O le fuafuaga a le Malo e pasia se tulafono e faatulai ai tagata ese mai fanua umia saoloto o isi, o loo lagolagoina e le toatele o faipule o le Palemene, ae oo mai loa le fuafuaga i le aveesea faamalosi o tagata o loo faaaogāina fanua o le Malo ma nonofo ai, ona faigata lea i le faipule o Faasaleleaga Numera 2, Papalii Li‘o Ta‘eu Masipa‘u, ona ia talia.
Na faaalia e le faipule sona lagona tetee faatasi ai ma lona itumalo i le aofia ai ma eleele umia saoloto o le Malo i le tulafono ua taoto atu nei mo se finagalo o le Palemene.
O lana saunoaga i le maota fono na matuā manino le tetee ai o le faipule ona na ia faaalia, o le tele o fanua o le Malo o loo i tuā maota o Faasaleleaga Numera 2, ua leva tausaga o faaaogā e nisi o nuu ma afioaga, ma afai ae pasia le tulafono o lona uiga o le tulaga lea o le a oo i ai tagata o loo nonofo ma galulue ai i ia eleele. O fanua umia saoloto o nisi, ua umia e nisi e lē suli pe e lē tau i ai i le fanua.
E mafua ona o aiaiga o loo iai nei o le tulafono, lea a 12 tausaga ma sili atu o nofo ai se tagata, ona agavaa lea ona iai ma lana aiā.
E faapena foi i le aiaiga o fanua umia saoloto o le Malo e 60 tausaga talu ona faaaogā, ona agavaa lea o se tasi e finauina lona aiā na te pulea ai sea eleele.
Faaalia e le Palemia i lana faamalamalamaga, e toatele aiga i Apia ua sulu atu mo se fesoasoani, ona o tagata na alolofa i ai ona ave lea nonofo i o latou fanua, ae uma ane ua fiu e faatulai ese, ae feosofi i le faamasinoga finau ai o latou aiā o loo i le tulafono.
O le fuafuaga a le Malo e soloia le aiaiga o le 12 ma le 60 tausaga. O lona uiga poo ai lava le tagata e ana se fanua umia saoloto o loo nofo i fafo faapea ai ma ana fanau, e poo le ā lava le umi o tausaga e aumau ai i fafo, e toe foi mai lava maua lona fanua.
O loo talosaga le faipule o Faasaleleaga Numera 2 i le Malo, ina ia toe silasila atili i le vaega lea o le tulafono e faasino i fanua o le Malo, auā e tatau ona faatalatalanoa muamua ma le atunuu o loo faaaogāina fanua o le Malo.
Ua faaalia foi e le Fofoga Fetalai i sona finagalo i le Palemene, e lē fesiligia le toatele o tagata ma nuu e aafia i le tulafono, ae o le a lafo fautuaga ua tuuina atu e silasila i ai le Malo.
