O le aso 3 o Iuni i le tausaga ua mavae na faato’ā faavae mai ai le Divine Mercy i se vaega itiiti o nai aiga Samoa i le nofoaga o Springfield Lakes o loo iai le Palisi a Southern Cross.
O le Patele lava o loo vaaia le Palisi sa faapaiaina le Divine Mercy lenei.
O se mafutaga e galulue faatasi e atina’e lea vaega o le galuega i le ekalesia e ala lea i le faia o asiasiga i falema’i, asia isi aiga ma lauina Losalio i mafutaga tatalo lea e faia i Aso Sa i le 3pm i le falesa, ae o aso uma e lau ai le losalio mo Iesu le Agaalofa mamana i le itula e 3 i le afiafi i totonu lava o aiga.
O le Sulufaga a Iesu le Agaalofa Mamana (Feast Day) e pei ona faamanatuina e le fale 4 o Divine Mercy i le Aso Sa 28 o Aperila i Goodna, ae o le 2018 i Inala, lea sa faamanatuina ai foi e le Divine Mercy a Springfield aemaise ai le faapaiaina o tofi o Aposetolo lea sa faatāuaina i lea lava Aso Sa. E lē o auai le ‘Olo a Springfield i le fale fa ona faato’ā tau amata latou i le tausaga ua mavae.
O le ta’ita’i o le ‘olo o le faletua ia Silika Lupe Salā, teutupe o le faletua ia Sipele Fepuleai. E ui lava e lei faaaogāina le gagana Samoa i le Misasa peitai sa momoliina lava le taulaga e faaaogā ai tu ma aga masani i le gagana Samoa. Na mae’a le Misasa alo loa le Palisi a Southern Cross i Springfield Lakes i le taumafataga māmā na saunia lava e le Divine Mercy. O galuega e pei o le faamaloloina o tagata mama’i o galuega ia a aposetolo e fai ia ma le faasoa atili atu pea i nai isi tagata o le tala e uiga ia Iesu le Agaalofa Mamana ma faamatala i ai le uiga ina ia maua nisi agaga e mafuta faatasi ia latou mafutaga tatalo ma avea ma autau e folafola atu. O le finagalo o le ta’ita’i na soalaupule ma nisi o se auala talafeagai le tatala ma faatu o se ‘olo i le Palisi a Springfield Lakes ona o le toatele o atunuu eseese e alaala i lea pitonuu, na afua ai le faaofi atu o le ‘olo i lea palisi. E iai foi nai isi aiga Samoa o loo lolotu i le palisi a Springfield, o loo faia pea la latou galuega tala’i ina ia mafai ona latou tutu faatasi ma auai i le Divine Mercy.
O Taituuga Pulemagafa Ionatana ma Malia Repeka Selave, faapea Maposua Matthew ma Sipele Fepulea’i o ulugalii ia sa faapaia i le Aso Sa o le Sulufaga e avea ma aposetolo a Iesu le Agaalofa Mamana.
