A’o talia le ofo a alii ma faipule o Tiavea na togi i le malo, mo le faatauga o fanua faaleaganuu a le nuu mo le faatuina ai o le malae vaalele, ae ua maea ona pasia e le malo le kamupani poo o le konekarate, ua manumalo i le faatinoga o le galuega.
O le kamupani ua manumalo o le Aldan Construction, ma o le kamupani e umia e le atalii o le afioga i le minista lagolago le afioga Peseta Vaifou. O le manumalo ai o le Aldan, ua le’o misi lava foi ma lagona masani ai o tatou tagata, pei o le fesiligia ai foi o ala e faatino ai galuega tetele faapenei, ona o sootaga vavalalata o le tuaa o le` e ana le kamupani ma le sui minisita lagolago. Peita’i o le faatuatuaga o le faatinoga o tauofoga o atinae a le malo, e patino lea ma le Komiti o tauofoga, ma ua pasia.
E silia i le 3 miliona tala lea ua manumalo ai le Aldan Construction. Faimai le lipoti, e pau le galuega o le a gafa ma le kamupani lenei e na o le suaina o le auala ta lea e sesee ai vaalele poo o le runway. O isi galuega e le’o mautinoa mai ile taimi nei.
E le’i maoti mai pe fia ni kamupani na tauofo mo lenei galuega. Ae o le malilie o Tiavea i le faatu ai o le malae vaalele, ua lagalaga ai manatu o le taitai o le SSIG, le afioga Unasa Iuni Sapolu i luga o le facebook, pe faapefea ona fai e Tiavea lenei maliega, e aunoa ma le silasila toto’a i se lipoti o ni suesuega faale siosiomaga ua maea ona faatinoina.
Na fesiligia le pulenuu, Sola Seiuli e uiga i le lipoti, ae na ia faaalia ua uma ona fai le suesuega i le vaitaimi a’o pulenuu le afioga ia Tuiavii, ma ua malamalama foi i ai alii ma faipule. Na fesiligia foi le pulenuu pe na e silasila i le lipoti poo o le suesuega lea na faia ini aafiaga e faaono aafia ai le siosiomaga aemaise o soifua o tagata. Na tali le pulenuu e leai, ae ua uma ona faamalamalama mai e sui o le matagaluega i alii ma faipule o le nuu, ma ua matou malamalama iai.
O nisi ua faaali o latou finagalo, o se laasaga sese ua faia e Tiavea i le faatau ese o latou fanua faaleaganuu, ma talosia ae le toe mau manatau ane i se taimi mulimuli ae ua tuai. Peitai o loo tamau le finagalo o le sui o le malo, Sola Seiuli ose faaiuga sa’o ma o se faaiuga fo’i ua faia e faamanuiaina ai le afioaga.
O lana mau, e iai tu’utu’uga ua faia e alii ma faipule mo le manuia lautele o le afioaga ua tuuina atu i le malo. “Ua maea ona ave i le malo matou tu’utu’uga, o tu’utu’uga e aofia ai le fai faalelei o le matou auala agai i le aai, ia fa’ata lelei ma toe sua faalautele mo feoaiga, o leisi tu’utu’uga ia na o Tiavea lava e faafaigaluega i le malae vaalele, o le uiga o lea faamatalaga ia ave le faamuamua i tagata Tiavea e galulue i le malaevaalele.” “O le isi tu’utu’uga o le nuu lenei, o le matou faafitauli numela tasi o le suavai, ua matou talosagaina le malo, ia faalelei le matou suavai.”
O le faanaunautaiga o le malo, o le fausia o le malae vaalele o le faaaoga lea i femalagaiga faafuasei, ona e latalata i Amerika Samoa, e le gata i lea ina nei tulai mai ni faalavelave faalenatura, ae o lo o iai le malae vaalele lea e fa’aaoga.
O loo teena e le pulenuu nisi o lipoti e faapea o loo tetee nisi o aiga i le fausiaina o le malae vaalele. Faaalia manino e Sola, e leai nisi o tete’e, ua mae’a ona toe feiloai atu i aiga e ana fanua ia o le a faaoga ma o le latou faamatalaga ua malilie iai. “E le mafai ona gaioi le nu’u e ioeina le faamoemoe pe ana le tali ioe mai aiga.”
