“Ua tele faafitauli ua aliali mai i tagata na avatu e isi i le alolofa nonofo i o latou fanua, ae ua lē fia ‘o ese’…Palemia
O le faaiuga a le Malo ia siitia aiga o nofoia Sogi i fanua umia saoloto ta‘i kuata eka i Falelauniu, ae taatia eleele o le Malo i Sogi mo nisi o fuafuaga a le Malo, e ono agavaa ona faamalosia le aveesea o aiga o loo nonofo ai pea pe a mae‘a ona talanoaina ma pasia e le Palemene se tulafono taufaaofi o le a faamalosia ai lea tulaga.
O eleele o le Malo ua pulea nei i lalo o le Faalapotopotoga o eleele le Samoa Land Corporation.
O loo taoto i le faamasinoga se mataupu i le va o nisi o aiga i Sogi ma le Malo ona o le faaiuga e tulai ese ma eleele ona o loo finau aiga o eleele ua tele tausaga o nonofo ai ma ua tatanu ai foi nisi o o latou aiga.
O le faiganuu a Vaitele-tai o loo iai foi se faafitauli o loo tulai mai ai, o le faigata ona o ese aiga o loo nofoia eleele o le Malo ua vaevae i matai ma aiga tonu o le foaiala o Vaitele.
Ua uma ona soalaupule le feteenaiga sa aafia ai le lotoifale o lea afioaga i le vaevaeina o eleele peitai ua faigata nei le mataupu ma fefeu ona ua lē fia tuumuli tagata ese ma eleele.
O le afioga i le Palemia, o le Minisita foi lea o loo iai le vaaiga o le Faalapotopotoga o Eleele a Samoa lea na saunoa i le maota fono ma faamatalatala le mafuaaga o le tulafono taufaaofi.
Faaalia e le susuga Tuilaepa L Sailele Malielegaoi, ua tele faafitauli ua aliali mai ona ua lē fia tuua e tagata e lē o ni o latou fanua eleele umia saoloto o iai na avatu e nonofo ai ona o le alolofa i le taimi sa tau saili ai se mea e tau ina faamautu ai.
O se tasi o mataupu e faasino i se fanua kuata eka o se tasi o aiga o le nuu o Vaitele-tai ua uma ona suesueina e le faamasinoga ma ua iai le poloaiga e solomuli ese i latou o loo nofoia.
Peitai na faaalia e se tasi o le aiga o loo nonofo ai pea se vaega o le aiga i le fanua.
O loo iai le lagona o le aiga e ana le fanua e solomuli ese filemu i latou o loo iai, a o lei oo ina iai se isi malosiaga faaletulafono e aapa i ai.
E lē na o eleele i Sogi ma Vaitele o loo umia i le pule a le Malo o loo aliali mai ai faafitauli faapea, ae e iai le talitonuga o le tele o faigata ma feuiuiaiga i taumafaiga e saili se fofo filemu e faato‘amalie ai ni feteenaiga, o le auala lea o le tulafono taufaaofi e toomaga i ai le malo mo le vave foia o ni faafitauli faapea i le lumanai. Ua faaigoaina lea tulafono tau faaofi o le Tulafono taufaaofi o le suiga o taimi.
