E faafeiloai atu i le suafa o Keriso lo tatou Alii i le mamalu o Samoa i ona tulaga faalupeina. O sa ma faigā, o paia mai le vavau e oo i le faavavau. E faapea foi ona faafeiloai faapitoa i susuga i faafeagaiga ma faletua aemaise o taitai o ekalesia.
Ua faaigoaina lenei itulau “E afua mai mauga le manuia o le nuu” ona o se talitonuga e moni ma faamaoni e pei o lea alagaupu faasamoa, o taitai e tāua tele lo latou tiutefai ina ia manuia ekalesia, faalapotopotoga ma pisinisi.
O se tasi o muagagana faasamoa e faapea “E iloa le tautai matapalapala i taimi e siisii ai le tai pe sou ai foi le vasa.” A oo ina tupu se vevesi i totonu o se faalapotopotoga, o le taitai lava e vaavaai uma i ai tagata mo se faaiuga poo sana saunoaga foi.
E tāua tele i le taitai ona manatunatu ma tapena i taimi e sou ai le vasa auā e mautinoa poo le ā le lelei o le tau ma le lipoti a le au vaaitau, e iai lava le taimi e sui faafuasei ai taaviliga o matagi ma to faata‘uta‘u matagi ma timuga.
A oo la ina tutupu nei fesuiaiga poo ni faafitauli e tulai mai, ae ua iai se tapenaga faalemafaufau a le taitai. E lē tatau ona poia faamanuiofaga le lagona o le taitai. E lē tatau ona te‘i ae tatau ona sauni.
O nai vaiaso ua tuanai atu na tatou talatalanoa ai ma tuuina atu foi se fesoasoani e ala i le mataupu e uiga i le totogi poo le faaoloaina o le auauna a le Atua.
E pei ona ou sōsō atu, e lē o iinei se atoatoa. E tofu foi lava le ekalesia ma auala o loo faia ai. E leai foi se auala e tasi e sao ma atoatoa i le tausia o le faifeau.
O le mea tāua o le usitaia lea o le a‘oa‘oga a le Tusi Paia ina ia tausia lelei le auauna a le Atua. Ia aua foi ne‘i manao tele le faifeau. Ae ia talafeagai.
O loo a‘oa‘o le 1 Timoteo 5:17-18 ina ia tatau le totogi i le tagata faigaluega aemaise lava i latou o loo nafa ma le a‘oa‘oina ma le folafolaina o le upu a le Atua.
O le lagona lea o le Aposetolo o Paulo e pei ona a‘oa‘oina ai foi o ia i le Feagaiga Tuai. (Teuterenome 25:4) O le mea moni lava, o le taimi faaaluina i le galuega o le suesueina o le Afioga a le Atua ma le lauga o le Aso Sa e lē o se mea faigofie. E tatau ona tele le taimi e faaaluina ai.
Fesili i lau faifeau pe fia le taimi na te tuuina i le suesueina o le Upu a le Atua, ona e iloa ai lea le tāua tele o lea galuega ia te ia. O le mafuaaga lena na manatu ai Paulo e tatau ona vaaia ma tausia faalelei i latou. (1 Korinito 9:14)
O nisi nei o fesili e fia taliina e uiga lava i lenei mataupu:
1. O le ā se fua talafeagai e fuafua i ai le aofaiga o se tupe e faaoloaina ai le faifeau?
2. E tatau ona totogi e le ekalesia le faifeau o loo faigaluega?
3. E tatau ona totogi le faletua o le faifeau pe na o le faifeau?
4. E tatau ona faatau e le Ekalesia se taavale mo le faifeau?
O le fesili muamua:
O le ā se fua talafeagai e fuafua i ai le aofaiga o se tupe e faaoloaina ai le faifeau?
Sa ou fesiligia se tasi o a‘u uo faifeau o loo ia tausia se tasi o ekalesia tele i Ueligitone i lea fesili mo sona manatu.
E tusa ma le 700 le aofaiga o tagata o le ekalesia. O lana tali i lea mataupu e faapea: O se fua tau talafeagai pe afai o loo tilotilo i se fuainumera o le faaaogāina lea o le totogi o loo totogi ai Pule Aoga i totonu o Niu Sila poo Ausetalia.
E mafua lea tulaga ona e talitutusa le galuega faafaiaoga ma le galuega a le faifeau.
O le faiaoga e tapena i po uma ana lesona mo le aso e sosoo ai. E faapea foi le galuega faafaifeau, e lē gata o le lauga ae o lesona mo le a‘oa‘oina o le ekalesia.
O le faiaoga e faatāuaina le soifua lelei ma le saogalemu o le tamaitiiti aoga, ma e tai faapena foi le galuega faafaifeau mo tagata o le aulotu.
O galuega tusitusia e feagai ma le faifeau o nisi ia o vaega o le galuega. O Tusi faamaonia o tagata mo tusi folau ma femalagaiga, aoga, galuega. O tusi talosaga ma isi tulaga faapena.
O le totogi o le faiaoga tulagalua i Niu Sila e tusa lea ma le $40 -$70 afe i le tausaga. Manatua o le faiaoga a toatele le vasega, masalo poo le 30 tamaiti ae o le faifeau e lē gata o tamaiti, o mātua, o le tupulaga ia poo le aiga atoa.
O le Puleaoga e sili atu ma le $100 afe le totogi i le tausaga. O le seleni maua a le faifeau i Ueligitone e pei ona ou ta‘ua i luga e latalata i le $100 afe i le tausaga.
Ou te manatu o se vaega talafeagai le totogiina o le faifeau o loo ia tausia le ekalesia i lalo o le 300 tagata i le $40-$70 afe i le tausaga. E mafai ona fetutunai le tupe ma nisi o faamanuiaga e pei o le totogiina o le fale o le faifeau, taavale, inisiua, telefoni ma isi tulaga faapena.
E tatau ona totogi e le ekalesia le faifeau o loo faigaluega?
O le vaega muamua ou te fia ta‘ua e faapea: Tusa poo le ā le tele o tupe a le faifeau, ae ia faia le mea sa‘o ma le tonu. E faaoloaina le faifeau e tusa ma lona valaauina. Aua ne‘i faalavelavea le manatu e faapea: O le faifeau e tele ana tupe. Aemaise lava le faifeau sa faigaluega lelei pe sa fai foi sana pisinisi.
O le isi itu. E leai lava se faifeau e fia faigaluega ma tausi le ekalesia. Soo se faifeau lava e manao ina ia tuuina atu atoa lona taimi ina ia galue ai ma auauna i le Atua ma le ekalesia. Peitai e iai mafuaaga tatau e faigaluega ai nisi o faifeau.
A mafai ona toe liuliu se tofa i le ekalesia ma tuuina se seleni talafeagai mo le tausia o le faifeau, ou te masalo o le a lē toe alu o ia e faigaluega.
O le a lelei foi le folafolaina o le Upu i le Aso Sa. O le a avanoa foi o ia e tatalo ma fesoasoani i aiga i taimi e moomia ai.
Faaauauina i le vaiaso a sau.
Lui Ponifasio
www.luiponifasio.wordpress.com
