E le o se tama’i lu’i lea ua feagai nei ma le matagaluega o le soifua maloloina ma le auaunaga o le soifua maloloina, le toe taumafai e toe faafo’i ane o le faatuatuaga o le atunuu, e toe faatino tui puipuia o le fanau.
O le faamatalaga lea mai i sui o le auaunaga a le soifua maloloina ina ua valaauina i luma o le komisi suesue faapitoa na tofia e le kapeneta e latou te suesueina poo fea tonu lea na tulai mai ai le lape i le uma ai o soifua o pepe mai Sasina ma Safotu ia Iulai, ina ua mae’a ona faatino o la tui puipui i le ta’i tausaga, po o o le tui o le misela, mami ma le lupela poo o le MMR 1.
E le gata i le suesueina o le mafuaaga o le maliliu o pepe ae o le suesueina foi o isi mafuaaga o loo i tua atu o le faatamala, ma le va feteenai ua manino mai i le va o matagaluega o le soifua maloloina ma le auaunaga faalesoifua maloloina.
O le afioga Tuiloma Neroni Slade, Lealaiauloto Lia’i Iosefa Siitia ma le afioga Leoo Dr John Adams o sui ia o le komisi o lo’o faatinoa suesuega.
O le faafitauli ua galulue nei iai le matagaluega, pe faapefea ona o latou aumaia le faatuatuaga o le atunuu e latou te taliaina ai le toe faauau o le polokalame.
E pau le tulaga lea ua galulue nei iai le matagaluega o le toe fai lea o polokalame i luga o auala tau fesootaiga e faauau ai. Na fesiligia le pule sili o le auaunaga tau soifua maloloina Palanitina Toelupe pe iai se sootaga o le faalavelave lea na tupu i le falemai faaitumalo i Safotu i pepe maliliu ma le toe tuufaatasiga o matagaluega e lua, peitai na ia tali e leai.
Pau le tulaga o loo moomia i le taimi nei, o le lava lea o polokalame faa le aoaoga e toe polesi ma faalelei ai tomai a tamaitai tausi mai pasi. “A fua atu i le tulaga o loo iai le taimi nei, e seasea ona lava aoaoga e toe polesi ai tomai ma agavaa o tamaitai tausi mai pasi ma e moomia tele le tulaga lena.”
Na tulituliloa i fesili a sui o le komisi le tamaitai pule sili, ina ia faailoa atu poo a tonu alafua o loo ta’ita’ilimaina ai le faatinoga o galuega, aemaise o le tulimataia o le teuga o vailaau faaaoga mo tui puipui o tamaiti.
“O lo o sa’o ma lelei atoatoa tulaga tau storage, poo le teuina o tui ia e aumai mai fafo.
O le maluluina faatulagaina o pusa aisa o loo sa’o lelei, temperature, e ta’i faa lua ona matou siakiina le malulu faatulagaina, o le tulaga foi i pusa aisa e faatulagaina lava pusa aisa mo tui puipui o le fanau e le tuufaatasia ma isi tui.”
Peitai o le popolega o loo atugalu ai le pule sili ma le auaunaga, ona ua lata i le lua masina talu ona taofia le tui puipui o le fanau o le MMR1.
“O le matou popolega, ao taofia le toe faaaogaina o le MMR1, e faaono sao mai i le atunuu siama o le faamai lea e ala i femalagaiga, afai ae malaga mai se tamaititi ma siama o le MMR1 e faigofie lava ona sosolo ma aafia ai le fanau laiti.” “O le talosaga i le komisi sei toe silasilaina i le tulaga lea.”
O le vaiaso na te’a nei, na toe valaau ai i luma o le faamasinoga faaitumalo le mataupu mo le suesuega o maliu lilo inquest o alualutoto e toalua. Na faailoa ai foi e le itu a leoleo, ua taunuu mai le lipoti na faia e le fomai mai Ausetalia lea na aumai e faatino suesuega o pepe maliliu. Peitai na talosaga le itu a leoleo, ina ia faataatia ese suesuega a le faamasinoga o maliu lilo, sei maea suesuega o loo faia nei i le faamasinoga maualuga, i moliaga faasaga i tamaitai tausi mai pasi.
O le mataupu lea i le faamasinoga o tausi mai pasi mai le falema’i o Safotu, o loo la teena moliaga o le fasioti tagata pa’ivalea.
Ma ua tolo atu ai le fofogaina o lena mataupu ile masina o Ianuari o le tausaga fou, ae tumau pea tuutuuga o tatala ai tausimai pasi i tua.
Peita’i ua tolopo i le Aso Faraile nei e toe fofoga ai le mataupu lea ile talosaga a leoleo faatatau ile faataatia atu o le lauina o le suesuega faafomai ile mafuaaga o le maliliu o pepe, se ia mae’a le faamasinoga o tausimai pasi.
