Na tuli e le tina lana tama teine 12 tausaga le matua e aumai se lapalapa i tuafale o lo latou fale. O le faamatalaga a le teineititi i leoleo, o tua o lo latou fale i se vaega o lo latou fanua sa faafetaui ai e le tamā 60 tausaga le matua ma faatino ai le solitulafono o le faia oni gaioiga matagā.
O le tolaulauga a leoleo i luma o le faamasinoga na ta’ua ai e faapea o le gaioiga solitulafono i le teineititi na te’ia ina ua alu le uncle poo le uso o le tamā o le teineititi e saili poo fea ua oo iai le su’ega o se lapalapa na tuli iai le teineititi.
Na faamatala le uncle i lana molimau sa ia molimauina i le gaioiga na tupu na loto iai le teineititi i le gaioiga na faia iai. Peitai o le silasila a le faamasinoga ma aiaiga o le tulafono e leai se ‘alofaga pe na malie iai le teineititi ona o ona tausaga e 12 e tapu i lalo o le tulafono ona faia iai ni uiga matagā.
Sa tetee Logoimamao Senifili Seve i moliaga a leoleo ma valaau ai molimau e lagolago ai moliaga. O le taunuuga o le iloiloga o molimau na taunuu ai le faamasinoga i le faamaonia o solitulafono na tuua’ia ai lē ua molia. O se tasi lenei o solitulafono ua lē masino le tutupu mai pea ma aafia ai le ola mu’amu’a o fanau teine laiti a le atunuu.
O le vaai a le faamasinoga e lē o faaitiitia ma ua lē ‘alo ai foi le faamasinoga i le faia o faasalaga faafalepuipui e momoli ai le feau mo ē o loo mafaufau e faatino ia ituaiga o solitulafono aemaise o se feau tāua lea mo le silafia e tagata uma o se solitulafono e matuia ma matagā.
I le iloiloga o se faasalaga talafeagai na teena e le faamasinoga le tuualalo a le loia sa tulai mo lē ua molia ina ia amata se faasalaga faafalepuipui i le 12 masina.
O le vaai a le tulafono e tatau ona malupuipuia fanau teine laiti i faaiuga faasaga ia i latou e molia. O le isi itu, sa teena e lē ua molia moliaga a leoleo ae ua taunuu suesuega i le faamaonia o moliaga.
O le vaai a le faamasinoga e tatau ona amata sana fua i le 2 tausaga peitai na toesea le ono masina ona o itu lelei faasino i lē ua molia e pei o le lelei o le talaaga o lona olaga, ma ua nofosala Logoimamao i le 18 masina.
O le faasalaga ua tuuina atu mo lē ua molia e tusa o aiaiga o faasalaga faafalepuipui, e mafai ona talosaga mo se faamagaloga i le palola pe a mae’a ona tuli le ‘afa o le faasalaga. Peitai e fuafua le talia o sea talosaga i le lelei o le tuliina o le faasalaga. O aiaiga lava ia mo isi foi faasalaga faafalepuipui.
