mafai ona maua le avanoa e tufa atu i ni nai motugaafa ina ia mafai ona fesoasoani i soo se taitai ua tofia e le Atua auā galuega faataitai i totonu o ekalesia, e pei o le ulutala o lenei tusitusiga.
O le vaiaso na tea nei na tatou a‘oa‘oina ai ituaiga o taitai i le feagaiga fou. O se tasi o upu i le gagana Eleni o loo faaaogāina e faaigoa ai taitai o le ‘episcopos’. Masalo o lena ua maua lau faasamoa o le upu Eleni. O le episcopos lea e maua mai ai le epikopo.
O lenei upu e lua ona uiga ona o upu e lua o loo tuufaatasia ma maua ai le upu e tasi. Muamua o le upu ‘epi’, o lona uiga o le ‘over’, a faasamoaina o le ‘ova’ poo le sili atu. O le upu ‘scopos’ o lona uiga o le ‘vaai’ poo le tausia.
A tuufaatasi la upu nei ona mafai lea ona malamalama, o le epikopo o le tagata e sili atu lana vaai, pe maualuga lana vaai.
I se gagana taulata mai o le taitai o se tagata lea na te vaaia le ekalesia pe tausia le ekalesia, ma e sili atu lana vaai pe maualuga lana vaai nai lo isi tagata uma i totonu o le lotu.
E masani ona tatou faalogo i le upu Samoa o le ‘ovasia’, poo le tagata o loo pule, poo le supavaisa.
O se tasi o galuega faataitai i tototnu o le ekalesia o le pulea lea o tagata ma mea totino o le ekalesia. E moomia tagata faapea i totonu o le lotu, latou te vaai ma tausia le ekalesia.
O taitai la o le ekalesia e tāua ona malamalama i uiga nei o le galuega faataitai atoa ai ma le faaaogāina o i latou i le galuega a le Atua.
I le 1 Peteru 5:1-2, o loo atagia mai ai le faaaogāina o nei upu, o le toeaina, o le leoleo atoa ai ma le tagata o loo tausia le ekalesia. O nisi o taimi o loo faaaogāina ai e le Tusi Paia igoa nei mo le galuega e tasi.
“Ou te aiaoi atu i toeaiina o ia te outou, o au foi o le toeaina, ma le molimau i tiga o Keriso, ma le ua tofusia i le manuia a faaali mai.
Ia outou leoleo i le lafu mamoe a le Atua, o loo ia te outou, ia tausi foi iai ma le loto, ae le o le faatauanauina, aua foi nei faia ma le fia fai oloa, ae o le loto fiafia” 1 Peteru 5:1-2.
O le galuega a le faifeau, o le taitai o le ekalesia e ala lea i le matua faaleagaga. E lē ona o le toeaina poo le matua i le tele o tausaga, ae toeaina ona o le matua faaleagaga.
O le galuega foi a le faifeau poo le taitai, o le fafaga lea ma leoleo le lafu mamoe, ina ia malolosi le ekalesia. Soo se taitai e tāua lona iloa le Upu a le Atua.
O le galuega foi a le faifeau, o le taitai lea ma pulea pe tausi le ekalesia.
O nisi nei o auala e tatau ona mataituina a o lei filifili tofi taitai i totonu o le ekalesia. Afai tatou te malamalama i le a‘oa‘oga a le Tusi Paia e uiga i le ekalesia, ona faigofie foi lea ona tofi o taitai e faatatau i le ekalesia, auā e faigofie lava le saili o le tagata e faatumuina le tofi, ae lē o se tofi talafeagai ma le afioga a le Atua.
A faapea o lea o le a saili ni tofi fou mo le ekalesia, o ni mea tāua e tatau ona vaavaai i ai le faifeau poo le taitai o le ekalesia. Ia poo ā foi ni mea e tatau ona silasila toto‘a i ai le ekalesia.
E masani ona tatou vaai ma tuu le tofi taitai i se tagata e tatou te vaai atu o loo foliga mai o loo lelei i le mea o loo ia faia.
A tatou vaai atu i le tagata e lelei lana pese ona iai lea o le lagona ia tuu atu ia Ioane le taitaiga o le aufaipese auā e lelei lana pese.
Pe lelei foi le ta Kitara poo le piano a Simi ona faapea lea e tatau ona taitai e Simi le aufaipese.
Manatua mai o le Taitai ma le Pese e eseese agavaa ia. O le tagata pese o le taleni e mafai ona faatino e aunoa ma isi tagata. Ae o le agavaa faataitai e faia faatatau i tagata.
O se tasi lea o mea sese e masani ona faia e le taitai. E lē faapea a lelei lau taalo i le uigi a le All Blacks ma tele au sikoa ona otomeki ai lea le lelei o lau coach, poo le avea o oe ma faiaoga o le lakapi. O le faiaoga o se agavaa e ese nai lo le taalo lakapi.
O le tele o nisi lauiloa i taaloga latou te lē iloa koleni se au taalo.
E lē faapea a lelei lau ta piano ona e iloa ai lea fuataimi ma a‘o leo o le aufaipese. E toatele foi tagata ta piano e lē lelei ni o latou leo pese pe leiloa foi pese.
O le vaega e tatau ona manino ai le taitai ma mata‘itu i ai le taitai, o le iloa lea tuueseese le agavaa i le faatinoina o le taleni ma le agavaa i le taitaia o i latou e iai taleni.
Talitonu mai oe, o se galuega faigata tele le taitaia o tagata, aemaise tagata talenia.
Afai o oe le taitai lea ua tuuina atu i ai le matafaioi o le filifilia o taitai, lea ua e silasila atu nei i tagata o lau ekalesia, ma amata tuufesili lou mafaufau i ituaiga tagata nei o le a e filifilia.
Silasila i vaega nei atonu e fesoasoani tele mo oe.
Muamua, silasila i tagata e fia ola a‘oa‘oina. O lona uiga o tagata ia e fiafia e saili, ma fetāla‘i le mafaufau. O ituaiga o tagata faapea, e fiafia i suiga. E lē faigata foi ia i latou le suia o le mafaufau, auā o loo a‘oa‘oina pea i latou i mea fou ma suiga e ono oo mai.
Silasila i le tagata e a‘oa‘o lona mafaufau i se taimi umi ae lē na o le taimi puupuu ua tuuina atu i ai e a‘oa‘o ai ona o le tofi fou.
Saili le tagata e fia ola a‘oa‘oina ae lē o le tagata poto. E masani lava i le tagata poto ona lē toe fia a‘oa‘oina lona mafaufau. E manatu o ia ua na iloa mea uma. E faigata foi ona toe ofi i ai se isi manatu, poo se isi talanoaga e oo lava i se faatonuga.
O nisi nei o vaega e fesoasoani ia te oe i le tofiaina ma le faafaileleina o taitai fou mo le lumanai.
Lua, vaai i se tagata sa avea muamua ma taitai.
E mafai ona iloa le lumanai e ala i le vaai i le taimi ua tuanai. E tele ni mea tatou te a‘oa‘oina mai i le taimi ua tuanai.
Afai o lea ua e manatu e filifili ia Paulo e avea ma taitai, e tāua lou fesilisili i ai poo ā ana mea na fai muamua, sa ia taitai se autaalo poo se aoga Aso Sa, poo se ‘au a tama. O le poto masani o se tasi lea o faiaoga sili e a‘oa‘oina le taitai o le lumanai.
O se tasi vaega tāua, o le silasila lea i le galuega o loo faigaluega ai Paulo i le taimi nei, poo avea o ia ma se fomeni poo se supavaisa auā o tofi faataitai ia i totonu o falefaigaluega e tāua foi i totonu o le ekalesia.
Tolu, silasila i le tagata e mafai ona malamalama ma galue e tusa ma le tofa mamao poo autū o loo tulimatai e le ekalesia.
A lē malamalama le taitai fou i le tofa mamao a le ekalesia, o le a faigata foi ia te ia ona galulue faatasi ma le faifeau, poo lē o loo avea ma taitai ulu.
O se tasi o vaega ou te fiafia e luitauina ai le tagata o loo o‘u vaavaai i ai e avea ma taitai, o le tuu i ai o le avanoa e faatinoina ai se galuega o le tofa mamao lea e i le loto o le taitai poo a‘u foi.
A e vaai atu e naunau mai lea tagata na te fia tauaveina le luitau ma le avega o loo i le loto o le faifeau, ona e iloa lea o le tagata lena, o se tasi o au taitai i le lumanai.
Aua e te fefe e tuu i ai le luitau. O le tele o taimi ou te tuu avanoa ai i tagata ma ou fai i ai e fai se mea e aunoa mo lo latou iloa o loo o‘u sueina se taitai.
Aua le fefe e fesili i lea tagata ma tuu i ai se luitau faataitai, e suesue ai pe pasi pe leai. Afai e lē iloa e lea tagata le lelei o le ola luitauina faataitai, e lē o ia te ia foi la le naunau e avea ai o ia ma taitai o le lumanai.
