O se tasi lea o vaega tāua o le galuega ma le misiona a Iesu. O lea faato‘ā amata lana tala‘iga, ae valaaulia ma ona soo i se faaipoipoga. Sa iai ma Maria.
O le uluai vavega lea, mai le fitu o vavega sa faia e Iesu e tusa ma le molimau a Ioane. Sa amata lava i le faaipoipoga. E tāua auā o le faaipoipoga sa amata mai i le foafoaga a le Atua.
O le iai foi o Iesu i le faaipoipoga, e atagia ai se isi matālalaga fou o le a faataoto e tusa ma lona afio mai. Auā o lana misiona, o le toe tatai o le lalolagi i le faavae na finagalo i ai le Atua talu le amataga.
Manatua foi, sa amata le lalolagi i le faaipoipoga, o lea ua ogatotonu i le faaipoipoga lea ua auai atu i ai Iesu, toe faaiu le lalolagi i le faaipoipoga.
1. Valaaulia Iesu
Atonu e masani pe tausoga Iesu poo Maria ma le ulugalii fou. Ai o le mea lea sa maua ai le valaaulia, ae o se filifiliga poto ua fai e le ulugaliifou. O le iai o Iesu i lou aiga, o le faailoga o lou faaaloalo. E lē mafai ona afio mai, vaganā ua e faatagaina o ia e fai ma malo faaaloalogia.
O le molimau a tagata popoto, e lua aso sa savavali ai Iesu ma ona soo ina ia iai i le faaipoipoga.
E tāua ia Iesu le valaaulia lea. E lē ‘asa o tatou aiga ma faafitauli, ae sologa lelei mea uma pe a ogatotonu Iesu i soo se mea.
Failauga 4:12 “…o le maea foi e sāutuatolu e lē vave motusia…” O le tau atina‘eina o se aiga fou e lē faigofie, e tele ona luitau. Ae a iai Iesu e toatolu ai lea aiga, e malosi ma manuia. Manaia le amataga o lea aiga, sa ogatotonu ai Iesu.
2. Ave faafitauli ia Iesu
E lei leva ona amata le fiafia o le faaipoipoga, ae maua le tala, ua uma le uaina. O le luma o se aiga Samoa pe afai e tupu se mea faapea.
O faitotoa ia o feupuaiga i aiga-na-lua, aua o le a tuufesili poo ai e lei atoa saogatupe, a o ai foi sa nafa ma lea vaega o le faamoemoe. E fai ma gao i le lumanai, auā a maua se fanau, e faaigoa o le fanau a le ulugalii na faainu le auvalaaulia i vaiauli.
Ae manaia le tutupu ane o faafitauli, ae o loo ogatotonu ai ma Iesu. Sa iloa e Maria o le luma e oo i ai, tapa loa ia Iesu. Na ia silafia, e lē mafai e se isi ona toe fai se tonu faatopetope, e oo foi ia Maria, na te lē mafai ona fai se vavega i se taimi vave.
E galo ia tatou i le tele o taimi, e fia fesoasoani Iesu i o tatou faafitauli. Ae tatou te popolevale ma tatou lē faatuatua. Manatua, o Ia lava na fetalai, ‘tatou te lē mafaia lava se mea, pe a leai o Ia.’
3. Tutupu vavega i mea ua i o tatou lima
O le faatonuga a Iesu, ia faatutumu ia vai maa tetele i le suavai. E lei tau saili i Aikupito se tali o le faafitauli.
E lei tau ave se poloai i aiga la e nonofo i Amerika, ae o mea lava sa iai i totonu o le fale sa fai ai le vavega. Poo le ā lava se mea faatauvaa ua ia te oe, se taleni, se agavaa, poo se totogi laititi, e mafai e le Atua ona faamanuia ai oe i si mea lena, pe a faatuatua ia te ia. Fetalai le Atua ia Mose e alu e aumai lona nuu mai Aikupito.
Sa faafiti, aua e lē se galuega faigofie. Sa fesili i le Atua pe faapefea na aumai. Tali le Atua, ‘o le ā le mea lena e i lou lima?’ Fai mai Mose o le tootoo. Fai atu loa le Atua, togi i lalo.
Ua te‘i Mose i le liu gata o le tootoo. O si tootoo lava lea sa fai ai le galuega o le leoleoina o mamoe a le tamā o lona toalua, sa toe faaaogā e le Atua e fai ai vavega.
Tele taimi e moomoo ai ma faapea, maimau e, pe ana ou fanau mai i se Saina milionea, semanu ai se manuia o lo‘u olaga. Pe faapea foi, pe ana o a‘u o Bill Gates, semanu ua ou faatauina atoa Samoa. O miti nei e lē taulau, auā o le a tauaso ai oe i lou faapea ifo; ‘o le ā se mea ua aumai e le Atua ia te au ou te galue ai?’ Ua ia te oe mea uma lava mai le Atua e te manuia ai.
4. Fai soo se mea e finagalo i ai le Alii
Manaia fautuaga a Maria i auauna; ia usiusitai i soo se mea e fetalai atu ai Iesu.
O nisi taimi, e faigata tele ona tatou usiusitai, a o le usitai e sili i le ga‘o o le mamoe po‘a. O le taimi tatou te usiusitai ai, e matuā liliu mai fofoga o le Atua ma faatutupu manuia mo tatou. Poo ā lava ni faaletonu sa fai i aso ua sola, o luma o loo taoto ai manuia, pe a usitaia le finagalo o le Atua.
E sili atu mea e faia e le Alii mo tatou, nai lo mea faa‘ole‘ole a Satani e faafoliga, ae tua i le malaia. O le tala a le pule o le tausamaaga, ua tuu le uaina lelei, ae muamua mai le uaina leaga. Na te lē iloa, e leai ni mea faaletonu sa tapena mo le faamoemoe. Ae ina ua fai e Iesu le vavega, ua sili faaafe atu i galuega sa fai a tagata.
O se luitau, ia lotolotoi Iesu ia tatou taupulega. Ave ia Iesu soo se mea tatou te manatu ai. O le usitai e amata ai vavega, ae faataimua i le tausisi i lona finagalo. Soifua.
