Aufaauu a le Samoa Assemblies of God Bible College Aukilani Niu Sila

O le tumutumu ai o le hall a Samani Pulepule i le afiafi o le Aso Sa ua mavae 5 o Me, o le mamalu lea o le atunuu ma aiga uo ma ē masani aemaise o ekalesia sa agai atu ma molimauina taumafaiga sa alo atu iai nisi o latou aiga aemaise o sui o ekalesia sa aotuina i le finagalo o le Atua i le aoga Tusi Paia a le ekalesia Assemblies of God Bible College i Aukilani.

O pesega ma viiga o le Atua ua alalaga fiafia ai lana fanau ma faafoi le taulaga o le faafetai i le Atua auā o ia sa tautai i le folauga i totonu o le aoga Tusi Paia ua mafua ai ona tini taunuu le tausinioga sa tau ai lana fanau e ala i le aoaoina o lana upu. O le taimi o le seleselega i fua sa luluina e tamaiti aoga i le tasi le tausaga, lua tausaga ma le tolu tausaga, ma ua faaiuina ma le manuia le taumafaiga e pei ona iai lea afiafi.

O le susuga i le faafeagaiga ia Rev Sauafea Pulepule sa ia taitaiina le sauniga faafetai, ao le susuga i le faafeagaiga ia Rev Malo Sefo o le toeaina o le ekalesia i Upolu i Samoa na saunia le tatalo e faamaea ai le viiga. O Rev Nonumalo Fereti Toleafoa o le taitai lea o le ekalesia o le AOG Church of Samoa in New Zealand sa tatalo e faapaia le taulaga. O le susuga i le faafeagaiga ia Rev Aifa Tanuvasa o le taitai o le Superintendent Assembly of God American Samoa sa fofogaina le upu faauuina a le Atua.

O le faamalosi a le susuga i le faafeagaiga iai latou ua faauuina sa maua mai lea i le autu filifilia o le faauuga e faapea “o le faatumuina mo le seleselega tele” o lona faalauteleina ia faatumuina i latou uma ua faauuina lo latou taumafai i le agaga Paia o le Atua ina ia mafai ai ona faatino a latou galuega fai ma lo latou valaauina i totonu o ekalesia e pei ona galulue ai. Ua lē gata i le taua o le feau momoli o le afiafi mo e ua faauu ae ua faamalosia ai foi i latou uma sa molimauina lea afiafi ina ia faatagaina le Agaga Paia o le Atua e galulue faatasi ma tagata e mafai ai ona faatino soo se galuega o le galuega a le Atua. 

O le matagofie o le faamoemoe ona sa auai mai ai le sui mai Amerika Samoa e pei ona iai le susuga i le faafeagaiga ia Rev Aifa Tanuvasa, o le sui mai Samoa ia Rev Malo Sefo faapea le komiti faafoe o le Samoa Assembly of God i Niu Sila nei i le taitai ia Rev Tooseu Tafunai Muaiava o le sui taitai ia Lemamea Motu Matia ma nisi o le komiti sa molimauina le taumafaiga a tamaiti aoga i le tasi le tausaga lua tausaga ma le tolu tausaga.

O le aoga e lē faapito manu ia tasi poo na o tagata o le ekalesia e fia aooga, ae o loo tatala le avanoa i soo se tasi mai ekalesia eseese e fia aotauina i le upu a le Atua, e mafai ona maua le avanoa e ulufale ai e faalautele le iloa ma le malamalama e ala i le afioga Paia a le Atua.

Au Faauu

Certificate in Ministry i le tasi le tausaga 

• – Sonny Faata

• – Iosefa Lofipo

• – Sapapalii Moananu

• – Patolo Namulauulu

Dibloma in Biblical Study in Ministry i le lua tausaga

• – Gautavai Onosai Afaese

• – Vaaifetu Afoa

• – Siaki Faofua

• – Azriel Faagalu Fonoti

• – Aiga Iosefo

• – Etepati Kereti

• – Elive Peleti Lafai

• – Tavita Lefaoseu

• – Elia Lolouta 

• – Maota Ta’ala Mapuilesua

• – Benjamin Peniata 

• – Ioana Ropati

• – Lelei Savili 

• – Ps Faresa Fogavai Savili

• – Ps Fata Elise Sefo

• – Mercy Su’a

• – Asiasiata Lotofoa Leuelu Ta’ala

• – Lealofisa Okesene Ta’anoa

• – Marie Talalelei

• – Lafo Toilolo.

Bachelor in Biblical Study in Ministry i le tolu tausaga

• – Taloaina Fuli

• – Iosia Lataimoega

• – Leaupepetele 

                    Kalamelu Leaupepetele

• – Tavita Mapuilesua

• – Daniel Morisa

• – Matano Pauli

• – Nancy Su’a

• – Vau Talataina

• – Sita Taloaina 

• – Elisapeta Tuiloma.