Tapena le Walking Samoans Otara e taualuga le vaiaso o le Gagana Samoa 2019

Walking Samoans Otara

O le kalapu savali a Otara e pei ona silafia lo latou faatāuaina o le vaiaso o le gagana Samoa i Niu Sila lea e faataunuuina i le vaiaso mulimuli o Me i tausaga taitasi, lea foi ua toe tapena e faatino lea agaifanua masani a le latou kalapu. Faaalia e le taitai o le mafutaga le afioga ia Magele, o le mafuaaga o lenei aga masani, o se talanoaga na faia ma faatonu o le Walking Samoans (Teleiai & Sooalo) ma ua lagolagoina foi e le afioga ia Laufili o loo fai ma fofoga o le mafutaga, aemaise foi o se tuualalo a le susuga i le faafeagaiga Rev. Faasaumalii Atonio ma sui sinia o le mafutaga, o se auala e faailoa atu ai lo tatou faaaloalogia o lenei polokalame tāua, o le faatāuaina o le gagana Samoa. A

uā e pei lava o le upu masani… “…A leai se gagana, ua leai se aganuu, a leai se aganuu ua po le nuu…” 

O le tapenaga la ua faataatia nei, o le Aso Tofi 30 Me, 2019 o le a faataunuuina ai lenei faamoemoe, i le nofoaga lava o loo tapuvae-tasi iai le Walking Samoans Otara, le Te Puke Hall, i Otara lava. Ua iai foi faafiafiaga ua tapenaina, ua valaaulia ai e le kalapu a Otara nisi o kalapu savavali, pei o le Walking Samoans Tamaki, Walking Samoans Manurewa, ma le Walking Samoans Papakura.

Pei ona silafia ma manatua tausaga ua tuanai sa faataunuuina ai lenei faamoemoe, o polokalame o le aso, e amata lava i se sauniga lotu, pei ona feagai lava ma le susuga i le faafeagaiga ia Rev. Faasaumalii Atonio aua o ia o le faafeagaiga a le au savali a Otara, ona sosoo ai lea ma le ava o le feiloaiga (Agatonu o le taeao) e tusa o agaifanua a Samoa, si na Malu o le taeao, ona sosoo ai lea ma faafiafiaga pei ona tapena ma valaaulia ai ausavali pei ona ta’ua, Tamaki, Manurewa ma Papakura…  ae taualuga i le taumafataga …ona mafuta ai lava lea ma feofoofoai (mix & mingle) pe a maea fuafuaga aloaia o le aso.

O lenei aga masani a le Walking Samoans a Otara, o se vaega ua faapea ona molimauina le atili mautu ma faamausali ina ai o nei mafutaga, aua e pei foi ona taumafai iai nisi o mafutaga taitasi. 

Na faaalia e le toatele o le ausavali a le Walking Samoans i Aukilani, o le Walking Samoans ua savali i le valu tausaga talu ona faavae, peitai e fa tausaga e na o le tasi lava le kalapu savali, ua na o le kalapu lava a le leitio, e ui ina umi atu le taualaga a Tavai ma Alefosio na i lo le taualaga a Noa e fau le vaa. Ae ua amata ona faamaopopo ausavali taitasi e ala i polokalame & faatinoga o fuafuaga e ese mai le savali, pei o faafiafiaga, faafaletui faaleaganuu, ma nisi lava o polokalame na faa-polokalame-ina e Sooalo ma Teleiai, lea ua ala ai ona ola lau-usiusi le Walking Samoans, ma lauiloa, lea foi ua ala ai ona agai mai finagalo o nisi o kamupani ma ofisa tetele e fia tuu lo latou igoa i polokalame a le Walking Samoans, aua o se mafutaga ua ola ma maopoopo. 

Pe a faatusatusa atu i le na o le omai savavali ma toe foi i le fale, o le aga masani lava lea o aso uma o le o e savavali, lea foi lava la sa fai e le uluai kalapu le au savali a Manukau le Radio Samoa, peitai e le i mafai ona faaosofia ai le fiafia o le atunuu e faaolaola le savali, ae o le iai o isi polokalame faaopoopo pei ona tapenaina ma afua mea ai taitai ia Teleiai & Sooalo, o le mafuaaga tonu lea o le taupati mai o le atunuu ma lauiloa ai loa le Walking Samoans… ma faapea i foi ona tele kamupani latou te fia sponsor ina le Walking Samoans.

O le ala foi lea o le tau-tu o le kalapu a Otara i la latou lea faamoemoe o le taualugaina o le vaiaso o le gagana Samoa i tausaga taitasi e ala ia latou tapenaga o faafiafiaga ma le valaaulia ina o nisi uso a ausavali e latou te molimauina faatasi lenei faatofalaiga tāua o le Vaiaso o le Gagana Samoa…aemaise o le molimauina e kalapu taitasi ma tagata o le Walking Samoans, o polokalame ia ia o loo faatupu atili ai le ola ma le lauiloa o le Walking Samoans.