O le tausaga e 1977 na faatoa toe seei ai se suli o le suafa Tama-aiga o le Mata‘afa lea na pale i ai le afioga Mata‘afa Faasuamaleaui Puela Patu, sa filifilia foi i le tofiga Sui o le Fono a Sui Tofia poo le Sui Ao o le Malo.
O se taimi umi foi sa avanoa ai le suafa i lea vaitau ina ua mavae ma tuumalo le afioga i le Tama-aiga o Mata‘afa Fiame Faumuina Mulinuu II, le uluai Palemia o Samoa ina ua maua lona tutoatasi i le tausaga e 1962.
Pe a fua i le umi ma le tele o tausaga e avanoa ai ni suafa tetele tau Tupu faapea o le atunuu pe a mavae le nofoaiga a se isi suli sa seei i le suafa, e faapena foi le taimi na avanoa ai ina ua tuumalo Mata‘afa Faasuamaleaui Puela Patu, ae sosoo ai ma le afioga Mata‘afa Tupuola Lui Iosefo na faaee i ai le suafa i le tausaga e 2011.
O le molimau a le afioga i le Sa‘o Faapito Fiame Naomi Mata‘afa o se suli o le suafa ma o lona tuaa na avea ma uluai Palemia sa pale foi i le suafa tau Tupu o le atunuu, e lei faigofie le filifiliga a suli ma feoi o le suafa, ae na autasi e tofia i ai le afioga Tupuola Lui ua tuumalo nei.
I le molimau lava ia i soo se suafa tāua o le atunuu aemaise o suafa faasa‘osa‘o e tausia aiga ma nuu, e fulisia lava i le tele o tausaga o avanoa ni suafa matai tāua ona e faigata filifiliga a suli poo ai ua tatau ona faaee i ai mamalu ma paia e lē gata o paia faaleaganuu, paia faaleatunuu a o paia faaleekalesia o se suafa maualuga.
E puupuu se taimi sa seei ai le afioga i le Tuiatua Mata‘afa Tupuola Lui Iosefo i le suafa Tama-aiga ae o le molimau a le afioga i le Sa‘o Faapito ia Fiame Naomi Mata‘afa, o se tagata e loto alofa i le aiga ma e lē faapito sona alofa ae tutusa tagata uma.
O lona talaaga i lona soifuaga o se kamuta, ae na tasi i ai le filifiliga ina ua silafia e suli ma feoi o le suafa o se tagata ua lava tapena i itu uma mo le umia o le suafa ma feagai ma tiute o le tausia o le aiga aemaise o le va nonofo ai ma le Malo ma le atunuu.
E le faigofie le filifiliga o le a feagai nei ma suli faasino i lenei suafa maualuga tau Tupu o le atunuu, ma e le iloa foi poo afea ni aso ma ni tausaga o le a toe maua ai se finagalo autasi o suli mo se isi e tulai mai e seei i le suafa.
O le Aso Faraile na tea nei na faia ai toe sauniga o le afioga i le Tama-aiga i le malumalu o le ekalesia Katoliko i Amaile na taitaia e le afioga i le Aki Epikopo Mosenisolo Alapati Lui Mata‘eliga ma sa auai mamalu o le Malo i le afioga i le Ao o le Malo afioga Tui Atua Tupua Tamasese Efi ma lana masiofo o Filifilia Tamasese. O le afioga i le Sui palemia, minisita o le Kapeneta ma le mamalu maualuga o sui o le Malo i le afio o le sui o le fono a sui Tofia, Tuimalealiifano Vaaletoa Sualauvi II.
O loo nofoia nei e le Ao o le Malo ma le Sui o le Fono a Sui Tofia nisi o suafa tau Tupu poo Tama-aiga. O le tasi o suafa tau Tupu o le Malietoa o loo avanoa pea talu ona tuanai le tuumalo o le susuga Malietoa Tanumafili II sa avea ma Ao o le Malo.
Ua faaopoopo nei i ai ma le avanoa o le suafa Mata‘afa ma o le tatalo a le atunuu talosia i se aso e maua ai se laolao e toe filifilia ai Nofo i ia suafa tau Tupu o le atunuu.
