Ua matauina pea le faatupulaia o le faitau aofai o ulugalii ua o latou faaaogāina le falema’i i Motootua ua pei o se nofoaga e faatino ai vaegatama poo adoption.
Ua manino i le saunoaga a le peresetene o le Asosi a Tausi Soifua, afioga Papalii Solialofi Papalii le faatupulaia o lea faiga i le falema’i, o ulugalii e mananao e sui ai lava i le taimi e fanau ai le pepe le igoa e lesitala ai le tina o le pepe ia poo le tina foi o le a vaetama iai le pepe.
O se faiga ua faaalia manino e le peresetene e lē o se faiga amiotonu ma e lē faatagaina i lalo o le tulafono. Peitai na faaalia e le peresetene o le Asosi a Tausi Soifua, o se faiga ua leva ona faatino i Samoa nei. O le ave o se pepe fou e tausi e le uso poo le tuagane o le tina e ana le pepe. O se tu ua saunoa Papalii ua masani ai Samoa, ma atonu e mafua ona o Samoa e mafanafana lelei latou mafutaga vavalalata ma aiga potopoto.
Peitai ua avea lea ma auala ua sosopo atu ai i le vaega e tatau ona vase ai le laina, ma ua matauina ai le oo atu i le faaaogā o le faiga lea e faatino ai vaegatama. Ma ua faaalia ai popolega a le Asosi a Tausi Soifua, ona e lē gata e solitulafono, ae ua matauina lona faatupulaia i le atunuu.
Ua lagā le fautuaga mai le peresetene ona o le tulai mai o se vevesi i le va o tamaitai tausi soifua ma nisi o tamaitai se toalua, o le tina o le pepe ma lona uso. O le faamatalaga, ua malilie uma le tina o le pepe ma le lona uso e lesitala le pepe fou, i lalo o le igoa o lona uso. O le vevesi la e lei faatagaina e le tamaitai tausi soifua ma tupu ai loa le vevesi. O le tamaitai tausi soifua na tiute, e malamalama lelei i le auuso lea.
“O le mea la ua tupu, ua omai uma le au tamaitai lea, le auuso, o le isi tamaitai ua leva ona nonofo ma lona toalua, e leai se la pepe, ona omai lea ma le tamaitai lea e ana le pepe, finau e sui le igoa o le tina o le pepe e lesitala ai, ma ua vevesi ai ma soona avaavau ai le auuso lea, ae la e na te silafia lelei e lē faatagaina.”
“O le fautuaga faamolemole, e tusa lava poo sou uso poo se isi e matuā mafanafana lelei le lua mafutaga, ae e lē faatagaina lava.” Saunoa Papalii, na fautuaina loa nai mafine, e sili ona tuutuu i lalo o la finagalo ma’ema’eā, a’o lei vilia leoleo. O le vevesi lea na ala ai ona toe lagalagā i luga le faiga lea ua mafi ai le toatele o ulugalii Samoa.
Saunoa Papalii, e lē faapea o aafia ai tagata uma, e iai isi o loo latou faia nei faiga i se faiga faasolitulafono, ae o nisi o loo sosolo lava i faiga faaletulafono.
Ua matauina nei la ma le toto’a e le matagaluega o le Soifua Maloloina faiga faavaetama lea ua faia nei, aemaise lava i le taimi faatoa ola ai le tina i sana pepe fou.
“O le taimi tonu lava lea e fai ai le pepa tui, o ina la lea e tulai mai ai faiga ia e vaetama ai pepe fou, ma sui ai ma le igoa o le tina e lesitala ai le pepe.” Na saunoa foi Papalii, “O isi vaegatama poo adoptions o loo faatino i le taimi e ola ai le tina i tua. Ona omai lea o mātua lea ua vaetama iai le pepe fou e taumafai e enter i le lesitala a le falema’i, faamolemole e faasā, e lē faatagaina.”
Ua fautuaina e le peresetene o le Asosi a Tausi Soifua le atunuu, e lē faatagaina lea faiga ma e faasā i lalo o le tulafono.
