“Ua sauni le matou komiti e ave le lipoti i le Kapeneta”
O nisi o tulafono o loo silasila le Malo e toe teuteu ona o suiga ua iai le atunuu i lenei vaitaimi, aemaise lava i tulafono tuai i taimi o pulegamalo faakolone a Niu Sila, ua iai le fuafuaga e lē o toe mamao ae taatia atu i luma o le kapeneta mo se latou faaiuga ma se iloiloga mulimuli.
E pei o le tulafono o fono a nuu, lea sa malaga ai sui o le komiti o le Lala o Tulafono ma le Amiotonu a Samoa, e fesiligia se finagalo o nuu ma afioaga i Upolu ma Savaii.
Sa fesiligia ai foi ni lagona o le atunuu i se faiga faavae auā le puipuia ma le faaitiitia o soligatulafono i Samoa.
“O nisi o mataupu sa faatalanoa e aofia ai le saolotoga o tapuaiga aemaise i le mae‘a ai o le Komisi Suesue i lenei mataupu, faapea foi ni isi vaega o faiga faaiuga a Fono a Nuu ua mafua ai mataupu sa fato‘ai atu i le Faamasinoga.
Na sailia foi se tofa a le Atunuu e faatatau i le faatupulaia o soligatulafono aemaise soligatulafono ua aafia ai alo ma fanau, auā le fauga o se faiga faavae e faatāua ai tu ma aga a Samoa, talitonuga faa-Kerisiano; ae matau foi i le tulaga o le Tamaoaiga Faafatuaiga, aemaise Tulafono a Samoa”.
E fitu (7) fesilafaiga na faataunuuina i Upolu, ae fā (4) i Salafai. Na amata fesilafaiga i le Aso Gafua 5 Setema 2011 i le Maota o le Galuega a le EFKS i Lalomanu i Aleipata, ae taualuga i le Maota o le Galuega a le EFKS i Gautavai i Savaii, i le Aso Tofi 29 Setema 2011.
I le mae‘a ai o fesilafaiga ma le mamalu o le Atunuu, e 1,636 e na paau atu i faatalatalanoaga i Upolu ae, 1,183 i le Motu Tele i Salafai.
O le faamoemoe o le Komiti, o le a tapena le tuufaatasiga o finagalo faaalia o le mamalu o Samoa mo le silafia e le Afioga i le Palemia ma le mamalu o le Kapeneta.
O loo sailia foi sē e tusia tulafono fou poo ni toe teuteuga o le Tulafono o Fono a Nuu 1990 e pei ona iai finagalo o le Atunuu.
Ua faatulaga foi le ata auā le fauga o se Faigafaavae mo le Puipuia ma le Faaitiitia o Soligatulafono i Samoa.
Na matauina le sasaa faaoti o le utu a le faimea i finagalo o ē sa auai i le faamoemoe.
E felanuai manatu ma taofi, ae auga uma i le faamaopoopo ma le faamamaluina o le filemu o loo sapi ai nei Samoa.
“Ia faamalosia le pule mamalu a Alii ma Faipule…” “Ia lesitala aloaia faavae ma tulafono o fono a nuu taitasi ina ia silafia e le Faamasinoga pe a faato‘ai atu se mataupu…” “Ua lava ekalesia ma lotu ia ua iai i Samoa… ua tatau ona taofi ai loa i i…” “Tautuana mātua tulei tupulaga i le Autalavou, i le Aoga Aso Sa … fai lotu faatasi le aiga atoa… mafuta mātua ma fanau.”
“Tau faavava le o i Bingo… aua foi le leoleo faalausosoo le tamā o le aiga i leoleoga a le nuu…” “Silasila ane i le faaaogaga e alo ma fanau o telefoni ma le initaneti “Taumafai ia aua ne‘i faaituau pe faapito faasalaga a nuu – fua le sala i le mamafa o le solitulafono…”
Ua momoli ai le faafetai a le Afioga i le Taitaifono, le Afioga i le Loia Sili, aemaise le mamalu o Faauluuluga o Matagaluega a le Malo ma Sosaiete-Faalapotopotoga Tuma‘oti o le Komiti Faafoe o le Lala o Tulafono ma le Amiotonu a Samoa, i le mamalu o Samoa, mo le talileleia o la latou savali.
“O le ma‘au, o au aga faatamaalii ma au faaaloaloga, faafetai i au teuga, faafetai i lau silasila ia Samoa ma lona Malo”.
O le finagalo lea o le Taitaifono ma le Komiti Faafoe e pei ona faailoa i se pepa o faamatalaga.
